1. Yesu akaba naatwara ata omurimo gw’Okubuurira? Shoboorora.

YESU akaba naakunda kugamba aha Bukama bwa Ruhanga. Kurugiirira aha biri omu Baibuli, Yesu akagamba munonga aha Bukama kukira ebindi byona, akabugambaho emirundi erengire 100 omu buheereza bwe. Akaba naakunda munonga Obukama bwa Ruhanga omu mutima gwe.—Shoma Matayo 12:34.

2. Ni bangahi abarikubaasa kuba baabaire bariho obu Yesu yaaha ekiragiro ekiri omu Matayo 28:19, 20, kandi ahabw’enki nitukihamya?

² Ahonaaho Yesu aherize kuzooka, akabugana abantu barikurenga 500 abaabaire nibaija kubuurira aha Bukama omu biro by’omumaisho. (1 Kor. 15:6) Noobaasa kushanga ngu aha izooba eryo nibwo yaaragiira abeegi be kubuzya amakuru marungi g’Obukama “omu mahanga goona,” omurimo ogwabaire gutoorobi obunaku obwo! * Yesu akagira ngu omurimo mukuru ogu gukaba niguza kukorwa “okuhitsya obu ensi egi erihwaho,” kandi buzima ekyo, nikyo kiriyo nikikorwa.  Noobaasa kuba nooyejumba omu kuhikiiriza ekiragiro eki kandi ekiri obunabi.—Mat. 28:19, 20.

3. Ni bintu ki bishatu ebituhwereire kubuurira gye amakuru marungi?

³ Yesu bwanyima y’okuha ekiragiro ky’okubuurira, akaraganisa abakuratsi be ati: “Ndi hamwe naimwe.” (Mat. 28:20) N’ahabw’ekyo, Yesu niwe yaabaire naija kwebembera omurimo gw’okubuurira. Kandi Ruhanga waitu atuhaire “ebirungi byona” kutuhwera kuhikiiriza ekiragiro ekyo. (Heb. 13:20, 21) Omu kicweka eki, nituza kushwijuma ebintu bishatu ebi: (1) eby’okukoresa ebi tuhairwe, (2) emiringo ei tutwire nitukoresa, (3) n’okutendeka oku tutungire. Eky’okubanza, yetegyereze bimwe aha by’okukoresa ebi tukoreise omu myaka 100 ehingwire.

4. Ahabw’enki tutwire nitukoresa eby’okukoresa ebitarikushushana omu murimo gwaitu gw’okubuurira?

⁴ Yesu akagyeragyeranisa “ekigambo ky’obukama” n’embibo ezibibirwe omu itaka ritarikushushana. (Mat. 13:18, 19) Omuhingi naakoresa ebikoreso bitarikushushana kuteebekanisa omusiri gwe kubaasisa embibo kumera gye. Nikyo kimwe, kumara emyaka mingi Omugabe waitu atwire naatuha eby’okukoresa kutuhwera kuteebekanisa emitima y’obukaikuru bw’abantu kwikiriza amakuru g’Obukama. Bimwe aharibyo bikozire kumara emyaka ikumi n’okurengamu, kandi ebindi byorekire ngu nibibaasa kukora ebiro byona. Kwonka eby’okukoresa ebi byona bituhwereire kuba ababuurizi barungi.

5. Kaada eriho obutumwa ekaba neekoresibwa eta?

⁵ Eky’okukoresa kimwe ekyahwereire baingi kutandika kwejumba omu kubuurira ni kaada y’okukoresa omu kubuurira ei ababuurizi baatandikire kukoresa omuri 1933. Kaada egyo ekaba neyingana inci ishatu ahari itaano kandi eriho obutumwa kuruga omu Baibuli. Bwanyima y’obwire hakaba hateerwa kaada ensya eriho obutumwa. Enyanjura yaayo ekaba eyorobi! C. W. Erlenmeyer akaba aine emyaka nka ikumi y’obukuru obu yaatandika kubuurira arikukoresa kaada egyo. Akashoboorora ati: “Enyanjura ekaba neegira eti, ‘Noobaasa kushoma kaada egi?’ Bwanyima y’omuntu kushoma kaada, tukaba tumuha ebitabo reero tugyenda.”

6. Kaada eyaabaire eriho obutumwa ekahwera eta omu kubuurira?

⁶ Kaada egyo ekaba neehwera omu miringo mingi. N’obu baingi baraabe baabaire baine ekihika ky’okubuurira, bamwe aharibo bakaba baine enshoni kandi batarikumanya eky’okugamba. Kwonka abandi bakaba baine bingi by’okugamba. Bakaba bagambira abu barikubuurira byona ebi baabaire nibamanya omu budakiika bukye, kwonka bakaba batarikukoresa kwetegyereza omu nyanjura zaabo! Okutaana n’ekyo, kaada egi eriho ebigambo bigufu, niyo yaabaire eba nk’erikugamba omu mwanya gw’ababuurizi.

