1. Omutwarize gwa Ruhanga ogurikukirayo ni guuha, kandi okumanya eki nikikureetera kwehurira ota?

EKIGAMBO kya Yehova Baibuli, nikitugambira ngu “Ruhanga aba rukundo.” Tikirikugira ngu rukundo n’omutwarize gwe kwonka, kureka ngu “Ruhanga aba rukundo.” (1 Yoh. 4:8) Ogu nigwo mutwarize gwe ogurikukirayo obukuru. Yehova taine rukundo kwonka, beitu we wenyine ni rukundo. Ka nikishemeza munonga kumanya ngu owaahangire eiguru n’ensi n’ebintu byona ebiine amagara, ni Ruhanga wa rukundo! Buri kimwe eki arikukora naakikora arikwihirira aha mutwarize ogu.

2. Rukundo ya Ruhanga neetuhamiza ki? (Reeba ekishushani aha kutandika.)

² Rukundo ei Ruhanga ainiire ebihangirwe bye neetuhamiza ngu ebigyendererwa bye byona ahabw’abantu nibiija kuhikiirira, kandi eki nikiija kugasira boona abarikushagika obutegyeki bwe. Nk’eky’okureeberaho, ahabwa rukundo “akataho ekiro eki aricweraho emanja z’ensi yoona omu kuhikiirira, naazicwisa Omuntu ou yaatooraine,” Yesu Kristo. (Byak. 17:31) Nitubaasa kuhamya  ngu eki nikiija kuhikiirira. Abo abaine emitima mirungi kandi abarikumworobera, okubacwera orubanja omu muringo murungi, nikiija kubarugiramu ebirungi eby’obutwire omu biro by’omumaisho.

3. Embeera zikaabaire nizishusha ki ku ogire ngu Ruhanga tainiire bantu rukundo?

³ Teekateeka oku embeera zaakubaire nizishusha ku ogire ngu Ruhanga tainiire bantu rukundo. Ensi egi ekaagumire eri omu mikono y’abantu abarikwebemberwa Sitaane Omuregi, ruhanga oine ekiniga kingi. (2 Kor. 4:4; 1 Yoh. 5:19; shoma Okushuuruurwa 12:9, 12.) Ruhanga ku atainiire abantu rukundo, ebiro by’omumaisho bikaabaire nibiija kuba bibi munonga.

4. Ahabw’enki Yehova akirekireho abaagomiire obutegyeki bwe?

⁴ Omuregi ku yaagomiire obutegyeki bwa Yehova, akareetera n’abantu babiri ab’okubanza kugoma. Akahakanisa okuhikiirira kwa Ruhanga n’obushoboorozi bwe bw’okutegyeka byona. Sitaane omu kukora ekyo, akaba ari nk’orikugira ngu obutegyeki bwe nibuhita obw’Omuhangi. (Kut. 3:1-5) N’obu Yehova araabe arekire Sitaane kworeka emitegyekyere ye, ekyo tikiri ky’obutwire. Yehova, omu bwengye bwe bwingi, arekire obwire burikumara kuhinguraho kworeka gye ngu obutegyeki bwona obutari obwe, tiburikubaasa kurugamu karungi koona. Ebyafaayo bibi ebi abantu batwire nibarabamu, nibyoreka ngu abantu nari Sitaane tibarikubaasa kutegyeka kandi bakahikiiriza ebyetengo by’abantu.

5. Ebyafaayo by’abantu byorekire buhame ki?

⁵ Emyaka nka 100 enyima, abantu abarikurenga obukaikuru 100 nibo bafeereire omu ntaro z’amahanga. Ebiro ebi, embeera omu nsi nizeeyongyera kuba mbi. Ekigambo kya Ruhanga kikagira ngu eki nikyo kyakubaireho ‘omu biro by’emperu’ eby’ensi egi obu “abantu babi, abarikwegira oku batari,” baakubaire nibeeyongyerera kimwe kuba babi. (2 Tim. 3:1, 13) Ebyafaayo nibyorekyera kimwe amazima ga Baibuli agarikugira ngu Ai Yehova, “nimmanya ngu omuhanda gw’omuntu tiguba mu bushoboorozi bwe, kandi omuntu weena ogyenda tabaasa kwehabura mu rugyendo rwe ahu yaahika hoona.” (Yer. 10:23) Eego buzima, Yehova tarahangire bantu baine obushoboorozi bw’okwehabura beetongoire ahariwe.

