Baibuli neetuha obuhabuzi burungi aha bikwatiraine n’okucwamu. Neebaasa kutuhwera ‘kugira obwengye n’okwetegyereza.’ (Enfumu 4:5) Obumwe neetworeka eky’okucwamu ekirungi. Obundi, neetuha obuhabuzi oburikutuhitsya aha kucwamu gye.

Omu kicweka eki

•  Obukoryo bw’okukuhwera kucwamu gye

•  Nyine kuhindura eki naaherize kucwamu shi?

•  Ku naakuba ncwairemu ekintu kibi eki ntarikubaasa kuhindura?

•   Otarahukiiriza kucwamu. Baibuli neegira eti: “Omwerinzi ayetegyereza ahu arikuraba.” (Enfumu 14:15) Waarahukiiriza kucwamu, noobaasa kutareeba enshonga enkuru. Twara obwire oteekateekye n’obwegyendesereza aha bi orikwenda kutooranaho.—1 Abatesalonika 5:21.

•   Otacwamu orikwihirira aha nyehurira zaawe zonka. Baibuli neeturabura ngu butoosha titurikubaasa kwesiga omutima gwaitu. (Enfumu 28:26; Yeremia 17:9) Nk’eky’okureeberaho, nitubaasa kutacwamu gye twaba twine ekiniga, amaganya, turikwehurira kubi, turikurahukiiriza, nari twaba turuhire munonga.—Enfumu 24:10; 29:22.

•   Shaba obwengye. (Yakobo 1:5) Ruhanga naashemererwa kugarukamu okushaba nk’oku. Ni Tataitwe orikufayo orikwenda ngu abaana be beetantare oburemeezi obutarikwetengyesa. Yehova ‘niwe arikuha obwengye, kandi omu kanwa ke nimwo harikuruga okumanya n’okwetegyereza.’ a (Enfumu 2:6) Obwengye obwo naabuha abantu okukira munonga kurabira omu Kigambo kye Baibuli.—2 Timoseo 3:16, 17.

•   Condooza. Kubaasa kucwamu gye, oine kutunga obutumwa oburikwesigwa. Nk’oku Baibuli erikugira, ‘omunyabwengye naahurira, ayeyongyere kwega.’ (Enfumu 1:5) Noobaasa kwiha nkahi ebirikuhwera kandi ebirikwesigwa?

   Okubanza, reeba eki Baibuli yenyini erikugamba aha nshonga erikucondoozibwaho. Ahabw’okugira ngu Omuhangi waitu naamanya ekiri kirungi ahabwaitu, Ekigambo kye kirimu obuhabuzi oburikukirayo kwesigwa. (Zaaburi 25:12) Okucwamu okumwe, Baibuli neeha obuhabuzi obwa butunu, obundi omu muringo gw’ebiragiro. (Isaaya 48:17, 18) Kwonka omu nshonga enyingi, Baibuli terikugamba aha nshonga butunu. Kureka, neeha obuhabuzi omu muringo gw’emisingye. Emisingye egi neebaasa kutuhwera kucwamu gye, kwonka nabwo etarikuturemesa eki turikukunda. Kubaasa kutunga ebyahandiikirwe ebihikire, condooza omu bicweka nari ebitabo ebirikwegamira ahari Baibuli, nk’ebyo ebiri aha mukura ogu. b

   Okucwamu okw’omuringo ogundi, nooba oine kushwijuma obuhame obundi oburikwesigwa. Nk’eky’okureeberaho, otakaguzire ekintu, na munonga eky’obuguzi bwingi, nikiba kiri eky’obwengye kucondooza aha kintu ekyo n’owaakikozire, n’obushonshorekye obundi nk’okuhamizibwa ngu kiri gye n’okukigarurayo. Nangwa, nooba oine n’okuhamya ngu ebirikukwata aha kintu ekyo buzima nibihikaana n’eki orikwenda.

