Ntsiku inango, Eliso omwe ni Mboni ya Yahova, akhapfunza Bibliya na mkazi munango omwe akhafuna kwene-kwene kudziwa bzizinji. Ndipo, mwadzidzidzi, adabwera alendo omwe akhali m’busa munango na mkazace. Eliso akhadabva kuti iwo akhadafedwa mwana wawo m’bodzi yekha omwe akhanaye.

Eliso adawapepesa thangwe ra kufedwa mwanayo, ndipo m’busa ule na mkazace adayamba kulira kwene-kwene. Patsogolo pace, na ciya kwene-kwene m’busayo adati: “Ndikutaza kubvesesa thangwe lomwe lacitisa Mulungu kulekerera kuti tigwedwe na tsoka limweri! Kodi thangwe ranyi iye wanditengera mwana wangu? Akhali yekhayo basi! Ndikutumikira Mulungu kwa magole 28, ndipo inepano nimbacita bzinthu bzabwino bzokha-bzokha. Tsono lero iye angandibwezere na bzimwebzi! Thangwe ranyi Mulungu wapha mwana wangu?”

Eliso adawafotokozera kuti Mulungu alibe kuwatengera mwana wawo. Ndipo adaceza nawo bza ntsembe yakulombolera ya Jezu, cidikhiro cakulewa bza kumuka kwa anyakufa na thangwe lomwe limbacitisa Mulungu kulekerera kuti bzinthu bzakuipa bzicitike. M’busayo na mkazace adalewa kuti Eliso akhadawatawira mibvunzo yomwe iwo akhadaipempherera.

Mdzinga wa mangwana yace, m’busa ule na mkazace adadzayenda pomwe kumui kwa mkazi ule, ndipo adakhala kuti apfunzembo Bibliyalo. Ntsiku imweyo, Eliso akhapfunza na mkaziyo nkhani yakuti “Cidikhiro Cakutsimikizirika Kuna Wakufunidwa Wanu Womwe Adafa,” m’bukhu lakuti Kodi Bibliya Limbapfunzisa Ciyani Maka-maka? Alendo wace akhabvesera bwino-bwino, ndipo akhatawirambo mibvunzo.

Pa nthawe yomwe kukhana mtsonkhano wakupambulika wa Mboni za Yahova ku Tbilisi, Georgia, banjalo lidayendambo ku mtsonkhanoko, ndipo lidakomedwa kwene-kwene kuwona lufoyi na ciphatano comwe ciripo pakati pa atumiki wa Yahova. Iwo akhadacita nyongo yakulimbisa wanthu wa m’gereja mwawo kuti ambalatizane makhalidwe yamweya koma bziribe kukwanisika.