1, 2. (a) Abazaire abamwe nibeerarikirira ki abaana baabo ku barikuba emishogoyo? (b) Abakristaayo emishogoyo nibabaasa kutunguuka bata omu by’omwoyo?

KIMWE aha bintu ebirikureetera abazaire Abakristaayo okushemererwa kwingi n’okureeba abaana baabo barikubatizibwa. Berenice ou abaana be baabatiziibwe batakahikize emyaka 14, naagira ati: “Ekyabaireho kikakwata aha nyehurira zaitu. Tukaba tushemereirwe ahabw’okugira ngu abaana baitu bakaba nibenda kuheereza Yehova. Kwonka nabwo tukaba nitumanya ngu nibaija kuhikwaho embeera zigumire.” Naiwe noobaasa kwerarikirira aha mbeera ya mutabani waawe nari muhara waawe yaaba ari omushogoyo nari ari haihi kuba omushogoyo.

² Omuhangu aha miteekateekyere y’abaana naagira ngu emyaka y’obushogoyo neebaasa kugumira abazaire n’abaana baabo, kwonka abazaire tibashemereire kuteekateeka ngu emishogoyo nibaba nibatwaza nk’abagwiraro nari abaana bato. Kureka omu bwire obu nibwo barikugira enyehurira z’amaani, barikuhurira barikwenda kuba na banywani baabo, kandi bakagira n’oburyo by’okukora ebintu. Abaana baawe baaba bari omu myaka y’obushogoyo, nibabaasa kugira  omukago murungi na Yehova bateho ebigyendererwa by’okuheereza, beecweremu kwehayo ahari Yehova kandi bahikiirize okwehayo kwabo. Emyaka y’obushogoyo neebaasa kubabeera mirungi y’okutunguuka omu by’omwoyo, nk’oku Yesu yaakozire obu yaabaire akiri omunyeeto. (Shoma Luka 2:52.) Abazaire nimubaasa kuhwera muta abaana baanyu baaba bari omu myaka egyo? Yetegyereze oku Yesu yaayorekire rukundo, obucureezi, n’okwetegyereza ku yaakuzire. Emitwarize egi neebaasa kukuhwera eta kutendeka omwana waawe omushogoyo?

3. Ahabw’enki Yesu yaayetsire abeegi be banywani be?

³ Yesu akaba aine rukundo kandi arikurinda emikago. (Shoma Yohaana 15:15.) Omu bunaku bw’okuhandiikwa kwa Baibuli, mukama w’abahuuku akaba atabagambira ebihama bye nari oku arikwehurira. Kwonka, Yesu akaba ari munywani w’entumwa ze n’obu araabe yaabaire ari mukama waabo. Akaba agira obwire bw’okuba nabo, abagambira oku arikwehurira, kandi ahurikiza gye baaba nibamugambira ebibari aha mutima. (Mak. 6:30-32) Yesu okugaaniira n’abeegi be omu muringo gwa rukundo kikabahwera kugira omukago murungi nawe kandi kyabahwera kwetebeekanisiza obuheereza bwa Ruhanga omu biro by’omumaisho.

4. Noobaasa kunywana ota omwana waawe kandi okaguma n’obujunaanizibwa bwawe nk’omuzaire? (Reeba ekishushani aha kutandika.)

⁴ Michael ishe w’abaana babiri naagira ati: “Itwe abazaire n’obu turaabe tutarikubaasa kuba orwingano rw’abaana baitu, nitubaasa kuba banywani baabo.” Abanywani nibakira kuba bari hamwe. Shaba Ruhanga kandi ohindahindure omu ntebeekanisa y’emirimo yaawe kugira ngu otungye obwire bw’okuba n’abaana baawe oburikumara. Kandi abanywani nibaba nibakunda ebirikushushana. N’ahabw’ekyo, teeraho kukunda ebintu ebi omwana waawe omushogoyo arikukunda, nk’ebyeshongoro, vidiyo, nari emizaano. Ilaria, orikutuura omuri Italy, naagira ati: “Abazaire bangye bakaba nibafayo kumanya ebyeshongoro ebi naabaire nimpurikiza. Buzima tata akaba munywani wangye ow’ahamara, kandi nkaba ntarikutiina kumugambira nangwa n’enshonga eziine kukwatwa n’obwegyendesereza.” Waaba munywani w’omwana waawe kandi okamuhwera kuba munywani wa Yehova, nooba otaayehuzya obujunaanizibwa bwawe nk’omuzaire. (Zab. 25:14) Okutaana n’ekyo, nooyoreka ngu noomukunda, noomuha ekitiinisa, kandi nooba oyorobi kuhikwaho. Kandi naabaasa kukugambira ebirikumwerarikiriza.