   “Ahatari kuhanuura enaama zifa busha,” Baibuli nikwo erikugira. (Enfumu 15:22) N’ahabw’ekyo otakacwiremu, yebuuze aha bantu abarikwesigwa. Nk’eky’okureeberaho, nikiba kiri eky’obwengye kwebuuza aha mushaho waaba nooza kucwamu aha bikwatiraine n’okuragurirwa. (Matayo 9:12) Omu mbeera ezimwe, noobaasa kwebuuza aha bantu abararabireho omu mbeera nk’eyaawe. Kwonka ijuka ngu, niiwe aine kucwamu beitu batari abantu abu waayebuuzaho, kandi oine kwemera ebiraarugye omu kucwamu kwawe.—Abagalatia 6:4, 5.

•   Teekateeka aha nshonga zoona. Kurugiirira aha bi ocondoorize, noobaasa kuhandiika ebi oraatooranaho, ebirungi n’oburemeezi ebya buri kimwe. Kandi yebeere ow’amazima aha birikubaasa kuruga omu kucwamu kwawe. (Eky’Ebiragiro 32:29) Nk’eky’okureeberaho, okucwamu kwawe nikubaasa kukukwataho kuta, eka yaawe, nari n’abandi? (Enfumu 22:3; Abarooma 14:19) Okuteekateeka aha bibuuzo nk’ebi kuhikaana n’emisingye ya Baibuli, kishemereire kukuhwera kucwamu gye.

•   Cwamu. Obumwe, nitutimwimwa kucwamu ahabw’okugira ngu nitubangaanisa. Kwonka twayanga kucwamu, nitubaasa kufeerwa omugisha gw’okukora ekintu nari tuhendere turi omu mbeera mbi. Omu muringo ogundi, okutacwamu n’eky’obushema kwingana n’okucwamu kubi. Baibuli erikukoresa eky’okureeberaho ky’eby’obuhingi, neegira eti: ‘Orikuhanga amaisho omuyaga, tarikubiba, kandi orikugahanga ebicu, tarikugyesha.’—Omubuurizi 11:4, Good News Translation.

 Kandi ijuka ngu, nangwa n’okucwamu okurungi, tikirikumanyisa ngu nikurugamu ebirungi byonka. Okucwamu obumwe nikutwariramu okugira eki waayefeerereza. Kandi, nihabaasa kubaho ebigwererezi. (Omubuurizi 9:11) N’ahabw’ekyo, koresa ebiriho ocwemu eki orikureeba ngu nikibaasa kurugamu ebirungi.

 Ti buri ki orikucwamu ngu nikyo ky’aha muheru. Embeera zaawe nizibaasa kuhinduka, nari noobaasa kwetegyereza ngu eki ocwiremu kirugiremu ebi obaire otarikuteekateeka. N’ahabw’ekyo, nikibaasa kuba eky’obwengye kugaruka kushwijuma enshonga, reero otoorane ekindi ekirikubaasa kurugamu ebi orikwenda.

 Kwonka, eby’okucwamu ebimwe tibishemereire kuhindurwa. (Zaaburi 15:4) Nk’eky’okureeberaho, Ruhanga naayenda ngu abashweraine bahamire aha biragaano byabo by’obushwere. c (Malaki 2:16; Matayo 19:6) Obushwere bwabamu oburemeezi, bashemereire kukora kyona ekirikubaasika kubugonjoora, beitu kutari kuruga omu bushwere.

 Obumwe, twena nitucwamu kubi, nari ebitari by’obwengye. (Yakobo 3:2) Nangwa n’obumwe nitubaasa kwefuuza nari kweshinja, kandi eki n’ekya butoosha. (Zaaburi 69:5) Buzima, okugira enyehurira ezi ezitarengire nikibaasa kuba ekintu kirungi, zaaba nizituremesa kugaruka kukora enshobe niyo emwe! (Enfumu 14:9) Kwonka, Baibuli neetuhabura kwetantara kweshinja ekirenga, ekirikubaasa kuba eky’akabi omu biteekateeko n’enyehurira. (2 Abakorinso 2:7) d Yehova “n’omunyambabazi kandi omusaasizi,” Baibuli nikwo erikugira. (Zaaburi 103:8-13) N’ahabw’ekyo teeraho kwegyera aha kucwamu kwawe kubi oku otarikubaasa kuhindura, kandi kora kyona eki orikubaasa kutereeza omu nshonga.