1. Manoa akeehurira ata ku yaamanyire ngu naaza kuba ishe omwana?

MANOA n’omukazi we bakaba nibahamya ngu tibarikubaasa kuzaara omwana, ahabw’okuba muka Manoa akaba ari engumba. Kwonka, maraika wa Yehova akaba ayeyorekire muka Manoa, kandi eki baabaire nibareeba nk’ekitarikubaasika, kikaba nikiza kubaasika. Manoa n’omukazi we bakaba nibaija kuzaara omwana! Hatariho kubanganisa, Manoa akashemererwa, kwonka nabwo akaba naamanya obujunaanizibwa bw’amaani obu yaabaire naija kutunga. Omu ihanga ryabo eryabaire riijwiremu obubi, we n’omukazi we bakaba nibaija kworora bata omwana waabo kugira ngu aheereze Yehova? Manoa akeeshengyereza Yehova ati: “Ai MUKAMA, ninkweshengyereza oikirize ogwo mushaija wa Ruhanga ou waatuma atugarukyeho, atushoboororere oku turitwaza omwana orizaarwa.”—Bar. 13:1-8.

2. Okutendeka abaana nikitwariramu ki? (Reeba n’akabokisi “ Abeegi Baawe ba Baibuli ab’Omuhendo.”)

² Ku oraabe ori omuzaire, nooyetegyereza gye okweshengyereza kwa Manoa. Naiwe oine obujunaanizibwa bw’amaani obw’okuhwera omwana waawe kumanya Yehova kandi akamukunda. (Enf. 1:8) Kubaasa kuhikiiriza ekyo, abazaire Abakristaayo nibakora entebeekanisa nungi y’Okuramya kw’Eka. Kwonka, kubaasa  kuhwera abaana baawe kukunda amazima, nikyetengyesa kukora ekirikukira aha kugira okuramya kw’eka buri saabiiti. (Shoma Eky’Ebiragiro 6:6-9.) Niki ekirikwija kukuhwera kutendeka abaana baawe kukunda amazima? Ekicweka eki n’ekirikukurataho nibiija kworeka oku abazaire barikubaasa kutooreza Yesu. N’obu Yesu araabe yaabaire atari muzaire, abazaire nibabaasa kugasirwa omu muringo ogu yaabaire ayegyesamu, ahakuba akaba ayegyesa abeegi be kandi abatendeka omu muringo gwa rukundo, ogw’obucureezi, arikukoresa n’okwetegyereza. Ka tushwijume buri gumwe aha mitwarize egi.

3. Yesu akooreka ata ngu naakunda abeegi be?

³ Yesu akaba agambira abeegi be ngu naabakunda. (Shoma Yohaana 15:9.) Kandi akaba ayoreka ngu naakunda abeegi be arikugira obwire bw’okuba nabo. (Mak. 6:31, 32; Yoh. 2:2; 21:12, 13) Yesu akaba atarikwetwara ngu aine bingi by’okukora akabura kubaha obwire. N’ahabw’ekyo, bakaba batarikubaasa kubanganisa yaaba naabakunda. Noobaasa kutooreza ota omuringo ogu Yesu yaabaire naayegyesamu?

4. Noobaasa kuhamiza ota abaana baawe ngu noobakunda? (Reeba ekishushani aha kutandika.)

⁴ Gambira abaana baawe ngu noobakunda, kandi butoosha boorekye ngu nobatwara nk’ab’omuhendo. (Enf. 4:3; Tit. 2:4) Samuel, orikutuura omuri Australia, naagira ati: “Obu naabaire ndi muto munonga, tata akaba anshomera Ekitabo Kyangye eky’Ebitebyo by’Omu Baibuli buri mwabazyo. Akaba agarukamu ebibuuzo byangye, ambumbatira, kandi anywegyera ndikuza kubyama. Bwanyima ka naatangaire munonga ku naamanyire ngu tata akakurira omu ka ahu baabaire batarikukira kumubumbatira kandi bakamunywegyera! Kwonka akaba ateeraho kworeka ngu naankunda. N’ekyarugiremu, nkagira omukago murungi nawe, kandi nkaba nimpurira mmazirwe nyine n’oburinzi.” Hwera abaana baawe kwehurira batyo orikuguma noobagambira oti: “Nimbakunda.” Kora ebirikworeka ngu noobakunda. Gaaniira nabo, rya nabo, kandi ozaane nabo.

