Abajurizi ba Yehova baine omuringo murungi ogurikubaasa kukuhwera kwega eki Baibuli erikwegyesa. Entebeekanisa yaitu y’okwega Baibuli neebaasa kukuhwera:

•   Kugira okushemererwa

•   Kuba munywani wa Ruhanga

•   Kwega ebiraganiso bya Baibuli ebya nyentsya

Ebirimu

•  Niki ekirikutwarirwa omu kwegyesibwa Baibuli?

•  Nyine kushashurira okwega?

•  Omushomo nigutwara bwire ki?

•  Nintandika nta?

•  Nimbaasa kubanza kugyezesa okwega?

•  Naikiriza kwega Baibuli shi, ninyija kugyemeserezibwa kuba Omujurizi wa Yehova?

•  Nimbaasa kukoresa Baibuli eyangye?

•  Nimbaasa kweta abandi kunyegaitaho omu kwega?

•  Abajurizi ba Yehova baaba baanyegyeiseho Baibuli enyima, nimbaasa kugaruka kwega?

•  Mwine emiringo y’okwega Baibuli, omuntu ataine orikumwegyesa?

 Orikukwegyesa naija kukuhwera kwetegyereza Baibuli, murikwega enshonga emwe-emwe. Murikukoresa ekitabo Yesiimire Amagara Ebiro Byona! kuhikaanisa ebiteekateeko, noija kwega eki Baibuli erikwegyesa n’oku erikubaasa kukuhwera. Kubaasa kwega ebirikukiraho, reeba vidiyo.

 Ngaaha. Abajurizi ba Yehova nibagyendera aha ky’okukuratira eki Yesu yaahaire abeegi be: “Mukaheerwa busha, naimwe muheere busha.” (Matayo 10:8) Kandi, n’eby’okukoresa omu kwega tibiri by’okushashurira, ebirikutwariramu Baibuli n’ekitabo Yesiimire Amagara Ebiro Byona!

 Omushomo gwona gurimu amashomo 60. Niiwe orikucwamu obwira obu orikwenda kwegyeraho, kwonka abeegi abaingi nibakunda kwega eishomo rimwe nari n’okukiraho buri saabiiti.

1.  1. Ijuza foomu eri aha mukura. Nitwija kukoresa ebirikukukwataho ebi oyohereize kukusherurira Omujurizi wa Yehova oraagume naahurizana naiwe.

2.  2. Oraakwegyese naija kuhurizana naiwe. Naija kukushoboororera ekirikutwarirwa omu mushomo gw’okwegyesa Baibuli, kandi naija kugarukamu ebibuuzo ebi orikubaasa kuba oine

3.  3. Iwe n’orikukwegyesa nimukora hamwe entebeekanisa. Nimubaasa kwega butunu nari kurabira aha simu, vidiyo, nari murikwohererezana obutumwa. Okwega nikubaasa kutwara eshaaha emwe, kwonka nikubaasa kuba kugufu nari kurenga omu shaaha emwe, kurugiirira aha ntebeekanisa yaawe.

 Eego. Kubaasa kukora eki, ijuza foomu eri aha mukura. Orikuza kukwegyesa yaakuteerera esimu, mumanyise ngu nooyenda kubanza kugyezesa okwega kureeba yaaba oraakukunde. Naija kubanza akorese akatabo Yesiimire Amagara Ebiro Byona! akarimu amashomo ashatu ag’enyanjura, kukuhwera kureeba yaaba noija kukunda kwega Baibuli.

 Ngaaha. Abajurizi ba Yehova nibakunda kwegyesa abandi Baibuli, kwonka titurikugyemesereza omuntu weena kwija omu diini yaitu. Kureka, nitwegyesa abantu eki Baibuli erikwegyesa, turikumanya ngu buri muntu aine obugabe bw’okwecweramu eki araikirize.—1 Petero 3:15.

 Eego, noobaasa kukoresa envunuura ya Baibuli ei orikwenda. N’obu turaabe nitukunda kukoresa New World Translation of the Holy Scriptures ahabw’okugira ngu ehikire gye kandi neeyetegyerezibwa, nitumanya ngu abantu baingi nibakunda kukoresa envunuura za Baibuli ezi bamanyiriire.

 Eego. Noobaasa kwega n’ab’eka yaawe boona nari abanywani abandi boona abu orikwenda kweta.

 Eego. Nangwa noobaasa kukunda omushomo ogw’ebiro ebi kukira ogwa ira, ahakuba guhindwirwemu kuhikaana n’embeera z’abantu hati. Gurimu bingi by’okureeba n’okuhikaanisa ebiteekateeko kukira entebeekanisa z’okwega Baibuli ez’enyima.

 Eego. N’obu abeegi baingi baraabe nibeega gye barikuhwerwa abeegyesa, abamwe nibakunda kubanza kwega bonka. Aha mukura gwaitu hariho Eby’okukoresa omu Kwega Baibuli, kandi nibibaasa kukuhwera omu kweyegyesa Baibuli. Noobaasa kushangaho ebi:

•   Vidiyo Ezirikukwata Ahari Baibuli. Vidiyo ngufu ezi nizishoboorora enyegyesa nkuru za Baibuli.

•   Ebibuuzo Ebi Baibuli Erikugarukamu. Ebicweka ebi nibigarukamu ebibuuzo bingi ebirikukwata ahari Baibuli.

•   Okushoboorora Ebyahandiikirwe. Manya amakuru g’Ebyahandiikirwe bingi n’ebigambo byabyo.