Niki ekyabaireho? Ahabw’enki Ruhanga atararwaniriire Abayudaaya, nk’oku yaabaire naakora ira? Nainga shi ahabw’enki atarabaikiriize kwejumba omu rutaro kubaasa kwebingaho abaabaire nibabanyangaraza? Tugire ngu shi oku Ruhanga yaabaire naareeba entaro kukahinduka? Ngaaha. Kwonka Abayudaaya nibo baabaire bahindukire. Bakanga kwikiriza omwana wa Ruhanga, Yesu, nka Mesia. (Ebyakozirwe 2:36) N’ahabw’ekyo, eihanga ryona bakafeerwa omukago gwabo ogw’omutaano na Ruhanga.—Matayo 23:37, 38.

Eihanga ry’Abayudaaya n’Ensi Eyaaraganisiibwe tibaragarukire kugira oburinzi bwa Ruhanga, nangwa n’entaro ezi baabaire beejumbamu akaba atazisiima nari kuzishagika. Nk’oku Yesu yaagambire, emigisha ei Ruhanga yaabaire naaha Abaisraeli ahabw’okubasiima ekaba ebaihirweho ehairwe eihanga risya ery’omwoyo, omu Baibuli eririkwetwa ‘Israeli ya Ruhanga.’ (Abagalatia 6:16; Matayo 21:43) Abakristaayo abashukirweho omwoyo gurikwera nibo boorekire ku bari Israeli y’omwoyo. Omu kyasha ky’okubanza bakagambirwa butunu bati: “Hati muri eihanga rya Ruhanga.”—1 Petero 2:9, 10.

Mbwenu shi obu Abakristaayo b’omu kyasha ky’okubanza baabaire bari “eihanga rya ruhanga,” akaba naabarwanirira, kugira ngu barugye omu mwaga gw’Abarooma? Nainga akaba naabaikiriza kurwanisa abazigu baabo? Ngaaha buzima. Ahabw’enki? Entaro ezi Ruhanga yaabaire aikiriza abantu be kwejumbamu, niwe yaabaire acwamu obu entaro ezo ziraabeho, nk’oku ekicweka eky’enyima zirikworeka. Ruhanga tararwaniriire Abakristaayo b’omu kyasha ky’okubanza entaro zaabo, kandi tarabaikiriize kwejumba n’omu ntaro z’ensi. Buzima, omu kyasha ky’okubanza bukaba butari bwire bwa Ruhanga bw’okurwanisa obubi n’omwaga.

N’ahabw’ekyo, nk’abaheereza ba Ruhanga aba ira, Abakristaayo omu kyasha ky’okubanza bakaba baine kutegyereza kuhitsya obu Ruhanga yaakumazireho obubi n’okunyangarara. Kwonka omu bunaku obwo, Ruhanga akaba atakabaikiriize kurwanisa abazigu baabo. Eki Yesu akakyoreka gye omu kwegyesa kwe. Nk’eky’okureeberaho, tarayegyeise abakuratsi be kwejumba omu ntaro, omu mwanya gw’ekyo akabagambira ati: “Mukunde abazigu baanyu, kandi mushabire n’abarikubahiiga.” (Matayo 5:44) Obu yaabagira ngu Yerusaalemu ekaba neeza kutaahirirwa amahe g’Abarooma omu kyasha ky’okubanza, akaragiira abeegi be kuhunga beitu kutari kugumaho bakarwana, kandi buzima bakahunga.—Luka 21:20, 21.

Okwongyera ahari ekyo, entumwa Paulo akahandiika ati: “Muteehoorera enzigu, . . . kikahandiikwa ngu: ‘Okuhoora enzigu n’okwangye; niinye ndizimuura nikwo,’ nikwo Mukama arikugira.” (Abarooma 12:19) Paulo akaba naajuriza ebi Ruhanga yaabaire yaagambire ebyasha bingi enyima ebiri omu  Abaleevi 19:18 n’omu Eky’Ebiragiro 32:35. Nk’oku kirikworekwa omu kicweka eky’enyima omuringo gumwe ogu Ruhanga yaabaire ahooreramu enzigu abantu be ira, n’okubaikiriza kutenga orutaro aha bazigu baabo. N’ahabw’ekyo, ebigambo bya Paulo nibyoreka ngu oku Ruhanga arikureeba entaro tikukahindukire. N’omu kyasha ky’okubanza, Ruhanga akaba naatwara entaro nk’omuringo guhikire ogw’okuhooreramu enzigu abantu be kumaraho okubonabona n’obubi. Kwonka, nk’oku kyabaire kiri ira, Ruhanga wenka niwe yaabaire acwamu obu orutaro ruraabeho n’abo abararwejumbemu.

Buzima, Ruhanga tarahaire Abakristaayo b’omu kyasha ky’okubanza obushoboorozi bw’okwejumba omu ntaro. Kandi shi obunaku obu? Hariho abantu abu Ruhanga ahaire obushoboorozi bw’okwejumba omu ntaro ebiro ebi? Nainga hati nibwo bwire bwa Ruhanga bw’okurwanirira abantu be? Kwonka shi Ruhanga naatwara ata entaro ebiro ebi? Ekicweka ekirikukurataho nikiza kugarukamu ebibuuzo ebi.