Abajurizi ba Yehova batwire nibakoresa envunuura nyingi za Baibuli okwega Baibuli kwabo. Kwonka, nitukunda munonga eya New World Translation of the Holy Scriptures ahakuba erimu eiziina rya Ruhanga, ehikire, kandi neeyetegyerezibwa.

•   Neekoresa eiziina rya Ruhanga. Abaateire Baibuli abamwe bakaremwa kuha ekitiinisa okishemereire. Nk’eky’okureeberaho, envunuura emwe ya Baibuli erimu amaziina g’abantu abarikurenga 70 abaahwereire omu kugishohoza. Kwonka Baibuli egi terimu eiziina rya Ruhanga, Yehova owaagihandiikiise!

   Kwonka omu Baibuli eya New World Translation, eiziina rya Ruhanga rikagarurwa omu myanya yoona ei ryabaire riri omu bihandiiko by’okubanza, kandi akakiiko akaashohoize envunuura egi tikarikwemanyisa.

•   Ehikire. Tikugira ngu envunuura zoona zirimu obutumwa nk’obwabaire buri omu Baibuli eyaabandize. Nk’eky’okureeberaho envunuura emwe, omuri Matayo 7:13 neegira eti: “Mutaahire omu irembo erifunzire, ahakuba eirembo eririkutaasya omuriro ogutarikuraara rigarami, n’omuhanda gwaryo gworobi.” Kwonka, omu bihandiiko by’okubanza, ekigambo “okucwekyerera,” nikyo kirikukoresibwa beitu gutari “omuriro ogutarikuraara.” Obundi abavunuuzi bakatamu ekigambo “omuriro ogutarikuraara” ahabw’okwikiriza ngu ababi nibaija kubonabonesibwa omu muriro ebiro byona. Kwonka Baibuli terikushagika enyegyesa egyo. N’ahabw’ekyo, Baibuli eya New World Translation neevunuura gye ekyahandiikirwe ekyo eti: “Mutaahire omu irembo erifunzire, ahakuba eirembo eririkutaasya omu kucwekyerera rigarami, n’omuhanda gwaryo guba muhango, kandi n’abagutooramu baba baingi.”

•   Neeyetegyerezibwa. Envunuura nungi teine kuba ehikire kyonka kureka eine n’okuba neeyetegyerezibwa. Teekateeka aha ky’okureeberaho eki. Omu Abarooma 12:11, entumwa Paulo akakoresa ebigambo ebiine amakuru “g’okubira kw’omwoyo.” Ahakuba ebigambo ebyo tibiine makuru omu Runyankore orw’ebiro ebi, New World Translation neekoresa ebigambo ebyorobi kwetegyereza. Nihagira ngu Abakristaayo baine kuba “baine kushemuuka n’omwoyo.”

 Oyihireho New World Translation okukoresa eiziina rya Ruhanga, okuba ehikire, n’okwetegyerezibwa, eine ekindi eky’omutaano. Neeheerwa busha abantu. N’ekirugiremu, abantu nyamwingi nibabaasa kushoma Baibuli omu rurimi rw’enzaarwa, n’abo abatarikubaasa kwegurira Baibuli.