Kuti tidziwe kuti ni lini pomwe dzikoli lin’dzamala, mpsakufunika kudziwa momwe Bibliya limbaphatisira basa fala lakuti ‘dziko.’ Fala la cigirego lakuti koʹsmos, lomwe kawiri-kawiri limbasanduliziridwa kuti ‘dziko,’ nthawe zizinji limathandauza wanthu, makamaka mu mbali zomwe zimbakhala zikulewa bza Mulungu na cakulinga cace. (Juwau 15:18, 19; 2 Pedru 2:5) Ndipo nthawe zinango fala lakuti koʹsmos limbalewa bza kacitidwe ka bzinthu ka wanthu.​—1 Wakolinto 7:​31; 1 Juwau 2:​15, 16. *

Kodi ‘kumala kwa dziko’ n’ciyani?

Mafala yakuti ‘kumala kwa dziko’, yomwe yambagumanika m’ma Bibliya mazinji, yangasanduliziridwembo kuti ‘mamaliziro ya nthawe ino’ ayai kuti ‘kumala kwa nthawe.’ (Mateu 24:3; English Standard Version) Mafalaya yambathandauza lini kupfudzidwa kwa dziko ayai kupfudzidwa kwa wanthu wentse, koma kumala kwa kacitidwe ka bzinthu ka wanthu.​—1 Juwau 2:​17.

Bibliya limbapfunzisa kuti ‘[wanthu] omwe ambacita bzakuipa an’dzaphedwa,’ kuti wanthu wabwino apfatse na moyo pa dziko la pantsi. (Psalymo 37:​9-​11) Kuphedwa kumweku kun’dzacitika pa ‘citsautso cikulu’ ndipo kun’dzamalira pa Armagedo.​—Mateu 24:21, 22; Cibvumbulutso 16:14, 16.

Kodi ni lini pomwe dziko lin’dzamala?

Jezu adalewa kuti: ‘Kulewa bza ntsiku imweyo na nthawe yace palibe omwe an’dziwa, ne wanjo wa kudzulu ne Mwana, koma Baba yekha.’ (Mateu 24:36, 42) Ndipo iye adalewa pomwe kuti nthawe yakumala kwa dziko in’dzakhala yakusaya kudikhiririka, ‘nthawe yomwe mukuikumbukira lini.’​—Mateu 24:44.

Napo kuti tingadziwe lini bwino-bwino ntsiku na nthawe, Jezu adapereka ‘cizindikiro’ ayai kuti bzakucitika, bzomwe bzingadadzalatiza kuti yafika nthawe yakumala kwa dziko. (Mateu 24:​3, 7-​14) Bibliya limbalewa bza nthawe imweyi kuti ‘nthawe yakumalizira’ ‘nthawe zakumalizira’ na ‘ntsiku zakumalizira.’​—Danyeri 12:4; God’s Word Bible; 2 Timotio 3:​1-5.

Kodi pana cinthu comwe cin’dzapitiriza kukhala ciripo pa mbuyo pakumala kwa dziko?

Inde. Dziko la pantsi lin’dzapitiriza kukhala liripo, thangwe Bibliya limbalewa kuti ‘Iro lin’dzacoka lini, mpaka kale-kale.’ (Psalymo 104:5) Ndipo dziko la pantsi lin’dzadzala na wanthu, thangwe Bibliya limbalewa kuti: ‘Anyakulungama an’dzatambira dziko la pantsi, acidzakhala m’mwemo mpaka kale-kale.’ (Psalymo 37:29) Mulungu an’dzabweresa bzinthu bzabwino bzomwe iye akhafuna pakuyamba, bzomwe ni:

• Paraizo.​—Zaiya 35:1; Luka 23:43.

• Nkhomeko na moyo wabwino.​—Mikeya 4:4.

• Basa labwino na lakudekeza kwa wentse.​—Zaiya 65:21-​23.

• Kumala kwa matenda na kukalamba.​—Djobi 33:25; Zaiya 33:24.