Kodi mbani an’funika kupfunzisa wana bza nkhani ya kugonana? Bibliya limbalewa kuti abereki ndiwo omwe ana udindo bumwebu, ndipo abareki azinji athandizidwa kale na nfundo zinkutewerazi:

• Lekani kucita manyazi. Bibliya limbalewa padeca bza nkhani yakugonana pabodzi na bziwalo bzakuberekera. Ndipo Mulungu adauza Ajirayeri kuti ‘wana’ akhafunikira kumbapfunzisidwa nkhani zimwezi. (Bzakutonga 31:12; Mirewengo 15:​2, 16-​19) Imwepo mungaphatise basa mafala yaulemu yomwe yangacitise kuti mwanayo aleke kucita manyazi pakuceza naye bza bziwalo bzikuberekera.

• Mbapfunzisani pang’ono-pang’ono. Penu mwana wanu wakula, m’mbuto mwakufuna kupfunzisa bzense kabodzi na kabodzi, bzingakhale bwino mumbamupfunzisa pang’ono-pang’ono mwakubverana na msinkhu wace.​—1 Wakolinto 13:11.

• Pfunzisani makhalidwe yabwino. Ku xikola, wana angapfunzisidwe nkhani zakulewa bza kugonana. Tsono, Bibliya limbalimbisa abereki kupfunzisa wana wawo sikuti bza kugonana kokhako, koma kuwauzambo momwe iwo an’funikira kuimbaiwona nkhaniyi.​—Mimwani 5:​1-​23.

• Mbamubveserani mwana wanu. Mwana wanu akambakubvunzani cinthu bza nkhani ya kugonana, lekani mumbathamangira kukalipa ayai kukumbuka bzinthu ndibzo lini. M’mbuto mwace, ‘mbafulumizani kubva, mucicedwa kulewa-lewa.’​—Tiyago 1:​19.

Momwe mungakhotcerere mwana wanu kwa wanthu wakuipa

• Yambani ndimwe kupfunza. Dziwani momwe ambacitira wanthu omwe ambafuna kusenzeka ayai kugona na wana.​—Mimwani 18:15.

• Mbacitani thupo na bzomwe bzimbacitika pa moyo wa mwana wanu. Lekani kumbasiya mwana wanu m’manja mwa munthu ali-wense mwakusaya kutsimikizira kuti mungamukhulupiredi. Ndipo lekani kumbandomulekerera mwanu wanu.​—Mimwani 29:15.

• Mupfunziseni kudziwa bzinthu bzomwe angabvere. Wana ambafunikira kupfunzisidwa kubvera abereki wawo. (Wakoloso 3:​20) Tsono, mukapfunzisa mwana wanu kumbandobvera mkulu ali-wense, iye angakhale pa ngozi yakudzacitidwa cinthu cakuipa. Abereki omwe ni Akristau angauze mwana wawo kuti: ‘Munthu ali-wense akakuuza kuti ucite cinthu comwe Mulungu ambaletsa, iwepo ulambe.”​—Mabasa 5:​29.

• Mulatizeni momwe angacitire kuti ambabzikhotcerere. Thandizani mwana wanu kudziwa bzomwe angacite munthu akafuna kumulokotera pomwe imwepo palibe. Kuyezezera naye bzomwe an’funika kumbacita, bzingathandize kuti iye ambadziwe bzakucita, acithawa. Ndipo mungafunikire kumbamukumbusa mwakubwereza-bwereza thangwe angayebwe.​—Bzakutonga 6:7.