1, 2. Abantu abamwe nibatwara bata Ruhanga?

ABANTU baingi nibateekateeka ngu ebi barikukora Ruhanga tarikubifaho. Nibateekateeka ngu Ruhanga tarikufayo munonga aha birikubahikaho. Nk’eky’okureeberaho, bwanyima y’eihunga ry’amaani eririkwetwa Typhoon Haiyan kuteera Philippines omuri Novemba 2013, omwebembezi w’orurembo rumwe ruhango akagira ati: “Ruhanga aine kuba abaire ari ahandi.”

² Abantu abamwe omuringo ogu barikutwazamu nooba nooshusha oti Ruhanga tarikubaasa kubareeba. (Isa. 26:10, 11; 3 Yoh. 11) Bari nk’abo abu entumwa Paulo yaagambireho ngu ‘bakanga kumanya Ruhanga omu mitima yaabo.’ Abantu nk’abo “baijuriire kimwe okutahikiirira kwona, obubi, omururu, n’okwangana.”—Rom. 1:28, 29.

3. (a) Nitubaasa kwebuuza bibuuzo ki ebirikukwata ahari Ruhanga? (b) Ekigambo ‘omukono’ gwa Ruhanga nikikira kumanyisa ki omu Baibuli?

³ Kandi shi itwe? Okutashushana n’abo abarikugambwaho aharuguru, itwe nitumanya ngu Yehova naareeba buri kimwe eki turikukora. Kwonka shi nitureeba ngu naatufaho kandi ngu ebi turikukora birimu omukono gwe? Mbwenu shi turi bamwe aha bu Yesu yaagambireho nk’abo ‘abarireeba Ruhanga’? (Mat. 5:8) Kubaasa kumanya eki ekyo  kirikumanyisa, ka tubanze twetegyereze bamwe kuruga omu Baibuli abaareebire omukono gwa Ruhanga gurikubahwera n’abo abaayangire kugureeba. Bwanyima nitwija kushwijuma oku amaisho g’okwikiriza garikubaasa kutuhwera kureeba gye omukono gwa Yehova omu bi turikukora. Twaba nitushwijuma enshonga ezi, guma noijuka ngu Baibuli neekira kukoresa ekigambo ‘omukono’ gwa Ruhanga kumanyisa amaani ge, agu arikukoresa kuhwera abaheereza be n’okusingura abazigu be.—Shoma Eky’Ebiragiro 26:8.

4. Ahabw’enki abaabaire nibarwanisa Abaisraeli baaremirwe kureeba omukono gwa Ruhanga?

⁴ Omuri Israeli, abantu bakaba baine omugisha gw’okureeba kandi bakahurira ebi Ruhanga yaakozire kuhwera Abaisraeli. Yehova omu muringo gw’eky’okutangaaza akacungura abantu be kuruga Misri, kandi bwanyima baaguma nibasingura n’abagabe abandi. (Yos. 9:3, 9, 10) N’obu abagabe abo boona abaabaire batwire seeri ya Yorudani baahuriire ebyo byona, bakakwatanisa “n’omutima gumwe kurwanisa Yoshua n’Abaisraeli.” (Yos. 9:1, 2) Abagabe abo na bwanyima y’okutandika kurwanisa Abaisraeli, bakaba nibabaasa kureeba omukono gwa Ruhanga. Yehova akaragiira “eizooba ryayemerera, n’okwezi kwaguma aho, okuhitsya obu eryo ihanga ryaherize kuhoora abazigu baaryo.” (Yos. 10:13) Kwonka Yehova akabaikiriza “kugangaaza emitima yaabo, bakaza kurwanisa Abaisraeli.” (Yos. 11:20) Abaabaire nibarwanisa Abaisraeli bakanga kumanya ngu Ruhanga akaba naarwanirira Abaisraeli, ekyo kyabareetera kusingurwa.

5. Niki eki Omugabe mubi Ahabu yaaremirwe kureeba?

⁵ Bwanyima, Omugabe mubi Ahabu akaba aine omugisha gw’okureeba omukono gwa Ruhanga. Eliya akamugira ati: “Tiharibaho rume nari enjura omuri egi myaka okuhitsya obu ndibiragiira.” (1 Bag. 17:1) Buzima Yehova akaba ari enyima y’ebigambo ebyo, kwonka Ahabu akanga kwikiriza obuhame obwo. Ahabu akareeba omuriro gurikuruga omu iguru, bwanyima ya Eliya kushaba ngu ekitambo kye kyokibwe. Bwanyima Eliya akooreka ngu Yehova akaba naija kuhezaho ekyanda, arikugambira Ahabu ati: “Oshuume, enjura etakaakutangira aho!” (1 Bag. 18:22-45) Ahabu akareeba ebi byona nibibaho kwonka nabwo yaayanga kureeba ngu Ruhanga akaba ariyo naayoreka amaani ge. Eby’okureeberaho ebi bibiri nibitwegyesa eishomo rikuru, ngu twine kureeba omukono gwa Yehova omu birikubaho.