5. Yesu akahwera ata abeegi be kutunga okushemererwa okurikuruga omu kuheereza Yehova n’obweziriki?

⁵ Yesu akaba naayenda ngu abeegi be abeesigwa kandi banywani be, batungye okushemererwa okurikuruga omu kwejumbira kimwe omu kuheereza Yehova. N’ahabw’ekyo, akaba naayenda ngu babe abeeziriki omu kwejumba omu by’omwoyo. Buzima, Yesu akaba naayenda ngu bagire ekihika ky’okuhindura abantu abeegi! Kandi omu muringo gwa rukundo akahamiza abeegi be ngu akaba naija kubahwera kusingura.—Mat. 28:19, 20.

6, 7. Ahabw’enki ni kirungi abazaire kuteeraho abaana baabo entebeekanisa nungi y’eby’omwoyo?

⁶ Buzima nooyenda ngu abaana baawe bagume bari gye omu by’omwoyo. Kandi Ruhanga naayenda ngu abaana baawe obahane kandi obatendekye orikubatamu emiteekateekyere ya Yehova. (Efe. 6:4) N’ahabw’ekyo, obu Ruhanga niwe akuhaire obujunaanizibwa obu, taho entebeekanisa y’eby’omwoyo kandi ogihamireho. Nk’eky’okureeberaho, nooyehanangiriza abaana baawe ngu baine kwega ahabw’okuba noomanya ngu obwegyese ni kikuru kandi nooteeraho kubakundisa okwega. Nikyo kimwe n’abazaire abanyabwengye nibeehanangiriza abaana baabo kugasirwa omu kutendeka oku Yehova arikubaha kurabira omu nteerane z’ekibiina n’entebeekanisa ezindi  ez’eby’omwoyo. Obu okutunga obwegyese kuruga ahari Ruhanga kiri kikuru, teeraho kuhwera abaana baawe kukunda eby’omwoyo n’okusiima obwengye bwa Ruhanga. (Enf. 24:14) Nk’oku Yesu yaahwereire abeegi be, hwera abaana baawe emishogoyo kuba abasinguzi omu kubuurira, orikubakundisa okwegyesa abandi ebiri omu Kigambo kya Ruhanga, n’okukunda kubuurira.

⁷ Okwejumba omu by’omwoyo butoosha nikihwera kita emishogoyo? Erin, orikutuura omuri South Africa, naagira ati: “Itwe abaana tukaba twetomboita aha bikwatiraine n’okwega Baibuli, enteerane, n’okubuurira. Obumwe tukaba tuteganisa nkana kugira ngu tubaase kuruga omu kwega kw’eka. Kwonka abazaire baitu bakahamira aha nshonga.” Naayongyeraho ati: “Okutendeka okwo kukampwera kugira okugumisiriza. Entebeekanisa yangye y’eby’omwoyo ku erikuteganisibwa, ninteeraho ahonaaho kugaruka kugitereeza. Tindikuhamya ngu nkaba ninyija kugira ekihika nk’ekyo ku ogire ngu abazaire baitu tibarahamiire aha ntebeekanisa yaitu ey’eby’omwoyo. Ku ogire ngu tibarahamiire aha nshonga, hatariho kubanganisa hati kikaabaire nikinyorobera kwosha enteerane nari entebeekanisa ezindi ez’eby’omwoyo.”

8. (a) Yesu akooreka ata ngu naamanya obugarukiro bwe? (b) Obucureezi bwa Yesu bukakwata buta aha beegi be?

⁸ N’obu Yesu araabe yaabaire ahikiriire, akeecureeza yaamanya obugarukiro bwe kandi yaayesiga Yehova. (Shoma Yohaana 5:19.) Mbwenu shi obucureezi bwe bukatuubya ekitiinisa eki baabaire nibamuha? Ngaaha buzima. Ku yaabaire ayeyongyera kwesiga Yehova, n’abeegi be bakaba beeyongyera kumwesiga. Bwanyima, bakatooreza obucureezi bwe.—Byak. 3:12, 13, 16.

9. Waikiriza enshobe zaawe n’obweremwa bwawe, nikibaasa kukwata kita aha baana baawe emishogoyo?

⁹ Twine obweremwa bwingi, kandi okutashushana na Yesu itwe tituhikiriire kandi nitukora enshobe. Omu bucureezi manya obweremwa bwawe kandi oikirize enshobe zaawe. (1 Yoh. 1:8) Mbwenu shi iwe n’oha ou orikubaasa kuha ekitiinisa kingi? Ni Mukama waawe orikwikiriza enshobe ze nari ogwo otarikushaba kusaasirwa yaakora enshobe? Omwana waawe yaahurira orikushaba okusaasirwa ahabw’enshobe zaawe, naayeyongyera kukuha ekitiinisa. Nawe naabaasa kwega kwikiriza enshobe ze. Rosemary oine abaana bashatu emishogoyo naagira ati: “Tukaba twikiriza enshobe zaitu, kandi ekyo kikahiga abaana baitu kutugambira ebiri aha mitima yaabo baaba baine oburemeezi. Tukaba nitumanya obweremwa bwaitu, n’ahabw’ekyo tukaba twegyesa abaana baitu oku barikubaasa kushoboorora oburemeezi bwabo. Ku baabaire benda obuhwezi, tukaba tubagambira kucondooza omu bitabo ebirikushoboorora aha Baibuli, kandi tukaba tushaba nabo.”

