Nkazaarirwa omu kyaro kya Saxony, omu ihanga eryabaire niryetwa German Democratic Republic (GDR) obwire obwo. Nkakurira omu ka ya rukundo, kandi abazaire bangye bakanyegyesa emicwe mirungi. Eihanga ryaitu rikaba niritegyekwa Abakomunisiti, n’ahabw’ekyo abantu baingi omuri Saxony, bakaba batarikutwara ediini nka kikuru. Kandi nyowe nkaba niimanya ngu Ruhanga tariho. Emyaka 18 ei naabaire nyine nkaba niinyikiririza omu by’obutegyeki kandi ngu Ruhanga tariho.

Ahabw’enki obutegyeki bw’Abakomunisiti bwanshemeize? Nkashemezibwa ekiteekateeko ekirikugira ngu abantu boona nibaingana. Kandi, nkaba niinyikiriza ngu ebintu biine kubaganwa omu buringaaniza, obu eki kirikubaasa kwihaho obugaiga oburengyesereize nari obworo oburengyesereize. N’ahabw’ekyo nkaza omu kigombe ky’eminyeeto eky’Abakomunisiti. Obu naabaire nyine emyaka 14, nkamara obwire buraingwa ndikukora kuboneza ensi ndikugarura busya empapura ezaakoresiibwe. Akakiiko k’orurembo rwaitu kakashemezibwa okuteeraho kwangye reero ab’obushoboorozi baampa ekiconco. N’obu ndaabe naabaire nkiri muto, nkabaasa kumanya ab’eby’obutegyeki ab’ahaiguru. Nkaba nindeeba ngu nyine ebigyendererwa bihikire na nyentsya nungi.

Bwanyima ebyangye bikashoba. Omuri 1989 ekisiika kya Berlin kikaihwaho hamwe n’obutegyeki bw’Abakomunisiti omu burugwa izooba bwa Europe. Hakabaho obugwe bukurataine. Bwanyima nketegyereza ngu obutari buringaaniza bukaba bwijwire omu butegyeki bw’Abakomunisiti. Nk’eky’okureeberaho, abantu abaabaire batarikushagika Abakomunisiti bakaba nibitwarwa nk’abatuuzi ab’orurengo rwa kabiri. Eki kikaba nikibaasika kita, kandi obwo Abakomunisiti baabaire nibaikiriza ngu abantu boona nibaingana? Mbwenu shi obutegyeki bw’Abakomunisiti bukaba butaine muhoho? Nkarengwa amaganya.

Nkahindura ebi naabaire ninyebembeza naata omutima aha kweshongora n’okuhuuga ebishushani. Ahabw’okugira ngu nkaba naayegireho eby’okweshongora, nkaba nyine ekigyendererwa ky’okugumizamu kuza aha yunivasite, nkaba nyine ekirooto ky’okuba omweshongozi, kandi omuhuugi w’ebishushani. Kandi, emicwe mirungi ei naayegire nkiri muto yoona nkagikwatsa aha rubaju. Hati eki naabaire nintwara nka kikuru n’okweshemeza, ekyabaire nikitwariramu okuriima abaishiki baingi omurundi gumwe. Kwonka okweshongora n’okuhuuga ebishushani tibirabaasize kumaraho amaganya gangye. Nangwa n’ebishushani ebi naabaire nimpuuga bikaba nibyoreka okuba ekinyabwoba. Niki ekyabaire nikiija kubaho omu biro by’omumaisho? Ekigyendererwa ky’okubaho ni kiiha?

Ku naarugireho nkatunga eby’okugarukamu ebi naabaire ninsherura, nkashemererwa munonga. Omwabazyo gumwe ndi ah’eishomero nkatandika kugaaniira n’abeegi bagyenzi bangye aha biro by’omumaisho. Mandy * akaba ari omwegi kandi omwe aha Bajurizi ba Yehova. Omwabazyo ogwo akanyoreka omuhanda oguhikire. Akanyeta ati: “Andreas, ku oraabe nooyenda kutunga eby’okugarukamu by’ebibuuzo byawe ebirikukwata aha magara n’ebiro by’omumaisho, teeraho kushwijuma gye Baibuli.”