5, 6. (a) Yesu akaba akorera ki abu arikukunda? (b) Shoboorora oku okuhana okurungi kurikuhwera abaana kuhurira baine oburinzi kandi barikukundwa.

⁵ Yesu akagira ati: “Boona abu nkunda mbateisa kandi mbahana.” * (Kush. 3:19) N’obu abeegi ba Yesu baraabe baabaire bakira kuhakana ngu n’oha omukuru omuribo, tarabehugize. Kandi ku baabaire banga kukuratira obuhabuzi bwe, nabwo akaba atakyehuzya. Omu muringo gwa rukundo, akaba abahanira omu mwanya murungi n’obwire obuhikire.—Mak. 9:33-37.

⁶ Yoreka ngu nookunda abaana baawe obumwe orikubahana. Obumwe nikiba nikimara kushoboorora ahabw’enki ekikorwa kiri kirungi nari kibi. Obundi, omwana naabaasa kutagyendera aha bi waamugambira. (Enf. 22:15) Ekyo kyabaho, tooreza Yesu. Omu mwanya murungi n’omu bwire obuhikire, hana omwana waawe omu muringo gwa rukundo, omuhe obuhabuzi, omutendekye, kandi omutereeze. Munyaanyazi-itwe omwe orikwetwa Elaine kuruga South Africa naagira ati: “Abazaire bangye bakaba baguma nibampana.” Ku baabaire bandabura aha birikuruga omu kutwaza kubi, bakaba bateeraho kureeba yaaba ngyendeire aha buhabuzi bwabo. Kwonka bakaba batakampanaga baine ekiniga nari batashobooroire ahabw’enki baampana. N’ekyarugiremu, nkaguma nyine oburinzi. Nkaba nimmanya obugarukiro bwangye, kandi nkaba nimmanya eki nshemereire kukora.”

7, 8. (a) Yesu akooreka ata obucureezi omu kushaba kwe? (b) Oku orikushaba nikubaasa kwegyesa kuta abaana baawe kwesiga Ruhanga?

⁷ Teekateeka oku abeegi ba Yesu baayehuriire ku baamanyire ebirikukwata aha kushaba kwe okw’ahamuheru oku: ‘Abba, Taata, byona nibikubaasikira; onyiheho ekikopo eki; kwonka kitaba nk’oku nyowe ndikwenda, kureka nk’oku iwe orikwenda.’ * (Mak. 14:36) Kurugiirira aha bigambo bya Yesu, abakuratsi be bakeetegyereza ngu obu Omwana wa Ruhanga ohikiriire yaashabire Ruhanga obuhwezi, nabo baine kukora nikyo kimwe.

⁸ Abaana baawe nibeegyera ki aha kushaba kwawe? N’amazima, ekikuru ekirikukureetera kushaba Yehova ti kwegyesa baana baawe. Kwonka, waashaba omu bucureezi abaana baawe bakuhuriire, nibeega kwesiga Yehova. Ana, orikutuura omuri Brazil, naagira ati: “Ku haabaire haba hariho oburemeezi, nk’obu tatenkuru na maawenkuru baabaire barwaire, abazaire bangye bakaba bashaba Yehova kubaha amaani g’okugumira embeera, n’obwengye bw’okucwamu gye. Nangwa n’obu baabaire baba baine okugyemeserezibwa kw’amaani, oburemeezi bwabo bakaba babureka omu mikono ya Yehova. N’ekyarugiremu, nkeega kwesiga Yehova.” Waaba nooshaba n’abaana baawe, otakaabashabira kyonka. Shaba Yehova ngu obundi naiwe akuhwere ogambire mukama waawe akuhe orusa rw’okuza aha ruteerane oruhango orw’ebiro bishatu, otungye obumanzi bw’okubuurira omutaahi, nari akuhwere omu muringo ogundi. Waayesiga Ruhanga, abaana baawe nibaija kwega kukora nikyo kimwe.