10. Yesu akooreka ata obucureezi arikuha abakuratsi be ebiragiro?

¹⁰ Yesu akaba aine obushoboorozi bw’okuragiira abeegi be. Kwonka, omu bucureezi akaba abaha enshonga ahabw’enki yaabaragiire. Nk’eky’okureeberaho, taragambiire bakuratsi be kusherura Obukama bwa Ruhanga n’okuhikiirira kwa Ruhanga kwonka, beitu akoongyeraho ati: “N’ebyo byona muryabyongyerwaho.” Yesu bwanyima y’okugira ngu “mutaricwa orubanja,” akaha enshonga egi: “Nyentsya naimwe mutarirucwerwa. Ahabw’okuba orubanja oru mucwa, naimwe muryarucwerwa.”—Mat. 6:31–7:2.

11. Ahabw’enki abazaire baine kushoboorora ekyabareetera kuha ekiragiro nari kugira eki baacwamu?

¹¹ Kyaba nikibaasika, shoboorora enshonga ahabw’enki waaha ekiragiro nari ahabw’enki waacwamu otyo. Omwana omushogoyo yaayetegyereza emiteekateekyere yaawe aha nshonga, naabaasa kukworobera aihire aha mutima. Barry, owaayoroire abaana bana naagira ati: “Okuha enshonga nikihwera emishogoyo kukwesiga  ahabw’okuba nibareeba ngu ebi orikucwamu ti maremesa kureka n’eby’oburyo.” Omwana omushogoyo naaba ariyo naakura kuba omuntu mukuru orikukoresa obushoboorozi bwe obw’okuteekateeka. Barry naashoboorora ati: “Emishogoyo baine kwega kucwamu gye barikubanza kuteekateeka aha kintu omu mwanya gw’okwihirira aha nyehurira.” (Zab. 119:34) Omu bucureezi waaha enshonga, omwana waawe omushogoyo naakireeba ngu noomutwara nk’omuntu mukuru, kandi nawe naayega kucwamu arikukoresa obushoboorozi bwe bw’okuteekateeka.

12. Yesu akakoresa ata okwetegyereza arikuhwera Petero?

¹² Yesu akooreka obwengye n’okwetegyereza arikuhwera abeegi be. Nk’eky’okureeberaho, entumwa Petero akaba aine enshonga nungi obu yaagira ngu Yesu tarikwija kwitwa. Kwonka, Yesu akaba naamanya ngu ebigambo bya Petero nibyoreka emiteekateekyere etahikire. Yesu kubaasa kuhwera Petero n’abeegi be abandi, akabahana butunu, yaabooreka ebirikubaasa kuruga omu kwesaasira, n’emigisha erikuruga omu kugira omutima gw’okwefeerereza. (Mat. 16:21-27) Petero akeega eishomo rikuru.—1 Pet. 2:20, 21.

13, 14. (a) Niki ekirikubaasa kworeka ngu okwikiriza kw’omwana waawe kuriyo nikutuuba? (b) Noobaasa kukoresa ota obwengye n’okwetegyereza kuhwera omwana waawe omushogoyo?

¹³ Shaba Yehova kukuha okwetegyereza kugira ngu omanye ahu omushogoyo arikwetenga obuhwezi. (Zab. 32:8) Nk’eky’okureeberaho, niki ekirikubaasa kworeka ngu okwikiriza kw’omwana waawe kutuubire? Obundi nooreeba ngu takishemererwa nka butoosha, naagamba kubi aha baikiriza bagyenzi be, nari takikugambira ebirikumukwataho. Otakaarahuka kucwamu ngu obu n’obumanyiso oburikworeka ngu naakora ebibi bwesherekye. * Kwonka, otakayehuzya obumanyiso obwo, nari okeehuzya okwetaanisa kwe aha bandi.

