Pa ntsiku inango, Bob akhafambisa karo yace mu liwiro la 100 quilômetro por hora ku Alberta, m’dziko la Canadá. Nsiku imweyo kukhadjedjera kwene-kwene, ndipo kukhacita conzi na kugwa mvula. Ndipo mwadzidzidzi, idaphoka roda ya m’mambo ya karo yace. Pakuyamba, Bob alibe kudziwa bzomwe bzikhadacitika, ndipo akhapitiriza na ulendo bwace kuti akafike ku mui pa mtantho wa makilometro maxanu.

Mu tsamba lomwe iye adanembera gwere la Mboni za Yahova m’deralo, Bob adafotokoza bzomwe bzidacitika. Iye adati: “Alumbwana atatu na atsikana awiri akhali m’karo yomwe ikhafamba pafupi na yangu, ndipo iwo adandiuza na pa janela kuti roda ya karo yangu ikhadaphoka. Tenepo, tidaimisa karozo m’phepete mwa mseu, ndipo iwo adalewa kuti angadandithandiza kucinja rodayo.” Pa nthaweyo ndikhadziwa lini penu ndikhana roda inango ayai makako yakudzusira karo. Tsono, pomwe iwo adasuzumira pansi pa karoyo, adawona kuti ikhalipo roda inango na makako, ndipo adandicinjira rodayo. Pomwe akhacinja rodayo, inepano ndikhadakhala pa kadera yangu ya maroda m’phepete mwa mseu. Napo kuti iwo akhadabvalira bwino, adandicinjira roda ire, ndicikwanisa kupitiriza na ulendo bwangu. Ningadakwanisa lini kucita ndekha bzimwebzo.

“Ndikutenda kwene-kwene maswaka maxanu yale yomwe ni Mboni za Yahova thangwe ra kundithandiza. Iwo adagumanika m’dera lire thangwe akhapalizira m’nyumba za wanthu, ndipo ambacitadi bzomwe ambapalizira anzawo. Ndikuwatenda kwene-kwene, thangwe angadasaya kundithandiza, inepano ningadabonera kwene-kwene. Bzidandokhala ningati Mulungu awatumiza kuti adzagumane nande.”