Iwe nooteekateeka ki? Ruhanga naasiima entaro? Ku kiraabe nikwo kiri, naaba ari aha rubaju rw’oha? Okutunga eby’okugarukamu by’ebibuuzo ebi nikibaasa kukuhwera kushwijuma emiteekateekyere yaawe aha ntaro. Nk’eky’okureeberaho, waamanya ngu Ruhanga naasiima entaro kandi ngu naashagika orubaju oru orikukunda, buzima noobaasa kushemererwa, ogire amatsiko ngu abu orikukunda nibaija kusingura. Kwonka shi, noobaasa kwehurira ota waamanya ngu Ruhanga naashagika ab’orubaju oru otarikukunda? Buzima noobaasa kuhindura emiteekateekyere yaawe.

Hariho enshonga nkuru endiijo. Okumanya oku Ruhanga arikureeba entaro nikibaasa kukwata aha miteekateekyere ei oine ahari Ruhanga. Waaba ori omwe aha bukaikuru bw’abantu ababonabonesiibwe entaro, hatariho kubanganisa nooyenda kumanya eky’okugarukamu ky’ekibuuzo eki: Ruhanga shi naakunda entaro, aikiriza abantu bazibonaboneramu, kandi tarikufayo aha barikubonabonesibwa?

Nikibaasa kukutangaaza okumanya ngu eki Baibuli erikugarukamu nikitaanira kimwe aha biteekateeko ebyo. Okwongyera ahari ekyo, okuruga ira kuhitsya obunaku obu, emiteekateekyere ya Ruhango aha ntaro tekahindukire. Ka tureebe eki Baibuli erikugamba aha ku Ruhanga yaabaire naareeba entaro ira n’omu kyasha eky’okubanza obu Yesu yaabaire ari omu nsi. Ekyo nikiija kutuhwera kumanya oku Ruhanga arikureeba entaro hati, kandi yaaba nihaija kubaho entaro omu biro by’omumaisho.