¹⁴ Nka Yesu, buuza ebibuuzo by’embabazi kandi ebirikuhaisa ekitiinisa. Nk’oku okutibika endobo omu iziba kutaha amaizi orikurahukiiriza kirikureetera amaizi agamwe kwatika, okutwariza omwana waawe kifuba nikibaasa kukuremesa kumanya ebi arikuteekateeka n’ebigyendererwa  bye. (Shoma Enfumu 20:5.) Ilaria, owaaba yaagambirweho, naagira ati: “Omu myaka yangye y’obushogoyo, nkaba ndi omu mazima kandi obwo ndikumara obwire bwingi n’abaana abu ndikushoma nabo. Embeera egi ekakwata aha nyehurira yangye, kandi abazaire bangye bakakimanya. Omwabazyo gumwe, bakagamba bugamba ngu nibareeba ntari gye, kandi baambuuza oburemeezi obu naabaire nyine. Nkabaruka naarira, naashoboorora embeera eyaabaire eriho, kandi naabashaba obuhwezi. Bakangwa omu kifuba, bangira ngu baanyetegyereza, kandi baandaganisa kumpwera.” Abazaire ba Ilaria ahonaaho bakatandika kumuhwera kugira emikago mirungi omu kibiina.

15. Ha eky’okureeberaho kworeka oku Yesu yaabaire akoresa okwetegyereza.

¹⁵ Yesu nawe akakoresa okwetegyereza kumanya ahu abeegi be baabaire nibakora gye n’ahu baabaire nibeetenga obuhwezi. Nk’eky’okureeberaho, omushaija orikwetwa Nasanaeli ku yaahuriire ngu Yesu aizire omuri Nazareesi, akagira ati: “Omuri Nazareesi nihabaasa kurugamu ekintu kirungi?” (Yoh. 1:46) Kurugiirira aha bigambo ebyo, okaba noobaasa kureeba Nasanaeli nka muntu wa muringo ki? Orikucwera abandi orubanja? Orikushoroora omu bantu? Nari otaine kwikiriza? Yesu akakoresa okwetegyereza yaareeba ebirungi omuri Nasanaeli. Yesu akamweta “Omwisraeli kashushu, otaine buryarya!” (Yoh. 1:47) Yesu akaba naabaasa kucaaka emitima, kandi akakoresa okubaasa okwo kureeba ebirungi omu bandi.

16. Noobaasa kuhwera ota omwana waawe omushogoyo kugira emitwarize mirungi?

¹⁶ Torikubaasa kumanya ebiri omu mitima y’abandi, kwonka Ruhanga naabaasa kukuhwera kukoresa okwetegyereza. Noija kukoresa okwetegyereza okwo kusherura ebirungi omu mwana waawe omushogoyo? Tihaine orikwenda kwetwa omutabuzi w’obusingye. Omu biteekateeko n’omu bigambo, toshemereire kweta muhara waawe nari mutabani waawe “omwana omugomi” nari “omwana ekihanda.” N’obu omwana waawe yaakuba atarikukora gye, muhwere kukimanya ngu nooreeba okubaasa kwe n’ekyetengo kye ky’okukora ekihikire. Yetegyereze obumanyiso oburikworeka ngu naakura kandi naatunguuka, reero omusiime. Muhwere kugira emitwarize mirungi orikuguma noomwongyera obujunaanizibwa kyaba nikibaasika. Okwo nikwo Yesu yaatwariize atyo abeegi be. Bwanyima y’omwaka nka gumwe n’ekicweka Yesu aherize kubugana Nasanaeli (kandi orikwetwa Batolomaayo), Yesu akamutoorana kuba entumwa ye, kandi Nasanaeli akaba Omukristaayo omweziriki. (Luk. 6:13, 14; Byak. 1:13, 14) Okuhiga omwana waawe kandi okamusiima nikiija kumuhwera kumanya ngu n’Omukristaayo ou Yehova arikubaasa kukoresa, beitu atari ogwo orikuremwa buri kaanya.

17, 18. Waagumizamu noohwera abaana baawe emishogoyo kuheereza Yehova nihabaasa kurugamu ki?

¹⁷ Waaba nooyorora abaana baawe, obumwe noobaasa kwehurira nk’oku entumwa Paulo yaayehuriire, owaabaire aine abaana baingi omu by’omwoyo. Ahabwa rukundo ei yaabaire ainiire abaana be b’omwoyo omuri Korinso, akagira ‘enaku n’obusaasi bwingi omu mutima’ arikuteekateeka ngu bamwe nibabaasa kutaguma mu mazima. (2 Kor. 2:4; 1 Kor. 4:15) Victor, owaayoroire abatabani babiri n’omuhara omwe, naagira ati: “Emyaka y’obushogoyo ekaba etoorobi. Kwonka, ebirungi ebi twatungire bikaba nibikira oburemeezi. Turikuhwerwa Yehova, tukagira omukago murungi n’abaana baitu.”

¹⁸ Gumizamu nookora n’amaani kutendeka abaana baawe kuheereza Yehova. Waabooreka ngu noobakunda munonga, noija kutunga okushemererwa kwingi ahabw’okubareeba nibaija omu mazima, kandi bakagumizamu “nibagyendera omu mazima.”—3 Yoh. 4.