6, 7. Niki eki bamwe omu bunaku bwa Yoshua baayetegyereize gye?

⁶ Okutashushana n’Abagabe babi abo, hariho abaareebire omukono gwa Ruhanga n’obu baraabe baabaire bari omu mbeera nk’ey’abo abaaheza kugambwaho. Nk’eky’okureeberaho, Abagibeoni okutashushana n’amahanga agandi agaarwaniise Abaisraeli omu bwire bwa Yoshua, bo bakakora endagaano y’obusingye n’Abaisraeli. Ahabw’enki? Bakagira bati: “Itwe abairu baawe . . . ekitureetsire aha n’eiziina rya MUKAMA Ruhanga waawe, ahakuba tukahurira okurangaanwa kwe n’ebi yaakozire.” (Yos. 9:3, 9, 10) Bakaba abanyabwengye baamanya ngu owaabaire naahwera Abaisraeli akaba ari Ruhanga ow’amazima.

⁷ Rahabu nawe akareeba omukono gwa Ruhanga omu bwire bwe. Bwanyima y’okumanya oku Yehova yaacungwire abaheereza be, akagambira entatsi ibiri ati: “Nimmanya ku Mukama abahaire egi nsi.” N’obu okucwamu omu muringo ogwo kyabaire kiri eky’akabi, Rahabu akaikiririza omuri Yehova ngu akaba naija kumucungura n’ab’omu ka ye.—Yos. 2:9-13; 4:23, 24.

8. Abaisraeli abamwe bakamanya bata omukono gwa Ruhanga?

⁸ Okutashushana n’Omugabe mubi Ahabu,  Abaisraeli abamwe abaabaire bariho obu Eliya yaashaba omuriro gukaruga omu iguru, bakareeba omukono gwa Ruhanga. Ku baareebire omuriro kuruga ahari Yehova gwayotsya ekitambo, bakagira ngu Yehova “niwe Ruhanga” ow’amazima! (1 Bag. 18:39) Aharibo, eki kikaba nikireebwa butunu!

9. Nitubaasa kureeba tuta Yehova n’omukono gwe obunaku obu?

⁹ Eby’okureeberaho ebirungi n’ebibi ebi twaheza kushwijuma nibituhwera kwetegyereza eki kirikumanyisa okureeba Ruhanga nari okureeba omukono gwe omu birikuba nibibaho. Naitwe ku turikumanya Ruhanga, nitubaasa kureeba omukono gwe, ahakuba nitwetegyereza gye emitwarize ye n’ebi arikukora turikukoresa “amaisho g’emitima” yaitu. (Efe. 1:18) Buzima nitwenda kuba nka bamwe aba ira n’ab’obunaku obu ababaasize kureeba gye oku Yehova arikuhwera abantu be. Kwonka shi, twine obuhame ngu Ruhanga naafayo aha bantu obunaku obu?

10. Ni buhame ki oburikworeka ngu Yehova naatuhwera obunaku obu? (Reeba ekishushani aha kutandika.)

¹⁰ Nituhamiza kimwe ngu Yehova naagumizamu kuhwera abaheereza be. Tutwire nituhurira oku abantu barikushaba kuhwerwa omu by’omwoyo, kandi okushaba kwabo kukagarukwamu. (Zab. 53:2) Allan ku yaabaire naabuurira enju aha nju aha kirwa kikye omuri Philippines, akabuurira omukazi reero omukazi ogwo yaatandika kurira. Allan naagira ati: “Omu kasheeshe ako, omukazi ogwo akashaba Yehova ngu Abajurizi ba Yehova bamubone. Obu yaabaire ari omunyeeto, Abajurizi ba Yehova bakaba baamwegyeise Baibuli, kwonka bakaba bamubuzireho ku yaashwairwe akaza aha kirwa ekyo. Ruhanga akagarukamu okushaba kwe ahonaaho ekyamureeteire kukwatwaho munonga.” Omu mwaka gumwe, akeehayo ahari Yehova.

