Inde, m’Bibliya muna umboni bwakuti Mulungu alipodi. Ndipo iro limbatilimbisa kukulisa cikhulupiro kwa Mulungu, sikuti kumbandokhulupira bzinthu bzakusaya umboni bzomwe bzipembedzo bzizinji bzimbapfunzisa, mwakuphatisa basa ‘mphanvu zawo zakukumbuka.’ (Waroma 12:1; 1 Juwau 5:20) Onani umboni bomwe Bibliya limbalewa mu nfundo zakutewerazi:

•   Kulinganizika kwa cirengedwe na bzinthu bzentse bwa moyo bzimbalatiza kuti kuna Mulengi. Bibliya limbalewa kuti: ‘Nyumba iri-yentse idamangidwa na munthu, tsono omwe adakonza bzinthu bzentse ni Mulungu.’ (Wahebereu 3:4) Napo kuti mafalaya njakusaya kunesa kubvesesa, wanthu azinji omwe adapfunza ambalewa kuti mafalaya njamphanvu kwene-kwene. *

•   Mwacibadwa, wanthufe timbafuna kudziwa thangwe ranyi tina moyo. Imweyi iri ninga njala yomwe timbakhala nawo napo kuti tidakhuta. Bzimwebzi ni mbali ya Bibliya yomwe imbalewa kuti ni cikhumbo cakufuna kudziwa na kunamata Mulungu. (Mateu 5:3; Cibvumbulutso 4:11) Kukhala na cikhumbo cimweci ni umboni bwakuti Mulungu alipodi, ndipo iye ni mu Mulengi wa lufoyi omwe ambafuna kuti tikhale naye pauxamwali.—Mateu 4:4.

•   Mapolofesiya yakunembedwa m’Bibliya magole mazinji m’mbuyomu, yadakwanisika ndendende ninga omwe bzikhadanembedwera. Bzimwebzi bzikulatiziratu kuti mapolofesiyaya yalibe kulewedwa na wanthu, koma yadalewedwa na munthu wamphanvu kwene-kwene kuposa ifepano.—2 Pedru 1:21.

•   Anembi wa Bibliya akhadziwa bzinthu bzinango bzakubverana na siyensiya bzomwe wanthu wa mu nthawe yawoyo akhabzibvesesa lini. Mwa ciratizo, kale-kale wanthu akhakhulupira kuti dziko la pantsiri liri pa msana pa bzilombo ninga nzou, njiri ayai ng’ombe. Mwa kusiyana na bzimwebzi Bibliya limbalewa kuti Mulungu ‘adamanika dziko la pantsi papezi.’ (Djobi 26:7) Mwa kundendemerana na bzimwebzi Bibliya limbafotokoza kuti Mulungu adakonza ‘dziko lakuzungulira.’ (Zaiya 40:22) Ndipo wanthu azinji ambakhulupira kuti anembi wa Bibliya akhadvesesa bzinthu bzomwe bzikhabverana na siyensiya thangwe akhauzidwa na Mulungu.

•   Bibliya limbatawira mibvunzo mizinji yakunesa kuibvesesa, ndipo wanthu akasaya kugumana mitawiroyo bzimbawacitisa kuleka kukhulupira kuti Mulungu alipo. Mwa ciratizo, penu Mulungu ngwalufoyi ayai ngwamphanvu zentse, thangwe ranyi timbabonera? Thangwe ranyi kawiri-kawiri wa bzipembedzo ambapfunzisa bzinthu bzakuipa mbuto mwa bzabwino?—Tito 1:16.