6. Ruhanga arekire obubi kugumaho kumara obwire ahabwa kigyendererwa ki?

⁶ Oyihireho okugira ngu obutegyeki bw’abantu tiburimu karungi, Ruhanga arekireho obubi kumara obwire ahabw’ekindi kigyendererwa. Nikyeyoreka gye ngu obutegyeki bwa Ruhanga nibwo bwonka oburikubaasa kusingura. Yehova ku araiheho obubi n’abo abarikubureeta, ku harigira owaagaruka kuhakanisa omuringo murungi ogu arikutegyekamu, tarigaruka kureka okuhakanisa nk’okwo kugumaho. Naija kwihirira aha byafaayo by’abantu kucwekyereza abagomi nk’abo ahonaaho, atarikwenda ngu bagarukye bareeteho obubi bwabo.

7, 8. Ni miringo ki emwe ei Yehova ayorekiremu rukundo ye?

⁷ Yehova ayorekire rukundo ye omu miringo mingi. Nk’eky’okureeberaho, teekateeka aha burungi n’obuhango bw’eiguru n’ensi. Hariho ebizinga bingi, kandi buri kimwe kirimu obuhumbi bw’enyonyoozi. Omu kizinga eki turimu, emwe aha nyonyoozi ezirimu n’eizooba, kandi ku ogire ngu eizooba tiririho, omu nsi ti hakubairemu bintu ebiine amagara. Ebihangirwe ebi byona nibyoreka obwaruhanga bwa Yehova n’emitwarize ye, amaani ge, obwengye bwe, na rukundo ye. Buzima, emitwarize ‘ya  Ruhanga etarikureebwa, eby’obushoboorozi bwe obutahwaho, n’obwaruhanga bwe, nibireebekyera kimwe, nibimanyirwa aha bi yaahangire.’—Rom. 1:20.

⁸ Yehova akahanga buri kimwe omu nsi kugasira ebyahangirwe bye ebyatebeekanisiibwe kutuura omu nsi. Akakorera abantu omusiri murungi munonga niyo paradiso, yaabaha emibiri n’ebiteekateeko ebihikiriire kubaasa kutuuraho ebiro byona. (Shoma Okushuuruurwa 4:11.) Kandi, naaha eby’okurya “ebiine omubiri byona, ahakuba embabazi ze n’ezebiro byona.”—Zab. 136:25.

9. Oyihireho okugira ngu Yehova aine rukundo, emitwarize ye neemureetera kukora ki, kandi n’ahabw’enki?

⁹ N’obu Yehova araabe ari Ruhanga owa rukundo, kwonka naayanga ebibi. Nk’eky’okureeberaho, Zaaburi 5:4-6 harikugamba ahari Yehova nihagira hati: “Tori Ruhanga orikushemererwa obubi . . . Oyanga boona abakora ebibi.” Kandi nihongyera hagira ngu Yehova naayangira “kimwe omwitsi w’abantu n’engobya.”

10, 11. (a) Yehova naija kukorera ki abantu ababi? (b) Yehova naija kuha migisha ki abantu abarungi?

¹⁰ Ahabw’okugira ngu Yehova ni Ruhanga wa rukundo kandi naayanga obubi, naija kwihiraho kimwe obubi omu nsi yoona. Ekigambo kya Ruhanga nikiraganisa kiti: “Mumanye ngu ababi baryacwekyerezibwa; kwonka abategyereza MUKAMA baryahungura ensi. Bwanyima y’akaanya kakye omubi aryaba atakiriho . . . Abazigu ba MUKAMA baryaba nk’obunyaatsi burungi obw’omu iriisizo; baryahwerekyerera, bahweho nk’omwika.”—Zab. 37:9, 10, 20.