7. Ni buremeezi ki obu bamwe baatungire omu kukoresa kaada?

⁷ Kwonka obumwe kikaba kitooroba kukoresa kaada egyo. Grace A. Estep: Omukristaayo owaabaire aheereize obwire bwingi, akagira ati: “Obumwe, abantu bakaba baatubuuza bati: ‘Kaada egyo eriho ki? Noobaasa kungambira bugambira ebiriho?’” Kandi abamwe bakaba banga kushoma ebigambo ebiri aha kaada. Abandi bakaba bateekateeka ngu kaada n’eyaabo reero bagibiika bakiinga orwigi. Ou barikubuurira ku yaabaire ahakanisa, obumwe akaba acwanyagura kaada egyo. Kwonka, ab’eishe-emwe bakaba nibateeraho kwega kugamba n’abantu n’okwemanyisa butunu ngu nibabuurira aha Bukama.  

8. Shoboorora oku akooma akariho embazo eziri aha ntambi kaabaire nikakoresibwa. (Reeba ekishushani aha kutandika.)

⁸ Ekindi ekyakoresiibwe omu kubuurira omu myaka ya 1930 n’omu ya 1940 n’akooma akariho embazo eziri aha ntambi, aku ab’eishe-emwe  abamwe baakubize Arooni ahabw’okugira ngu niko kaabaire nikagamba munonga omu mwanya gwabo. (Shoma Okuruga 4:14-16.) Omuntu ku yaabaire aikiriza, omubuurizi akaba amuteeraho orubazo rw’okuhurikiza orw’edakiika ina n’ekicweka kuruga omu Baibuli, bwanyima amutsigira eky’okushoma. Obumwe, eka yoona ekaba eyeteeranira hamwe kuhurikiza obutumwa kuruga omu Baibuli obukwatsirwe aha rutambi! Omu 1934 ekibiina kya Watch Tower Society kikatandika kushohoza obwoma obu obutebeekanisiibwe kukoresibwa omu kubuurira. N’ekyarugiremu, hakaba hariho emitwe 92 etarikushushana eri aha ntambi.

9. Akooma akariho embazo eziri aha ntambi kakahwera kata?

⁹ Hillary Goslin bwanyima y’okuhurira rumwe aha mbazo ezikwatsirwe aha ntambi, akashaba omubuurizi kumutsigira orutambi orwo kumara saabiiti emwe kugira ngu ahwere bataahi be kumanya amakuru marungi g’Obukama. Omubuurizi ku yaagarukire kureeba Hillary Goslin, akashanga aine abantu baingi abarikwenda kumanya ebirikukiraho bategyereize. Bwanyima y’obwire bukye, baingi aharibo bakeehayo ahari Yehova, kandi bwanyima bahara ba Hillary babiri bakaza omu ishomero rya Gilead reero baatunga omugisha gw’okuza kubuurira omu ihanga erindi. Nka kaada eriho obutumwa, akooma akariho embazo eziri aha ntambi kakahwera baingi kutandika kwejumba omu murimo gw’okubuurira. Bwanyima, Omugabe akaba naija kuhwera ababuurizi kutunga eby’okugamba kurabira omu Ishomero ry’Obuheereza.—Shoma Isaaya 50:4.  

10, 11. Empapura z’amakuru na radiyo bikakoresibwa bita kujanjaaza amazima, kandi ahabw’enki byakozire gye?

¹⁰ Abaheereza ba Ruhanga, bakoreise emiringo mingi barikugyendera aha buhabuzi bw’Omugabe kubaasa kuhitsya amakuru marungi aha bantu boona. Eki kikaba kiri kikuru na munonga obu “abagyesi” baabaire bari bakye. (Shoma Matayo 9:37.) Aha kutandika kw’ekyasha kya 20, empapura z’amakuru zikaba nizikoresibwa kuhika aha bantu baingi omu myanya ei abaheereza ba Yehova baabaire bari bakye. Buri saabiiti, Charles Taze Russell akaba ayohereza embazo ze omu kitongore ky’empapura z’amakuru. Bwanyima, nabo bakaba boohereza embazo ze omu mpapura z’amakuru omuri United States, Canada, na Europe. Nikigambwa ngu omu 1913, embazo z’ow’eishe-emwe Russell zikaba nizishomwa abantu nka 15,000,000 omu mpapura z’amakuru 2,000!

