Ngaaha. Abajurizi ba Yehova tibarikuhakanisa okutsirikwa. Nitureeba okutsirikwa nk’ekintu eki buri Mukristaayo aine kwecweramu. Baingi aha Bajurizi ba Yehova nibacwamu kutsirikwa.

 Nituba nitwenda kutunga obujanjabi oburungi, kandi nitusiima okutunguuka omu by’ekishaho kutuubya aha kabi akarikureetwaho endwara. Nitusiima okumariirira n’okufayo kw’abahangu omu by’ekishaho, na munonga omu bwire bw’endwara y’akabi.

 Abajurizi ba Yehova nibakwatanisa n’ab’eby’obujanjabi. Nk’eky’okureeberaho, kuruga obu haabaho muyego ya COVID-19, Abajurizi ba Yehova batwire nibashohoza okwijukibwa omu ndimi nyingi aha mukura ogu, barikuhiga abantu kukuratira engyenderwaho z’obwerinzi. Ezi nizitwariramu okutahikaana, n’obuhabuzi oburikukwata aha nteerane z’orweteeraine, okweshoroora, okunaaba engaro, okujwara masiki, n’ebindi ebi ab’obushoboorozi barikushaba ngu tukore.—Abarooma 13:1, 2.

 Kumara emyaka mingi, ebitabo by’Abajurizi ba Yehova bitwire nibihamiiriza emisingye egi:

•   Enshonga z’eby’obujanjabi buri muntu naaba aine kwecweramu.—Abagalatia 6:5.

   “[Magaziini egi] terikushagika omuringo gw’okuragurirwa gumwe kandi ekahakanisa ogundi, kandi terikuha obuhabuzi aha by’obujanjabi. Kureka neeyoreka amazima, reero omushomi ayecweramu.”—Awake!, Okwakabiri 8, 1987.

   “Yaaba iwe n’abaana baawe mwikiriza kutsirikwa, ekyo niimwe mwine kwecweramu.”—Awake!, Okwamunaana 22, 1965.

•   Nitusherura obujanjabi ahabw’okugira ngu nitutwara amagara nk’ag’omuhendo.—Ebyakozirwe 17:28.

   “Abajurizi ba Yehova nibaza omu bashaho abatendekirwe gye kubahwera baaba barwaire. Nibakunda amagara, kandi nibakora eky’oburyo kandi ekirikuhikaana n’Ebyahandiikirwe kuhangaara nk’oku kirikubaasika.”—Watchtower, Okwamushanju 1, 1975.

   “Abajurizi ba Yehova beekundiire nibaikiriza omubazi n’okuragurirwa. Nibaba nibenda kuguma baine amagara marungi n’okuhangaara. Nangwa kushushana na Luka Omukristaayo omu kyasha ky’okubanza, bamwe aha Bajurizi ba Yehova n’abashaho. . . . Buzima Abajurizi ba Yehova nibasiima obweziriki n’okumariirira kw’abarikuha obujanjabi. Kandi nibasiima n’obuhwezi bw’abashaho omu kubahwera kutunga oburuhuuko.”—Watchtower, Okwakabiri 1, 2011.