¹¹ Kwonka kandi Ekigambo kya Ruhanga nikiraganisa kiti: “Abahikiriire baryahungura ensi, bagituuremu ebiro byona.” (Zab. 37:29) Abahikiriire nibaija ‘kwesiima ahabw’okugira obusingye bwingi.’ (Zab. 37:11) Eki nikiija kuhikiirira ahabw’okuba Ruhanga waitu owa rukundo butoosha naakora ebirikugasira abaheereza be abeesigwa. Baibuli neegira eti: “Aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.” (Kush. 21:4) Boona abarikusiima Yehova ahabwa rukundo ye, kandi bakoorobera obutegyeki bwe ka nibaija kugira ebiro birungi by’omumaisho!

12. N’oha orikubaasa kwetwa “omuntu oshugaine”?

¹² Ekigambo kya Yehova nikitugira kiti: “Yetegyereze omuntu oshugaine, kandi oreebe ow’amazima; ahakuba omuheru gw’omuntu ogwo n’obusingye; kwonka abasiisi baryahwerekyererezibwa kimwe, kandi omuheru gw’omubi n’okucwekyerezibwa.” (Zab. 37:37, 38) “Omuntu oshugaine” naamanya Yehova n’Omwana we kandi akora ebi Yehova arikukunda. (Shoma Yohaana 17:3.) Omuntu nk’ogwo ebigambo ebiri omu 1 Yohaana 2:17 naabitwara nka bikuru. Nibigira biti: “Ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.” Obu emperu y’ensi egi eri haihi, ni kikuru ngu tute amatsiko gaitu omuri Yehova tugume “omu muhanda gwe.”—Zab. 37:34.

13. Yehova ayorekire ata abasiisi rukundo mpango?

¹³ N’obu turaabe tutahikiriire, nitubaasa ‘kuguma omu muhanda gwa Yehova.’ Nitubaasa n’okuguma twine omukago murungi na Yehova, ahabw’ekikorwa kye ekya rukundo mpango. Akahayo ekitambo kya Yesu Kristo, kugira ngu abantu abeesigwa  babaase kutunga amatsiko g’okuruga omu kibi n’okufa ebi baahungwire ahari Adamu. (Shoma Abarooma 5:12; 6:23.) Yehova akaba naayesiga Omwana we omwe nyamunegyere, owaabaire ari omwesigwa omu iguru kumara emyaka etarikubarwa. Ruhanga nk’omuzaire owa rukundo, hatariho kubanganisa akashaasha munonga ahabw’omuringo mubi ogu baatwariizemu Yesu omu nsi. Kwonka, Yesu akooreka ngu Ruhanga niwe ahikire kutegyeka byona kandi ngu omuntu ohikiriire naabaasa kuguma ari omwesigwa ahari Yehova n’omu mbeera ezigumire munonga.

14, 15. Okufa kwa Yesu kukabaasisa ki kubaho?

¹⁴ Yesu akarinda obwesigwa omu mbeera ezigumire, kandi yaayoreka ngu Yehova niwe ahikire kutegyeka, yaahika aha kufa ari omuheereza wa Ishe omwesigwa. Ka nikitushemeza munonga ahabw’okugira ngu Yesu akafa yaashashura omuhendo gw’ekitambo kucungura abantu ngu batungye amatsiko g’amagara agatahwaho omu nsi ensya erikuraganisibwa! Entumwa Paulo akooreka ngu Yehova na Yesu bakatugirira rukundo arikugira ati: “Ku twabaire tukiri enshoberwa, omu bunaku buhikire Kristo yaafeera abatatiina Ruhanga. Nimumanya ku kigumire omuntu kufeera ohikiriire; nangwa shana akaayemera kufeera ow’emicwe mirungi; kwonka Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.”  (Rom. 5:6-8) Entumwa Yohaana akahandiika ati: “Omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere, ngu tube abahuriire ahabwe. Omuri eki nimwo okukunda kuri; tiitwe twakunzire Ruhanga, kureka niwe yaatukunzire, akatuma omwana we kuba ekarabo ahabw’ebibi byaitu.”—1 Yoh. 4:9, 10.