¹¹ Bwanyima y’okufa kw’ow’eishe-emwe Russell, omuringo musya ogundi gw’Okubuurira amakuru marungi g’Obukama gukatandika kukoresibwa. Omu Kwakana 16, 1922, Joseph F. Rutherford akatandika kwegyesa arikukoresa radiyo, eyaabaire neehurirwa abantu nka 50,000. Bwanyima, omu Kwakabiri 24, 1924, radiyo y’Ekibiina kya Yehova ey’okubanza erikwetwa, WBBR, ekatandika kukoresibwa. Aha bikwatiraine n’omuringo musya ogu gw’okubuurira abantu, Watch Tower eya Okwaikumi-n’abiri 1, 1924, ekashoboorora eti: “Nitwikiriza ngu okukoresa radiyo nigwo muringo murungi gw’okujanjaaza amazima agu baingi batarikumanya.” Nk’empapura z’amakuru, radiyo ekahwera kuhitsya amakuru g’Obukama aha bantu baingi omu myanya eyaabaire neetuurwamu ababuurizi bakye.

12. (a) Ni muringo ki gw’okubuurira omu myanya erimu abantu baingi ogu orikukunda munonga? (b) Niki ekirikubaasa kutuhwera kutatiina kubuurira omu myanya erimu abantu baingi?

¹² Okwongyera ahari ekyo, hati nitwejumbira kimwe omu kubuurira turikukoresa akagaari n’emeeza omu myanya erikuba erimu abantu baingi nk’ahu b’arikukwatira ebiiruka, ahu birikwemerezibwa, omu butare, n’ahandi. Ku oraabe  nootiina kwejumba omu miringo y’okubuurira emwe, noobaasa kushaba Yehova, reero oteekateekye aha bigambo bya Angelo Manera omureeberezi orikutaayaayira ebibiina ebi: “Buri muringo musya gw’okubuurira, tukaba tugureeba nk’omuringo ogundi ogw’okuheerezamu Yehova, kworeka ngu tumuhamiireho, kugyeza obwesigwa bwaitu, kandi ngu tweteekateekire kumuheereza omu muringo gwona ogu arikwenda.” Okwejumba omu muringo musya gw’okubuurira, obundi ogu tutarikukunda, nikituhwera kwongyera kwesiga n’okwikiririza omuri Yehova, ekirikutubaasisa kukura omu by’omwoyo.—Shoma 2 Abakorinso 12:9, 10.

13. Omukura gwaitu, jw.org, guhwereire guta omu kubuurira, kandi otungire birungi ki omu kugukoresa?

¹³ Ababuurizi baingi nibakunda kworeka abantu Omukura gwaitu, jw.org, ahu barikubaasa kwiha kandi bakashomera ebitabo ebirikushoboorora aha Baibuli omu ndimi ezirikurenga 700. Buri izooba, abantu abarikurenga akakaikuru kamwe n’emitwaro nkaaga nibaza aha Mukura gwaitu. Nk’oku radiyo yaabaire neehwera ira, obunaku obu Omukura gwaitu niguhitsya amakuru marungi aha bantu, otwariiremu n’abo abarikutuura omu byaro bya hare.

14. Ababuurizi b’Obukama bakaba baine kutunga kutendekwa ki, kandi n’eishomero ki eribahwereire kuba abeegyesa barungi?

¹⁴ Twaheza kureeba emwe aha miringo n’eby’okukoresa ebi tukoreise okujanjaaza amakuru marungi. Kandi shi, okutendeka oku tutungire? Nk’eky’okureeberaho, obumwe omuntu akaba ayanga ebi yaahurira omu mbazo eziri aha ntambi, nari obumwe akunda ebiri aha kaada y’okukoresa omu kubuurira. Obwo, omubuurizi akaba aine kumanya oku araatwarize omu bwengye ogwo owaayaanga, n’oku araayegyese omu bwengye abacureezi. Nathan H. Knorr arikuhwerwa omwoyo gwa Ruhanga akamanya ngu hariho ekyetengo ky’okutendeka abandi kukoresa ekiconco ky’okugamba omu kubuurira. Mbwenu shi hakakorwa ki? Omuri 1943 hakatandikwaho Eishomero ry’Obuheereza omu bibiina. Eishomero eryo rituhwereire kuba abeegyesa barungi.

15. (a) Bamwe bakeehurira bata obu baabaire nibaha embazo omu Ishomero ry’Obuheereza? (b) Oreebire ebigambo bya Yehova ebiri omu Zaaburi 32:8 birikuhikiirira bita?