9. (a) Yesu akaba ayegyesa ata abeegi be kuheereza abandi omu bucureezi? (b) Waaba nooheereza abandi, nikiija kwegyesa ki abaana baawe?

⁹ Yesu akatendeka abeegi be kuheereza abandi omu bucureezi kurabira omu bigambo  bye n’eky’okureeberaho kye. (Shoma Luka 22:27.) Akeegyesa entumwa ze kugira omutima gw’okwefeerereza baaba nibaheereza Yehova nari baaba nibakoragana n’abagyenzi baabo. Waaba nooyefeerereza, noobaasa kwegyesa abaana baawe nabo kukora nikyo kimwe. Debbie oine abaana babiri naagira ati: “Nkaba ntakagiraga eihari ahabw’obwire obu ibanyi omureeberezi yaabaire amara n’abandi. Nkaba nimmanya ngu omu ka yaitu ahu twabaire tumwendera, tukaba tumutunga.” (1 Tim. 3:4, 5) Iba orikwetwa Pranas, naayongyeraho ati: “Bwanyima abaana baitu bakaba nibakunda kwejumba omu nteerane empango n’entebeekanisa ezindi ez’eby’omwoyo. Bakatunga okushemererwa, baatunga abanywani barungi, kandi bakaba nibakunda kuba bari n’ab’eishe-emwe!” Eka yoona hati eri omu buheereza obw’obutwire. Waaba omucureezi kandi okagira omutima gw’okwefeerereza, abaana baawe nibabaasa kwega kuheereza abandi.

10. Abantu baingi ku baizire kureeba Yesu, akooreka ata okwetegyereza?

¹⁰ Yesu akaba ayoreka okwetegyereza arikufayo kumanya ahabw’enki abantu nibatwaza omu muringo ogumwe. Eizooba rimwe, bamwe aha bahurikiza be omuri Galilaaya bakeeshushaniriza nk’abarikwenda kumukuratira. (Yoh. 6:22-24) Kwonka, Yesu akaba naareeba ebiri omu mitima yaabo, yaamanya ngu abantu abo bakaba nibakunda munonga eby’okurya kukira ebi yaabaire naayegyesa. (Yoh. 2:25) Akareeba ebitahikire omu mitima yaabo, yaabahabura, kandi yaabashoboororera empindahinduka ezi baabaire baine kukora.—Shoma Yoh. 6:25-27.

11. (a) Ha eky’okureeberaho kworeka oku okwetegyereza kurikubaasa kuhwera omuzaire kumanya yaaba omwana we naakunda kubuurira. (b) Noobaasa kuhwera ota omwana waawe kukunda kubuurira?

¹¹ N’obu oraabe otarikubaasa kumanya ebiri omu mutima, naiwe noobaasa kukoresa okwetegyereza omanye oku omwana waawe arikwehurira aha bikwatiraine n’okubuurira. Abazaire baingi baaba bari omu kubuurira n’abaana baabo, nibaguma nibahuumuraho kubaasisa abaana baabo kuruhuuka n’okugira eki baarya. Kwonka, noobaasa kuteeraho kwebuuza oti: ‘Omwana wangye naakunda okubuurira nari naakunda okuhuumuraho kyonka?’ Waamanya ngu abaana baawe tibarikukunda gye kubuurira, teeraho kubahwera kutaho ebigyendererwa. Koresa obukodyo butari bumwe na bumwe kubahwera kwejumbira kimwe omu kubuurira.

12. (a) Omu muringo gw’obwengye Yesu akarabura ata abakuratsi be aha bushambani? (b) Ahabw’enki okurabura kwa Yesu kwaizire omu bunaku obuhikire?

