•   Nookwatwaho ota waahurira abandi nibakyeena?

  •  Nyowe tindikufayo, n’ekya butoosha.

  •  Nikinteganisamu kakye, kwonka ninkyehuzya.

  •  Nikiinkora kubi munonga, tindikubaasa kukyemera.

•   Iwe nookyeena kirikwingana ki?

  •  Tindikukyeena na kakye

  •  Obumwe n’obumwe

  •  Emirundi mingi

•   Omu miteekateekyere yaawe, noogira ngu okukoresa orurimi rubi kiine enshonga?

  •  N’akashonga kakye

  •  N’enshonga y’amaani

 Nooreeba okukyeena nk’enshonga y’amaani? Noobaasa kugira ngu ‘ngaaha ti nshonga y’amaani. Nangwa, hariho oburemeezi bw’amaani omu nsi obwine kutwerarikiriza. Oyihireho ekyo, buri omwe naakyeena!’ Ago shi n’amazima?

 Kiikirize nari oyangye, hariho abantu baingi abatarikukoresa orurimi rubi. Kandi baine enshonga ezirikubareetera kwetantara kukoresa orurimi rubi ezi abandi batarikumanya. Nk’eky’okureeberaho:

•  Okukyeena nikikira aha bigambo bugambo. Emigambire yaawe neeyoreka ekiri omuriiwe. Okukoresa orurimi rubi, nikibaasa kworeka ngu torikufayo aha nyehurira z’abandi. Mbwenu shi okwo nikwo ori?

   Baibuli neegira eti: ‘Ebirikuruga omu kanwa nibiba nibiruga omu mutima.’—Matayo 15:18.

•  Okukyeena nikubaasa kureetera abandi kukuteekateekaho kubi. Ekitabo Cuss Control nikigira kiti: “Omuringo ogu turikugamba nigubaasa kworeka abanywani abu twine, ekitiinisa eki turaaheebwe ab’eka yaitu n’abu turikukora nabo, omukago ogu twine nabo, oku turaakwate aha bandi, yaaba nitwija kutunga omurimo nari kukuzibwa, n’oku abatarikutumanya baraakwatweho.” Kandi nikigira kiti: “Yebuuze yaaba emikago yaawe obundi neija kwongyera kubonera waaba otarikukyeena.”

   Baibuli neegira eti: ‘Mwihe okujumiirana omuriimwe.’—Abaefeso 4:31.

•  Okukyeena tikurikukureetera kuba ow’omuhendo nk’oku orikuteekateeka. Dr. Alex omu kitabo kye How Rude! naagira ati: “Abantu abarikukyeena obwire bwona nibarusya kubahurikiza.” Naayongyeraho ngu emigambire mibi “terikworeka okukoresa okwetegyereza, okukoresa ebigambo birikushemeza, obwengye, nari embabazi. Waaba noogamba oteefeereireyo, ebitarikwetegyerezibwa, kandi otarikubanza waateekateeka, nikiija kushiisha obwongo bwawe.”

   Baibuli neegira eti: ‘Omu kanwa kaawe hatarirugamu ekigambo kyona ekibi.’—Abaefeso 4:29.

•  Taho ekigyendererwa. Noobaasa kwihira kimwe ebigambo bibi omu kanwa kaawe kumara okwezi kumwe nari ebiro bikye. Noobaasa kukuratiriza oku okozire orikukoresa kyati nari karenda. Kwonka kubaasa kuhamira aha kucwamu kwawe, noobaasa kwongyera kugira eki waakora. Nk’eky’okureeberaho:

•  Yetantare eby’okweshemeza ebirikwijuza omu bwongo bwawe orurimi rubi. Baibuli neegira eti: ‘Ekigombe kibi nikishiisha emicwe mirungi.’ (1 Abakorinso 15:33) “Ekigombe” tikirikutwariramu abantu bonka beitu n’eby’okweshemeza, nka vidiyo ezi orikureeba, emizaano y’aha kompyuta ei orikuzaana, n’ebyeshongoro ebi orikuhurikiza. Kenneth, ow’emyaka 17, naagira ati: “Kyorobi kweshongora orikukuratira ekyeshongoro eki orikukunda, kwonka okeehuzya enshonga nkuru ngu kirimu okukyeena ahabw’okugira ngu nookunda oku kirikusheneneka.”

•  Yoreka ngu ori omuntu mukuru. Abamwe nibakoresa ebigambo birikuhemurana ahabw’okuteekateeka ngu nibaija kutwarwa nk’abantu bakuru. Kwonka buzima, eki nikitaana n’ekyo. Abantu bakuru nibatendeka okubaasa kwabo ‘okw’okutaanisa ekirungi n’ekibi,’ Baibuli nikwo erikugira. (Abaheburaayo 5:14) Tibarikugarura emitindo yaabo ahansi ahabw’okwenda “kushemeza“ abandi.

 Buzima, emigambire mibi neeshiisha ebiteekateeko (nangwa n’omwoya) erikutamu ebintu bibi. Abaine emigambire mibi nibo baijwire omu nsi! “Otaba rwongyerera maganya,” ekitabo Cuss Control nikwo kirikuhiga. “Kora ogwawe orikwenegyeza emigambire mirungi. Noija kwehurira gye, kandi n’abantu abandi nibaija kukugiraho emiteekateekyere mirungi.”