¹⁵ Baingi kikabatwarira obwire kugamba omu maisho g’abantu. Julio S. Ramu akagamba aha rubazo rwe orw’okubanza oru yaahaire omuri 1944. Rukaba nirugamba ahari ki? Doeg, omushaija orikugambwaho omu mishororongo etaano yonka omu Baibuli! Julio akagira ati: “Amaju gangye gakaba nigahondana, engaro zangye zirikutetema, n’amaino gangye garikuhondana.” Julio naagira ngu akaba aine kwiha orubazo rwona omu mishororongo egyo etaano. Naagira ati: “Orubazo rwangye nkaruheera omu dakiika ishatu zonka. Ogwo nigwo gwabaire guri omurundi gwangye gw’okubanza kuza omu maisho g’abantu, kwonka tindarekyeire aho.” N’obu  kyabaire kitoorobi kuha orubazo omu maisho g’ekibiina, abaana bato n’abo bakeejumba omu ishomero eryo. Angelo Manera, owaaba yaagambirweho akagamba aha rubazo rw’okubanza orwahairwe omwojo muto owaabaire atandikire kwega omu ishomero. “Akagira obwoba bwingi munonga, ku yaagire kuha orubazo rwe yaatandika kurira. Kwonka ahabw’okugira ngu akaba amaririire kuruha, akagumizamu yaaruhendera naarira.” Nootiina kugarukamu, nari kwejumba omu nteerane z’ekibiina omu miringo endiijo ahabw’okugira enshoni nari obundi bweremwa? Shaba Yehova akuhwere kutatiina. Yehova naabaasa kukuhwera nk’oku yaahwereire abeegi b’omu Ishomero ry’Obuheereza erya ira.—Shoma Zaaburi 32:8.

16. (a) Eishomero rya Gileadi rikahikiiriza kigyendererwa ki ira (b) Kandi rihikiriize ki kuruga 2011?

¹⁶ Abaheereza ba Yehova tibarikutendekyerwa omu Ishomero ry’Obuheereza honka. Abamiisani n’abandi bagasiirwe munonga omu Ishomero rya Gileadi. Kurugiirira aha mutendeki omwe w’eishomero eryo, akagira ngu ekigyendererwa kyaryo “n’okuhwera abeegi kwongyera aha kyetengo kyabo ky’okwejumbira kimwe omu murimo gw’okubuurira.” Gileadi ekatandikaho omu 1943, kandi kuruga obwo abeegi abarikurenga 8,500 nibo batendekirwe. Abamiisani abatendekirwe omu ishomero eryo baheereize omu mahanga nka 170. Kuruga 2011, abarikwikirizibwa kurizamu n’abo bonka abari omu buheereza bw’omutaano nka baapayoniya ab’omutaano, abareeberezi abarikutaayaayira ebibiina, ababeseeli, n’abamiisani abatakagiire omu ishomero eryo.

17. Eishomero rya Gileadi rihwereire rita?

¹⁷ Okutendeka oku kuhwereire kuta? Teekateeka aha ky’okureeberaho eki. Omu Agusto 1949, omuri Japan hakaba harimu ababuurizi abatarikuhika ikumi. Omwaka ogwo gurikuza kuhendera, Abamiisani 13 abatendekiirwe omu Ishomero rya Gileadi bakaba nibabuurira n’obweziriki omu ihanga eryo. Hati, omuri Japan hariyo ababuurizi 216,000, kandi ebicweka nka 42 ahari igana eby’ababuurizi abo nibaheereza nka baapayoniya!

18. Ni mashomero ki agahwereire Abajurizi ba Yehova kwongyera kwetegyereza n’okukura omu by’Omwoyo?

¹⁸ Amashomero agandi, nk’Eishomero ry’Obuheereza bw’Obukama, Eishomero ry’Obuheereza Erya Baapayoniya, Eishomero ry’Ababuurizi b’Obukama, Eishomero ry’Abareeberezi Abarikutaayaayira Ebibiina n’Abakazi Baabo, n’Eishomero ry’Okutendeka ab’Akakiiko k’Eitaagi n’Abakazi Baabo, gahwereire abaheereza ba Yehova kwongyera aha kwetegyereza kwabo n’okutunguuka omu by’omwoyo. Hatariho kubanganisa, Omugabe naagumizamu kutendeka abashagiki be!

19. Charles Taze Russell akagamba ki aha murimo gw’okubuurira, kandi eki kihikiriire kita?

¹⁹ Hahingwireho emyaka erikurenga 100 kuruga obu Obukama bwa Ruhanga bwateebwaho. Omugabe waitu Yesu Kristo naagumizamu kututendeka. Charles Taze Russell atakafiire omu 1916, akagamba aha ku omurimo gw’okubuurira gwabaire nigwija kuhikiirizibwa. Akagambira munywani we w’ahamara ati: “Omurimo nigweyongyera ahonaaho, kandi niguza kweyongyerera kimwe, habw’okuba hariho omurimo ogushemereire kukorwa omu nsi yoona ogw’okubuurira ‘engiri y’Obukama.’” Ekitabo (Faith on the March, ekya A. H. Macmillan, rup. 69) Ka yaabaire ahikire! Kandi ka nikitureetera okushemererwa kureeba ngu Ruhanga w’obusingye naagumizamu kutubaasisa kukora omurimo mukuru ogu! Buzima, naatuha “ebirungi byona” ebi turikwetenga kubaasa kukora ebi arikukunda!