Ong-Li ni Mboni ya Yahova ya ku dziko la Bulgária. Iye ambapfunza Bibliya na mkazi munango omwe dzina lace ni Zlatka, tsono mwamuna wa mkazi umweyu ambapfunza lini Bibliyalo. Tenepo, Ong-Li adati: “Pomwe tikhapfunza bza moyo wa m’banja, inepano ndidabvekesa nfundo ya kufunika kumbauza azibayathu na wana wathu kuti timbawafuna. Nditalewa bzimwebzo, Zlatka adandinyang’anisa na nkhope yakusunama, acindiuza kuti iye akhanati kuuza bayace ayai mwana wace mkazi wa magole 9 kuti akhawafuna kwene-kwene!”

Ndipo adalewambo kuti: “Ningacite ciri-centse kuti ndiwathandize, tsono kuwauza kuti nimbawafuna, bzingandinese. Thangwe mai wangu akhandiuza lini bzimwebzo, ndipo iwo akhauzidwambo lini bzimwebzo na mai wawo.” Tsono, Ong-Li adalatiza Zlatka kuti napo Yahova caiye akhacita kulewa mwakubveka kuti akhafuna Jezu, mwana wace. (Mateu 3:17) Ndipo Ong-Li adauza Zlatka kuti apembe kwa Yahova, acimuuza bza nkhaniyo, na kukhalambo na cakulinga ca kumuuza bayace na mwana wace kuti ambawafuna.

Ong-Li adati: “Pambuyo pa ntsiku ziwiri, Zlatka adadzandiuza mwakukomedwa kuti adadzapembadi kwa Yahova kuti amuthandize. Ndipo pomwe bayace adabwerera kumui, iye adamuuza kuti wapfunza m’Bibliya kufunika kwa mkazi kumbalemekeza na kufuna bayace. Ndipo pambuyo pa kudikhiza pang’ono, iye adauza bayaceyo kuti ambamufuna kwene-kwene! Pomwe mwana wace adabwera kumuiko, Zlatka adamukolombexa, acimuuzambo kuti ambamufuna! Zlatka adati: ‘Tsapano ndapepukidwa. Magole yentseneya mtima wangu ukhadafunga, tsono na thandizo la Yahova, tsapano ningakwanise kuuza bayangu na mwana wangu kuti nimbawafuna.’

Ndipo Ong-Li adalewa pomwe kuti: “Pambuyo pa mdzinga ubodzi, ndidadzagumana na mwamuna wa Zlatka, ndipo iye adandiuza kuti: ‘Wanthu azinji andiuza kuti Zlatka alibe kundopfunza namwe Bibliya, koma pfunzirolo lathandizambo banja lace. Tsapano ifepano ndife wakukondwa, ndipo timbabverana kwene-kwene.”