Kihikire Nari Kigwire

1.   Waaba oine abanywani baingi, torikubaasa kugira eihamba.

2.   Waaza aha mukura gw’empurizana, torikubaasa kugira eihamba.

3.   Waaba nootsindika obutumwa bwingi, torikubaasa kugira eihamba.

4.   Waagira ebi waakorera abandi, torikubaasa kugira eihamba.

 Ahabw’enki?

•   Okugira abanywani baingi ti buhame ngu torikubaasa kugira eihamba.

   “Ninfayo ahari banywani bangye, kwonka tindikuteekateeka ngu bo nibanfaho. Noobaasa kugira eihamba ry’amaani waaba oine abanywani baingi, kwonka barikureebeka nk’abatarikukukunda nari abatarikukwenda.”—Anne.

•   Okuza aha mikura y’empurizana ti buhame bw’okutagira eihamba.

   “Abantu abamwe nibarundaana abanywani nk’oku barikurundaana ebibumbirwe. Kwonka okugira ekishengye ekijwiremu ebibumbe tikirikureetera omuntu kuhurira arikukundwa. Waaba otaine abanywani abaabuzima, abanywani ab’aha mukura nibaba bari nk’ebibumbe ebitaine amagara.”—Elaine.

•   Okutsindika obutumwa obutaitsya ti buhame ngu toraagire eihamba.

   “Obumwe ku orikugira eihamba nooguma nooreeba aha simu yaawe kureeba yaaba haine omunywani owaakutsindikira obutumwa. Kwonka ku orikuba oine eihamba, kandi okareeba hataine orikwenda kuhurizana naiwe, nooyongyera kwehurira kubi!”—Serena.

•   Okugira ebi waakorera abandi ti buhame ngu torikwija kugira eihamba.

   “Butoosha niinteeraho kuba efura ahari banywani bangye, kwonka bo tikwo barikuntwariza batyo. Tindikwefuuba ahabw’okuba efura aharibo, kwonka ninshoberwa kureeba ngu buzima bo tibarikwenda kumbeera efura.”—Richard.

 Eky’okwijuka: Okugira eihamba okukira munonga nikirugiirira aha miteekateekyere y’omuntu. “Eihamba niriruga omu muntu omunda, beitu hatari heeru,” nikwo omwishiki orikwetwa Jeanette yaagizire.

 Noobaasa kukora ki waaba otaine banywani kandi oine eihamba?

 “Noobaasa kugira eihamba ahabw’okuhurira otaine burinzi. Nikiba kigumire kusherura abanywani waaba nooyegaya ngu toshemereire kukundwa abandi kandi bakakufaho.”—Jeanette.

 Baibuli neegira eti: ‘Kunda mutaahi waawe, nk’oku orikwekunda.’ (Abagalatia 5:14) Kubaasa kwesiimira omu kugira abanywani barungi, twine kweyikiririzamu kwonka tutarengyesereize kuhika aha kugira omwetunguuro.—Abagalatia 6:3, 4.

 “Eihamba ni nk’orutenga. Ku orikuguma nooyetiringinya, nooyongyera kugumirwa kururugamu. Waaguma nooyesaasibwa, n’abandi nibeeyongyera kukuhungaho, reero nooyongyera kugira eihamba.”—Erin.

 Baibuli neegira eti: ‘Okukunda tikurikwesherurira byakwo.’ (1 Abakorinso 13:4, 5) Amazima gari ngu, twayetaho munonga omutima, embabazi ezi twiniire abandi nizituuba, ekirikureetera abandi kutenda kuba naitwe. (2 Abakorinso 12:15) Ka tugambe amazima: Okusingura kwawe kwaba nikupimirwa aha ku abandi barikutwaza, nooba noija kuremwa! Buzima, ebigambo nka “tihaine n’omwe orikunteerera esimu” na “tihaine n’omwe orikunyeta kuntaayaayisa” nibyoreka ngu okushemererwa kwawe kuri omu bushoboorozi bw’abandi. Mbwenu shi nooba otariyo noobaha obushoboorozi burengire?

 “Abantu abaine eihamba nibaba nibenda kufuubwaho, n’ahabw’ekyo nibabaasa kuhitsya obwire baakiire buri omwe orikubafaho. Nibaba nibenda kuhurira nibakundwa. Kwonka abantu abamwe nibaija kukureetera kuhurira nookundwa ahabw’okwenda kukukoresa kyonka. Kandi noija kugirira kimwe eihamba kukira obundi bwona.”—Brianne.

 Baibuli neegira eti: ‘Orikugyenda n’abanyabwengye, nawe naahinduka omunyabwengye, kwonka mugyenzi w’abashema [naija kugwerwa akagwe].’ (Enfumu 13:20) Omuntu oine enjara naabaasa kurya buri ki yaabona. Nikyo kimwe, abantu abaine enjara y’abanywani nibabaasa kusherura abanywani omu myanya egwire. Nibabaasa kukorwa kubi abantu abaine ebigyendererwa bibi, reero bagume nibeehorereza ngu emikago nk’egyo n’eya butoosha, kandi ngu tibarikuteekateeka kutunga ekirikukira ahari ekyo.

 Okuhendera: Buri muntu naagira eihamba obumwe, kwonka abamwe nibakizaho. Kandi n’obu obumwe eihamba riraabe niribuza obusingye, twine kumanya ngu n’enyehurira kyonka. Enyehurira zaitu nizikira kutandikira omu biteekateeko, kandi nitubaasa kutegyeka ebiteekateeko byaitu.

 Kandi ba oringaniire, omu bi orikuteekateeka aha bandi. “Ti buri muntu ngu naija kuba munywani waawe ow’aha mara ebiro byona,” Jeanette, owaaba yaagambirweho nikwo arikugira, “kwonka noija kutunga abantu abarikukufaho. Kandi okukufaho nikimara. Eki nikyo kirikuhwera omu kumaraho eihamba.”

 Nooyenda obuhwezi obundi? Shoma ebiri ahansi y’omutwe, “ Okusingura Okutiina aha Bikwatiraine n’Emikago.” Kandi ihaho n’ekicweka “Working Through Loneliness.”