11, 12. (a) Ni mu miringo ki ei Yehova arikuhwera abaheereza be? (b) Gamba eky’okureeberaho ky’omuntu owaatungire obuhwezi bwa Ruhanga.

¹¹ Baingi aha baheereza ba Ruhanga bareebire obuhame oburikworeka ngu naabahwera barikuteeraho kucwa emize mibi nk’okureetsa, okukoresa emibazi y’ekitabura bwongo, nari okureeba ebirikwitsa enshoni. Bamwe nibagira ngu bakateeraho kureka emize egyo ahabw’abo kwonka baaremwa. Beitu, ku baashabire Yehova kubahwera, akabaha “amaani agarikukirira kimwe,” reero baasingura obweremwa bwabo.—2 Kor. 4:7; Zab. 37:23, 24.

¹² Yehova ahwereire abaheereza be baingi kwemera oburemeezi obu baine. Nk’eky’okureeberaho, Amy kikaba kitamworobeire obu yaaheebwa omugisha gw’okuhwera omu kwombeka Ekyombeko ky’Obukama hamwe n’enju erikutuurwamu abamiisani aha kirwa kikye aha nyanja ya Pacific. Naagira ati: “Tukaba nituraara omu hoteeri nkye, kandi buri izooba tukaba nituraba omu nguuto ezirimu abantu baingi kuza kwombeka.” Akaba aine kwega emicwe y’ekicweka ekyo, kandi amashanyarazi n’amaizi bikaba bikira kuba bitariho. Amy naayongyeraho ati: “Ekyayongyereire amaganya, nkagambira kubi omwe ahari banyaanyazi-itwe owaabaire naakora naitwe. Nkagaruka omuka ndikwehurira nk’otaine ki ndikubaasa kukora. Omu kishengye kyangye kya hoteeri ekirimu omwirima, nkagambira Yehova obusaasi bwangye, ndikumushaba obuhwezi.” Amashanyarazi ku gaagarukire, Amy akakwata Omunaara gw’Omurinzi ogurimu ekicweka ekirikukwata aha kuhendera eishomero rya Gileadi ekyabaire nikigamba aha buremeezi obu yaabaire aine nk’emigyenzo misya, okugirira ab’omuka orushusho, n’okumanyiira abantu basya. Naayongyeraho ati: “Okaba nooshusha oti Yehova naagamba naanye ekiro ekyo. Ekyo kikampwera kuguma omu buheereza bwangye.”—Zab. 44:25, 26; Isa. 41:10, 13.

13. Twine buhame ki oburikworeka ngu Yehova naashagika abaheereza be baaba ‘nibarwanirira amazima kandi barikugahamya’?

 ¹³ Ahabw’okugira ngu Abajurizi ba Yehova babaire abasinguzi omu ‘kurwanirira amazima n’okugahamya’ n’obuhame ngu omukono gwa Yehova nigubashagika. (Fil. 1:7) Gavumenti ezimwe niziteeraho kwemereza omurimo gw’abaheereza ba Ruhanga. Kwonka ku turikureeba enyima oku Abajurizi ba Yehova babaasize kusingura emishango erikuhika 268 omu macwero g’emanja ag’ahaiguru, otwariiremu n’emishango 24 omu Kooti ya Buraaya y’Obugabe bw’Abantu kuruga omwaka 2000, nikyeyoreka gye ngu tihariho orikubaasa kuremesa omukono gwa Ruhanga.—Isa. 54:17; shoma Isaaya 59:1.

14. Nitureeba tuta omukono gwa Ruhanga omu murimo gwaitu gw’okubuurira n’obumwe obu twine?

¹⁴ Ruhanga wenka niwe arikubaasa kutuhwera kubuurira amakuru marungi omu nsi yoona. (Mat. 24:14; Byak. 1:8) Okwongyerera ahari ekyo, ab’eishe-emwe abatarikushushana omu nsi yoona nibaheereza Yehova, ekintu eki ab’ensi barikureeba nk’ekitarikubaasika, kandi eki nikibareetera kugira bati: “Buzima kwo Ruhanga ari omuriimwe.” (1 Kor. 14:25) N’ahabw’ekyo, twena twine obuhame oburikworekyera kimwe ngu Ruhanga naashagika abaheereza be. (Shoma Isaaya 66:14.) Kandi shi iwe nk’omuntu? Nooreeba gye omukono gwa Yehova omu bi orikukora?