 ¹² Kandi Yesu akakoresa okwetegyereza arikworeka enshobe ezirikubaasa kureetera omuntu kukora ekibi. Nk’eky’okureeberaho, abakuratsi be bakaba nibamanya ngu okushambana ni kibi. Kwonka akabarabura ahari ebyo ebirikubaasa kureetera omuntu kushambana arikugira ati: “Orikureeba omukazi akamwetenga, biri aherize kumushambanaho omu mutima gwe. N’eriisho ryawe rya buryo ku riraabe nirikureetera kukora ekibi, oriihemu, orinagye.” (Mat. 5:27-29) Aha Bakristaayo abaabaire nibategyekwa Rooma, ebigambo ebyo bikagambwa omu bunaku buhikire. Omunyabyafaayo omwe arikuhandiika aha mizaano ya Rooma akagira ati: “Eriisho n’okutu bikaba bireeba kandi bihurira ebitahikire, kandi emizaano erikwitsa enshoni niyo yaabaire neehimbisibwa munonga.” Ka kyabaire kiri ekikorwa kya rukundo kandi ky’obwengye Yesu kurabura abeegi be aha bintu ebyabaire nibibaasa kubareetera kugumirwa kuguma baine emicwe mirungi!

13, 14. Noobaasa kurinda ota abaana baawe kutejumba omu by’okweshemeza ebibi?

¹³ Okwetegyereza nikubaasa kukuhwera kurinda abaana baawe akabi k’eby’omwoyo. Obunaku obu, abaana nibabaasa kurahuka kureeba ebirikwitsa enshoni n’ebindi bintu bibi kukira ira. N’eky’amazima, abazaire Abakristaayo nibagambira abaana baabo ngu okwejumba omu by’okweshemeza ebibi tikihikire. Kwonka, okwetegyereza nikwija kukuhwera kumanya ngu omwana waawe naabaasa kugira omururu gw’okureeba ebirikwitsa enshoni. Yebuuze oti: ‘Niki ekirikubaasa kureetera omwana wangye kwohibwa kureeba ebirikwitsa enshoni? Naamanya ahabw’enki kiri eky’akabi? Nyorobi kuhikwaho, kugira ngu naija kwija kunshaba obuhwezi yaayohibwa kureeba aha birikwitsa enshoni?’ Nangwa n’obu abaana baawe baakuba bakiri bato, noobaasa kubagira oti: “Ku origwa aha mukura oguriho ebirikwitsa enshoni kandi okoohibwa kureebaho, nyabura ‘we oije ongambire. Toshemereire kugira enshoni. Niinyenda kukuhwera.”

¹⁴ Okwetegyereza nikwija kukuhwera kutoorana eby’okweshemeza ebyawe n’obwegyendesereza. Pranas owaaba yaagambirweho naagira ati: “Itwe abazaire ebi turikukunda aha bikwatiraine n’ebyeshongoro, ebitabo, na vidiyo nibiteeraho eky’okureeberaho eka. Noobaasa kugamba bingi aha bintu bingi, kwonka abaana baawe nibaija kureeba ebi orikukora kandi bakutooreze.” Abaana baawe baakureeba nootoorana eby’okweshemeza n’obwegyendesereza, nabo nibabaasa kukora nikyo kimwe.—Rom. 2:21-24.

15, 16. (a) Ahabw’enki orikubaasa kuhamya ngu Ruhanga naija kukuhwera kutendeka abaana baawe? (b) Nituza kushwijuma ki omu kicweka ekirikukurataho?

¹⁵ Niki ekyabaireho Manoa ku yaashabire obuhwezi bw’okworora mutabani we? ‘Ruhanga akahurira okushaba kwa Manoa.’ (Bar. 13:9) Abazaire, naimwe Yehova naija kuhurira okushaba kwanyu. Naija kugarukamu okushaba kwanyu, kandi abahwere kutendeka abaana baanyu. Kandi naija kubahwera kworora abaana baanyu mwine rukundo, obucureezi, n’okwetegyereza.

¹⁶ Obu Yehova arikuhwera abazaire kutendeka abaana baabo bakiri bato, naija n’okubahwera kubatendeka baaba emishogoyo. Omu kicweka ekirikukurataho, nitwija kureeba oku orikubaasa kutooreza Yesu okagira rukundo, obucureezi, n’okwetegyereza waaba nootendeka omwana waawe omushogoyo kuheereza Yehova.