Kodi Mulungu Ambakhala Kuponi?
Bzomwe Bibliya limbalewa
Mulungu ambakwanisa kuwona bzinthu bzense, ndipo angacite cinthu ku mbuto iri-yense yomwe afuneyo. (Mimwani 15:3; Wahebereu 4:13) Tsono, Bibliya limbapfunzisa lini kuti Mulungu ambakhala kwense-kwense. M’mbuto mwace, Bibliyalo limbapfunzisa kuti iye ana makhalidwe ninga yomwe ifepano tinayo, ndipo ana mbuto yace caiyo yakukhala.
Momwe Mulungu adakhalira: Mulungu ni mzimu. (Juwau 4:24) Iye angawonedwe lini na wanthu wa thupi la nyamafe. (Juwau 1:18) Masomphenya yomwe yadanembedwa m’Bibliya yakulewa bza Mulungu, yambalatiza kuti Mulungu ana mbuto yace caiyo yakukhala. Bzimbalewedwa kuti iye ali kwense-kwense.—Zaiya 6:1, 2; Cibvumbulutso 4:2, 3, 8.
Komwe Mulungu ambakhala: Mulungu ambakhala kudzulu komwe kudasiyana kwene-kwene na pansi pano, komwe kuna bzinthu bzakuwoneka na maso na bzakuphatika. Kudzuluko ndiko ‘mbuto yace caiyo yakukhala.’ (1 Wamambo 8:30) Bibliya limbalewa kuti pa nthawe inango, bzakulengedwa bzauzimu bzidayenda ‘kukawonekera pa maso pa Yahova,’ * bzomwe bzinkulatiza kuti Mulungu ana mbuto yace caiyo yakukhala.—Djobi 1:6.
Penu Mulungu ambakhala lini kwense-kwense, kodi iye angacitedi thupo na inepano pa ndekha?
Inde. Mulungu ambacita thupo na munthu ali-wense pa yekha. Napo Mulungu ambakhala kudzulu, iye ambawona pansi pano wanthu omwe ambafuna kucita bzinthu bzomwe bzimbamudekera, aciwathandiza. (1 Wamambo 8:39; 2 Nkhani 16:9) Onani momwe Mulungu ambalatizira thupo lace kwa wanthu omwe ambamunamata bzacadidi:
Mukambapemba: Yahova ambabva mpembo wanuyo pa nthawe yomwe munkupembayo.—2 Nkhani 18:31.
Mukatsautsika mtima: ‘Yahova ali pafupi na wale omwe adasweka mtima; Iye ambapulumusa wale omwe atepa.’—Psalymo 34:18.
Mukafuna kutsogoleredwa: Yahova an’dzakupfunzisani na kukupasani malango mwakuphatisa basa Fala lace, Bibliya.—Psalymo 32:8.
Makumbukidwe yakuphonyeka yakulewa bza komwe Mulungu ambakhala
Makumbukidwe Yakuphonyeka: Mulungu ali kwense-kwense na m’bzinthu bzense bzomwe iye adalenga.
Bzomwe Bibliya limbapfuzisadi: Mulungu ambakhala lini pa dziko la pansi pano ne m’cinthu ciri-cense comwe iye adalenga. (1 Wamambo 8:27) N’cadidi kuti nyenyezi pabodzi na bzinthu bzinango bzakulengedwa ‘bzimbadziwisa mbiri ya Mulungu.’ (Psalymo 19:1) Tsono, Mulungu ambakhala lini m’cinthu ciri-cense comwe iye adalenga, ninga momwe nyakunemba cithunzi-thunzi ambakhala lini m’cithunzi-thunzi comwe adanembaco. Tsono, cithunzi-thunzico cimbatiuza bza momwe adakhalira munthu omwe adacinembayo. Mu njira ibodzi-bodziyi, bzinthu bzomwe Mulungu adalenga, bzimbatilatiza ‘makhalidwe yakusaya kuwoneka ya Mulunguyo’, ninga mphanvu, nzeru na lufoyi.—Waroma 1:20.
Makumbukidwe Yakuphonyeka: Mulungu an’funika kukhala kwense-kwense kuti ambakwanise kudziwa bzinthu bzense na kukhalambo wamphanvu-zense.
Bzomwe Bibliya limbapfuzisadi: Mzimu wakucena wa Mulungu, ni mphanvu yomwe Mulungu ambaphatisa basa kuti acite kufuna kwace. Na mphanvu imweyi, iye ambakwanisa kuzindikira na kucita cinthu ciri-cense ku mbuto iri-yense na pa nthawe iri-yense mwakusaya kucita kukhaliratu kumweko.—Psalymo 139:7.
Makumbukidwe Yakuphonyeka: Pa Psalymo 139:8 pambapfunzisa kuti Mulungu ambakhala kwense-kwense. Vesiri limbati: ‘Ndicikwira kudzulu, imwepo mun’dzakhala muli kumweko. Ndipo, ndicigona ku Thenje, imwepo mun’dzakhala muli kumweko basi!
Bzomwe Bibliya limbapfuzisadi: Vesiri limbalewa lini bza mbuto yomwe Mulungu ambakhala, koma limbandopfunzisa kuti kulibe komwe n’kutali kwene-kwene kuti Mulungu atazire kucita cinthu na cakulinga cakuthandiza wanthu wace.
^ Yahova ni dzina la Mulungu ninga momwe Bibliya limbalewera.
Imwepo Mungakomedwembo na
MITAWIRO YA MIBVUNZO YAKULEWA BZA BIBLIYA
Kodi Mulungu An’dzandibva Ndikapemba?
Kodi Mulungu ambacitadi thupo na mabvuto yathu?
BZA IFE
Kumbirani kuti Mboni za Yahova zidzakuzungireni.
Cezani Nkhani za m’Bibliya na Mboni za Yahova ayai yezerani kupita mu programa yathu yakukumbirira pfunziro la Bibliya la fovolo.