15. Shoboorora ahabw’enki obumwe nitubaasa kutareeba omukono gwa Yehova.

¹⁵ Ni nshonga ki ezirikubaasa kutureetera kutareeba gye omukono gwa Ruhanga omu bi turikukora? Emirabanamu neebaasa kutumaramu amaani. Eki kyabaho, nitubaasa kwebwa oku Yehova yaatuhwereire. Obu Omugabekazi Yezebeeli yaatiinatinisa kwita nabi Eliya, kumara obwire bukye Eliya akeebwa oku Ruhanga yaabaire yaamuhwereire. Baibuli neegira ngu Eliya akashaba “Ruhanga ngu afe.” (1 Bag. 19:1-4) Mbwenu shi oburemeezi bwa Eliya bukarugaho buta? Yehova niwe yaabaire aine kumuhwera.—1 Bag. 19:14-18.

16. Nitubaasa kukora ki kureeba Ruhanga nk’oku Yobu yaamureebire?

 ¹⁶ Yobu akahugira aha byabaire nibimwerarikiriza tiyaareeba ebintu nk’oku Ruhanga yaabaire naabireeba. (Yob. 42:3-6) Naitwe nitubaasa kuhuga nka Yobu, n’ahabw’ekyo nituba twine kutamu amaani maingi kubaasa kureeba Ruhanga. Ekyo nitubaasa kukikora tuta? Twine kuteekateeka aha ki Ebyahandiikirwe birikugamba aha buremeezi obu twine. Twamanya oku Yehova arikutushagika, naabeera kimwe owaabuzima ahariitwe. Nka Yobu, naitwe nitubaasa kugira tuti: “Nkaba nkuhuriza amatu, kwonka hati eriisho ryangye ryakwereebera.”

17, 18. (a) Nitubaasa kumanya tuta ngu Yehova naatuhwera? (b) Gamba eky’okureeberaho ekirikworeka oku Ruhanga arikutuhwera obunaku obu.

¹⁷ Nitubaasa kureeba tuta omukono gwa Yehova? Aha hariho eby’okureeberaho: Obundi nooteekateeka ngu abaakubuuriire amazima, Ruhanga niwe yaabahabwire kubaasa kukubona. Oraagiireho omu nteerane, bwanyima y’orubazo kuheebwa okagira oti: “Buzima ekyo nikyo naaba niinyenda”? Nari noobaasa kuba oreebire okushaba kwawe nikugarukwamu. Obundi oyongyeire aha buheereza bwawe kandi waatangaara kureeba oku Yehova akuhwereire kubuhikiiriza. Nari okaruga aha murimo ahabw’enshonga z’eby’omwoyo, reero waareeba amazima g’ekiragaaniso kya Ruhanga eki: “Tindikutsigaho”? (Heb. 13:5) Twaguma nitureeba omu by’omwoyo, nitubaasa kumanya oku Yehova atuhwereire omu miringo mingi.

¹⁸ Sarah kuruga Kenya naashoboorora ekyamuhikireho ati: “Nkashaba aha bikwatiraine n’omwegi wa Baibuli ou naabaire ninteekateeka ngu tarikufayo aha kwega kwe. Nkashaba Yehova ngu kyaba nikibaasika ndekyere aho kwegyesa omwegi ogwo. Ahonaaho naaheza kugira nti ‘Amiina,’ esimu yangye ekagamba. Omwegi wa Baibuli ogwo niwe yaabaire naateera esimu kumbuuza ku kiraabe nikibaasika kuza naanye omu nteerane! Eki kikanshemeza munonga!” Naiwe noobaasa kureeba emiringo ei Ruhanga akuhwereire. Rhonna, munyaanyazi-itwe orikutuura omuri Asia, naagira ati: “Nikitwara obwire kubaasa kureeba oku Yehova arikutuhabura. Kwonka ekyo ku kirikuhwa, nikishemeza kumanya oku arikutufaho munonga!”

19. Niki ekindi eki twine kukora kubaasa kuba bamwe ahari abo abarikureeba Ruhanga?

¹⁹ Yesu akagira ngu baine okushemererwa “abashemeire omu mutima, ahabw’okuba abo baryareeba Ruhanga.” (Mat. 5:8) Nitubaasa kuba tuta “abashemeire omu mutima”? Tushemereire kuba abeecumi omunda kandi tukarekyera aho emitwarize mibi yoona. (Shoma 2 Abakorinso 4:2.) Twateeraho kugira omukago murungi na Ruhanga kandi tukagira n’emitwarize mirungi, nitubaasa kwebarira ahari abo abarikureeba Ruhanga. Omu kicweka ekirikukurataho nituza kushwijuma oku turikubaasa kumanya gye ngu Yehova naatuhwera omu kwikiriza kwaitu.