Abarikubarwa nk’Abajurizi ba Yehova n’abarikubuurira amakuru marungi g’Obukama bwa Ruhanga buri kwezi bonka. (Matayo 24:14) Aba nibatwariramu Abajurizi ba Yehova ababatiziibwe n’abo abatakabatiziibwe kwonka abarikwejumba omu murimo gw’okubuurira.

 Ngaaha. Okuhayo tikwo kurikureetera omuntu kubarwa nk’Omujurizi wa Yehova, nari kuza omu buheereza nari kuheebwa obujunaanizibwa omu kibiina kyaitu. (Ebyakozirwe 8:18-20) Nangwa, ebirikuheebwayo ebingi, abarikubihayo tibarikwemanyisa. Buri Mujurizi wa Yehova naahayo obwire bwe, amaani ge, n’ebintu bye, ahabw’omurimo gwaitu ogw’ensi yoona, kurugiirira aha kyetengo kye n’embeera ze.—2 Abakorinso 9:7.

 Buri kwezi, buri Mujurizi wa Yehova naahayo ripoota ye y’okubuurira omu kibiina kye. Ripoota egi buri omwe naagihayo ayekundiire.

 Ripoota z’ababuurizi boona omu kibiina nizigaitwa hamwe, reero omubaro gwona nigwoherezibwa aha ofiisi y’eitaagi. Ofiisi y’eitaagi neeyohereza ripoota z’eihanga ryona nari ekicweka, aha ofiisi enkuru ey’Abajurizi ba Yehova.

 Aha muheru gwa buri mwaka gw’obuheereza, a omubaro gw’Abajurizi ba Yehova ogukizireyo nigumanywa omu buri eihanga. Emibaro egi yoona neegaitwa hamwe kubaasa kumanya Abajurizi ba Yehova abari omu nsi yoona. Ripoota zoona omu bwijwire eza buri eihanga nizoorekwa aha nsi y’ekicweka “Omu Nsi Yoona” ekiri aha mukura gwaitu. Ripoota ezi nizitugumya, nk’oku zaabaire nizigumya Abakristaayo aba ira.—Ebyakozirwe 2:41; 4:4; 15:3.

 N’obu aba turaabe tutarikubabarira aha mubaro gw’Abajurizi ba Yehova, nitubaakiira omu bibiina byaitu. Baingi aharibo nibaija aha mukoro gw’okwijuka okufa kwa Kristo, n’ahabw’ekyo omubaro gwabo nigubaasa kumanywa turikwiha omubaro gw’Abajurizi ba Yehova aha mubaro gwona ogw’abarikwija aha Kiijutsyo. Omu 2023, abaizire aha Kiijutsyo bakaba bari 20,461,767.

 Baingi abatarikwija omu nteerane zaitu nibagasirwa omu ntebeekanisa y’okwegyesibwa Baibuli batashashwire. Omu 2023, tukeegyesa abeegi ba Baibuli nka 7,281,212 buri kwezi, kandi bamwe aharibo bakaba nibeegyera hamwe.

 Gavumenti nizikira kutunga omubaro gwazo zirikubuuza abantu ediini ezi barikubarirwamu. Nk’eky’okureeberaho, ekitongore ky’okubariirira ekya U.S. nikigira ngu nikitunga emibaro “kurugiirira aha diini ei abantu barikugira ngu niyo barimu,” kandi nikyongyeraho ngu ebirikurugamu “nikuba kuri okuteebereza omu mwanya gw’okuba amazima genyini.” Okutaana n’ekyo, abu turikubara nk’Abajurizi ba Yehova, nabo bonka abarikubuurira abandi, kandi abarikuhayo ripoota z’okubuurira, beitu batari abo abarikweyeta Abajurizi ba Yehova kyonka.