¹⁵ Aha bikwatiraine na rukundo ya Ruhanga ahabw’abantu, Yesu akagira ati: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yoh. 3:16) Ruhanga ainiire abantu rukundo mpango ahabw’okugira ngu tihariho kirungi eki arikubaasa kubiima n’obu kyakuba kiri eky’omuhendo kita. Rukundo ye terikubaasa kuhwaho. Butoosha nitwija kubaasa kugyesiga. Paulo akahandiika ati: “Nimmanyira kimwe ngu okufa, n’obu gaakuba amagara, nari baamaraika, nari abarikutegyeka, nari ebiriho, nari ebiribaho, nari ab’obushoboorozi, nari oburaingwa obwa bwemi nari oburaingwa obw’okuzimu, n’obu kyakuba ekindi kintu kyona ekihangirwe, tihaine kiribaasa kututaanisa n’okukunda kwa Ruhanga okuri omuri Kristo Yesu Mukama waitu.”—Rom. 8:38, 39.

16. Obukama bwa Ruhanga niki, kandi n’oha ou Ruhanga atooraine kutegyeka?

¹⁶ Rukundo ei Ruhanga ainiire abantu nereebekyera aha ntebeekanisa y’Obukama oburikutegyekwa Mesia. Yehova yaaherize kuta gavumenti egi omu mikono y’Omwana we, orikukunda abantu kandi ohikire gye kutegyeka. (Enf. 8:31) Abantu 144,000 abarikuza kutegyeka na Yesu ku barikuzooka nibaza omu iguru barikwetegyereza gye embeera z’abantu. (Kush. 14:1) Obukama nigwo gwabaire guri omutwe mukuru omu kwegyesa kwa Yesu, kandi akeegyesa abeegi be kushaba bati: “Tataitwe ow’omu iguru, eiziina ryawe ryezibwe, Obukama bwawe bwije; eby’okunda bikorwe omu nsi nk’oku bikorwa omu iguru.” (Mat. 6:9, 10) Okuhikiirira kw’okushaba okwo ka nikwija kureetera abantu emigisha mingi!

17. Gyeragyeranisa obutegyeki bwa Yesu n’obw’abantu abasiisi.

¹⁷ Ka hariho entaaniso mpango ahagati y’obutegyeki bwa Yesu n’obw’abantu obureeteire baingi kufeera omu ntaro! Yesu buzima naafayo aha bu arikutegyeka, kandi naayoreka emitwarize nk’eya Ruhanga, na munonga rukundo. (Kush. 7:10, 16, 17) Yesu akagira ati: “Imwe mwena abaruhire n’abaremereirwe, mwije ahariinye, mbaruhuure. Mwekorere omugamba gwangye, muunyegyereho; ahabw’okuba nintwaza gye, kandi ndi omucureezi omu mutima; naimwe muryatunga okuhuumura omu mitima yaanyu, ahakuba omugamba gwangye tigurikuremeera, n’omutwaro gwangye gwanguhi.” (Mat. 11:28-30) Okwo ka n’okuraganisa kwa rukundo!

18. (a) Obukama bwa Ruhanga butwire nibukora ki kwiha bwateebwaho? (b) Nituza kugaaniira ahari ki omu kicweka ekirikukurataho?

¹⁸ Obunabi bwa Baibuli nibworeka ngu Obukama bwa Ruhanga obw’omu iguru bukateebwaho obu okubaho kwa Kristo kwatandika omuri 1914. Kuruga obwo, abo abaraategyeke na Yesu batwire nibarundanwa otwariiremu ‘n’omutwe muhango gw’abantu’ abarikwija kuhonokaho ensi egi embi yaaba neecwekyerezibwa reero bakaza omu nsi ensya. (Kush. 7:9, 13, 14) Omutwe muhango gw’abantu nibaingana ki? Ab’omutwe omuhango niki eki baine kukora? Ekicweka ekirikukurataho nikiija kugarukamu ebibuuzo ebi.