Kodi Mulungu Adaphatisa Basa Bzinthu Bzomwe Bzikhana Moyo Acibzisandusa Bzicikhala Bzamoyo bza Mitundu Inango ya Bzinthu Bzamoyo?
Mtawiro wa Bibliya
Ne. Bibliya limbalewa kuti Mulungu adalenga wanthu na ‘mitundu’ yakusiyana-siyana ya bzirombo na miti. * (Ciyambo 1:12, 21, 27; Cibvumbulutso 4:11) Limbalewambo kuti wanthu wentse adacokera kwa Adamu na Eva, omwe ni abereki wathu wakuyambirira. (Ciyambo 3:20; 4:1) Bibliya limbatawiriza lini kuti bzinthu bzamoyo bzidacita kusanduka, nakuti bzinthu bzomwe bzikhana moyo adabzisandusa kuti bzikhale mitundu inango ya bzinthu bzamoyo. Ndipo iro limbagaza lini bzomwe masiyentista yambalewa bzakuti mitundu inango ya bzinthu bzamoyo bzimbasanduka bzamoyo wa mtundu unango bzomwe bzimbandendemerana na mtunduyo. *
Kodi Mulungu adalenga bzinthu bzamoyo kucita kubzisandusa kucokera ku bzamoyo bzinango?
Wanthu omwe ambakhulupira kuti Mulungu adalenga bzamoyo mwakuphatisa basa bzamoyo bzinango ana makumbukidwe yakusiyana pa nkhaniyi. Winango ambakhulupira kuti Mulungu ndiye “ambacitisa bzamoyo bzentse bzomwe bziri m’cirengedwe kuti bzimbacinje-cinje mwakubverana na mbuto yomwe bzingagumanike.”
Makumbukidwe yanango yomwe wanthu angakhale nayo ni aya:
Bzamoyo bzentse bzidacokera ku bzamoyo bzinango bzakale-kale.
Cinthu ciri-centse camoyo cingacinje cicikhala mtundu winango.
Mulungu ndiye omwe ambacitisa kuti bzimwebzi bzikwanisike.
Kodi nfundo yakulewa kuti bzamoyo bzidacita kusanduka imbabverana na bzomwe Bibliya limbalewa?
Nfundo yakuti bzamoyo bzidacita kusanduka imbabverana lini na bzomwe Bibliya limbalewa m’bukhu la Ciyambo, lomwe limbalewa kuti bzinthu bzamoyo bzidacita kulengedwa. Ndipo Jezu adaphatisa basa nfundo za m’bukhuli kuti atsimikizire kuti mpsacadidi. (Ciyambo 1:26, 27; 2:18-24; Mateu 19:4-6) Bibliya limbalewa kuti Jezu akanati kubwera pa dziko la pantsi pano, akhali kudzaulu ndipo adathandiza Mulungu kukonza bzinthu bzentse bzomwe bziripobzi. (Juwau 1:3) Tenepo, nfundo yakuti Mulungu adasandusa bzamoyo bzomwe bzikhalipo kale kuti bzikhale bzamoyo bza mitundu inango, imbabverana lini na bzomwe Bibliya limbapfunzisa.
Tsono tingalewe ciyani miti na bzirombo bzomwe bzimbacinja bzikakhala pa mbuto ipsa?
Bibliya limbalewa lini kuti ni ‘mitundu’ ingasi ya bzamoyo yomwe ingacinje. Ndipo limbagaza lini nfundo yakuti bzirombo na miti inango yomwe Mulungu adalenga, bzingacinje mawonekedwe pomwe bzikubereka ayai thangwe ra kukhala mbuto inango. Napo kuti winango ambawona kuti kucinjaku ni kusanduka, tsono cadidi n’cakuti kucinja kumweku kungacitise lini mtundu upsa ayai kucitisa cinthu kukhala camoyo.
^ Bibliya limbaphatisa basa fala lakuti “mtundu” pakufuna kulewa bzinthu bzizinji mwakusiyana na momwe masiyentista yambaphatisira basa fala limweri. Kawiri-kawiri, bzomwe masiyentista yambalewa kuti ni kusanduka kwa mtundu wa cinthu camoyo, ninga fala lomwe limbaphatisidwa basa m’bukhu la Ciyambo, kumbandokhala kucinja kwa mtundu ubodzi-bodzi sikuti cinthu ca mtundu winango kusanduka cicikhala mtundu winango.
^ Fala limweri nthawe zinango limbadziwina na fala lakuti “microevolução.”
Imwepo Mungakomedwembo na
BZA IFE
Kumbirani kuti Mboni za Yahova zidzakuzungireni.
Cezani Nkhani za m’Bibliya na Mboni za Yahova ayai yezerani kupita mu programa yathu yakukumbirira pfunziro la Bibliya la fovolo.