Baibuli neegamba aha mbeera, emiteekateekyere, n’ebintu ebyabaire nibiija kworeka ngu entebeekanisa ‘y’ensi egi eri haihi kuhwaho.’ (Matayo 24:3) Obwire obwo Baibuli neebweta ‘ebiro by’emperu,’ nari ‘obwire bw’emperu,’ nari ‘obunaku bw’emperu.’—2 Timoseo 3:1; Danieli 8:19.

 Baibuli ekagamba aha bintu bingi byona hamwe ebirikukora ‘akamanyiso’ k’ebiro by’emperu. (Luka 21:7) Yetegyereze bimwe aharibyo:

 Entaro omu bicweka bingi. Yesu akagira ati: ‘Eihanga niriija kuteera erindi ihanga, n’obugabe buteere obundi bugabe.’ (Matayo 24:7) Nikyo kimwe, Okushuuruurwa 6:4 hakagamba kare aha muvugi w’embaraasi orikujwekyera entaro, owaabaire naija “kwiha obusingye omu nsi.”

 Enjara. Yesu akagira ati: ‘Nihaija kubaho enjara.’ (Matayo 24:7) Ekitabo ky’Okushuuruurwa kikagamba kare aha muvugi w’embaraasi ondiijo, owaabaire naija kureetaho enjara omu bicweka bingi.—Okushuuruurwa 6:5, 6.

 Emitsitsa y’amaani. Yesu akagira ngu hakaba nihaija kubaho ‘emitsitsa omu myanya mingi.’ (Matayo 24:7; Luka 21:11) Emitsitsa egi omu nsi yoona ekaba neija kureetaho okubonabona kwingi n’okufeerwa amagara kukira ira.

 Endwara. Yesu akagira ngu hakaba nihaija kubaho ebigwererezi “by’endwara z’akabi.”—Luka 21:11, Contemporary English Version.

 Emishango. N’obu abantu baraabe batwire nibakora emishango kumara ebyasha bingi, Yesu akagira ngu omu biro by’emperu, ‘obugomi bukaba nibwija kukanya.’—Matayo 24:12.

 Okushiisha ensi. Okushuuruurwa 11:18 hakagamba kare ngu abantu bakaba nibaija ‘kucwekyereza ensi.’ Eki bakaba nibaija kukikora omu miringo mingi, ti kurabira omu bushaarizi n’ebikorwa bitari by’oburingaaniza byonka, beitu barikushiisha n’obuhangwa bw’ensi.

 Okusiisikara kw’emicwe. Omu 2 Timoseo 3:1-4, Baibuli ekagira ngu abantu okutwarira hamwe bakaba nibaija kuba “entasiima, . . . abatarikwenda kugarukana n’abandi, abarikubeihererana, abatarikweyangisa, enshaarizi, abarikwanga ebirungi, abarikureebyana, engangaazi, abarikwekuza.” Emitwarize egi ekaba neija kwongyera kuba mibi, obwire obu buhikye n’aha kwetwa “ebiro by’akabi kaingi” ebigumire kwemera.

 Okushenyuka kw’amaka. Omu 2 Timoseo 3:2, 3, Baibuli ekagira ngu abantu bakaba nibaija kuba “abatarikukunda baabo,” kandi ngu abaana bakaba nibaija kuba “abarikugomera abazaire.”

 Okutuuba kw’okukunda Ruhanga. Yesu akagira ati: ‘Okukunda kw’abaingi nikwija kuhora.’ (Matayo 24:12) Yesu akaba naamanyisa ngu rukundo ei abantu baingi bainiire Ruhanga neija kuhora. Nikyo kimwe, 2 Timoseo 3:4 nihagira ngu omu biro by’emperu, abantu nk’abo bakaba nibaija kuba “abarikukunda kweshemeza bonka” omu mwanya gw’okushemeza Ruhanga.

 Oburyarya bw’ediini. Omu 2 Timoseo 3:5, Baibuli ekagira ngu abantu bakaba nibaija kweshushaniriza nk’abarikuheereza Ruhanga, kwonka buzima batarikugyendera aha mitindo ye.

 Okwongyera kwetegyereza obunabi bwa Baibuli. Ekitabo kya Danieli kikagira ngu omu ‘bunaku bw’emperu,’ baingi bakaba nibaija kwongyera kwetegyereza amazima ga Baibuli, otwariiremu okwetegyereza gye obunabi obu.—Danieli 12:4.

 Omurimo gw’okubuurira omu nsi yoona. Yesu akagira ati: ‘Amakuru marungi aga ag’Obukama nigaija kubuurirwa omu nsi yoona.’—Matayo 24:14.

 Okukanya kw’okuteefeerayo n’okugaaniiza. Yesu akagira ngu abantu okutwarira hamwe bakaba nibaija kwehuzya obuhame oburikureebwa butunu ngu emperu eri haihi kuhika. (Matayo 24:37-39) Kandi, 2 Petero 3:3, 4 hakagamba kare ngu abamwe bakaba nibaija kushekyerera obuhame, kandi babwangire kimwe.

 Okuhikiirira kw’obunabi bwona. Yesu akagira ngu omu biro by’emperu obunabi bukaba nibwija kuhikiirira bwona, beitu butari bukye aharibwo nari bwingi aharibwo.—Matayo 24:33.

 Eego. Embeera z’ensi egi n’okwetegyereza ebiri omu Baibuli nibihamya ngu ebiro by’emperu bikatandika 1914, obu Orutaro rw’Ensi Yoona I rwatandika. Okureeba oku embeera eziri omu nsi zirikworeka ngu turi omu biro by’emperu, reeba vidiyo erikukurataho:

 Omuri 1914, Obukama bwa Ruhanga bukatandika kutegyeka omu iguru, kandi eki bwabandize kukora n’okubinga Sitaane Omuregi na baadaimoni be kuruga omu iguru bakanagwa omu nsi. (Okushuuruurwa 12:7-12) Ebi Sitaane arikureetera abantu kukora nibibaasa kureebererwa aha mitwarize mibi n’ebikorwa bibi eby’abantu b’ebiro by’emperu “eby’akabi kaingi,” kandi ebigumire kwemera.—2 Timoseo 3:1.

 Ebiro bigumire ebi nibireetera abantu baingi amaganya. Nibeerarikirira ngu obutuura gye bw’abantu buriyo nibusiisikara. Nangwa n’abamwe nibeerarikirira n’ahari nyentsya y’abantu.

 Kwonka, abandi abaine amaganya ahabw’embeera eziri omu nsi, baine amatsiko. Baine obuhame ngu Obukama bwa Ruhanga buri haihi kwihiraho kimwe oburemeezi bw’ensi. (Danieli 2:44; Okushuuruurwa 21:3, 4) Nibategyereza Ruhanga kuhikiiriza ebi arikuraganisa, kandi nibatunga okuhuumurizibwa omu bigambo bya Yesu ebirikugira ngu, ‘orikugumisiriza kuhitsya aha muheru, niwe arikwija kujunwa.’—Matayo 24:13; Miika 7:7.