Nkagiramu okubangaanisa n’ekihika ky’okwenda kumanya, kwonka okwenda kumanya nikwo kwabaire kuri kwingi. Mandy akanyoreka omuri Danieli eshuura 2, kandi ebi naashomiremu bikantangaaza. Obunabi obu nibushoboorora okukuratana kw’obutegyeki kirimaani, gavumenti ezaabaire niziija kukwata munonga aha bwire bwaitu. Mandy akanyoreka obunabi bwa Baibuli obundi oburikukwata aha biro by’omumaisho. Nkatandika kutunga bimwe aha by’okugarukamu by’ebibuuzo byangye! Kwonka shi n’oha owaahandiikire obunabi obwo, kandi n’oha owaabaire naabaasa kugamba gye atyo aha biro by’omumaisho? Mbwenu shi Ruhanga takaaba ariho?

Mandy akanyoreka Horst na Angelika, omushaija n’omukazi we Abajurizi ba Yehova abaampweraire kwetegyereza gye Ekigambo kya Ruhanga. Ahonaaho nketegyereza ngu Abajurizi ba Yehova nibo bonka abarikuta omutima aha iziina rya Ruhanga Yehova kandi abarikurikoresa. (Zaaburi 83:18; Matayo 6:9) Nkeega ngu Yehova Ruhanga naaha abantu amatsiko g’okutuura omu nsi ebiro byona omu paradiso. Zaaburi 37:9 nihagira ngu ‘abarikutegyereza [Yehova] nibaija kuhungura ensi.’ Kikandeebekyera ngu okuraganisa oku n’okw’abantu boona abarikuteeraho kugyendera aha mitindo ya Ruhanga ey’emicwe nk’oku erikushoboororwa omu Baibuli.

Kwonka, nkagumirwa kuhindura emitwarize yangye kubaasa kugihikaanisa na Baibuli. Nkaba ninyehurira ahabw’okuba omusinguzi omu kweshongora n’okuhuuga ebishushani, n’ahabw’ekyo nkaba nyine kubanza naayega kuba omucureezi. Kandi, kikaba kitarikunyorobera kureka ebikorwa byangye by’obuhwanshoni. Ka nikinshemeza kureeba ngu Yehova naagumisiriza, agirira embabazi, kandi ayetegyereza abo abarikuteeraho kugyendera aha ki Baibuli erikwegyesa!

Kuruga omu buto kuhika aha myaka 18 nkaba niinyikiririza omu butegyeki bw’Abakomunisiti kandi ngu Ruhanga tariho, kwonka kuruga obwo Baibuli ehindwire emitwarize yangye. Ekampwera kutaguma ninyerarikirira aha biro by’omumaisho naamanya ekigyendererwa ky’okubaho. Omuri 1993, nkabatizibwa naaba omwe aha Bajurizi ba Yehova, kandi omu 2000, nkashwera Tabitha, omuheereza wa Yehova omweziriki mugyenzi wangye. Tumazire obwire bwingi turikuhwera abandi kumanya Baibuli nk’oku kirikubaasika. Baingi abu turikubugana bakakurira omu mbeera nk’ezangye, ez’eby’obutegyeki bw’Abakomunisiti n’okugira ngu Ruhanga tariho. Nimpurira naatunga okumarwa ku ndikubooreka oku baine kumanya Yehova.

Obu naatandika kukwatanisa n’Abajurizi ba Yehova, abazaire bangye bakatiina. Kwonka kuruga obwo, bakatandika kureeba empinduka nungi omu magara gangye ahabw’okukwatanisa nabo. Ekirikunshemeza, hati nibashoma Baibuli kandi nibaija n’omu nteerane z’Abajurizi ba Yehova.

Nyowe na Tabitha twine obushwere burungi ahakuba nituteeraho kugyendera aha buhabuzi obu Baibuli erikuha abashweraine. Nk’eky’okureeberaho, okworobera obuhabuzi bwa Baibuli obw’okwesigana kihamize obushwere bwaitu.—Abaheburaayo 13:4.

Hati tinkiine bwoba n’okwerarikirira aha biro by’omumaisho. Ndi omwe aha ka y’abantu omu nsi yoona ey’abaheereza ba Ruhanga bagyenzi bangye, eine obusingye obwabuzima n’obumwe. Omu ka egi twena nitwingana. Eki nikyo ekintu eki naabaire ninyikiririzamu kandi eki naabaire niinyenda kutunga.