Irma, ni mpfumakazi yomwe imbakhala ku dziko la Alemanha, ndipo ana pafupi-fupi magole 90 yakubadwa. Iye adacita ngozi ziwiri, zomwe zidacitisa kuti acitidwe operasau zakusiyana-siyana ku xipitali. Iye ambakwanisa lini pomwe kuyenda kukapalizira nyumba na nyumba. Ntsiku zino, Irma ambafotokozera wanthu bza cikhulupiro comwe anaco mwakucita kumbawanembera matsamba. Wanthu ambakomedwa kwene-kwene kutambira matsamba yacipepeso yomwe iye ambawanembera thangwe yambawalimbisa. Kawiri-kawiri, wanthuwo ambamupfuwira mtedwe kuti amubvunze bza ntsiku yomwe an’dzawatumizira tsamba linango. Irma ambatambirambo matsamba mazinji ya wanthu omwe ambamutenda na kumukumbira kuti awanembere pomwe tsamba linango. Irma adati: “Inepano nimbakomedwa na bzentsenebzi, ndipo bzimbandithandiza kupitiriza kukhala munthu wakulimba mwauzimu.”

Irma ambatumizambo matsamba kwa wale omwe ambakhala m’nyumba zakusamalira nkhalamba. Iye adati: “Mkazi munango wacikulire adandipfuwira mtedwe, acindiuza kuti tsamba lomwe ndikhadamutumizira lidamulimbisa kwene-kwene pambuyo pakufedwa bayace. Iye akadakoya tsambalo pakati pa Bibliya lace, ndipo ambaliwerenga usiku. Ndipo mkazi munango pomwe omwe adafedwambo bayace, adandiuza kuti tsamba lomwe ndikhadamutumizira lidamuthandiza kwene-kwene kuposa upalizi bwa abusa wace. Iye akhana mibvunzo mizinji, ndipo adandibvunza penu ningadabvuma kuti adzandizungire.”

Ndipo mkazi munango omwe si Mboni adakumbira kuti Irma amunemberembo tsamba. Irma adati bza mkazi umweyo: “Iye akhakoya matsamba yentse yomwe ndidamunembera. Ndipo pomwe adafa, mwana wace mkazi adandipfuwira mtedwe, acindiuza kuti akhadawerengambo matsamba yentse yomwe ndikhadanembera mai wace, ndipo adandibvunza penu ndingadabvuma kuti nimbamunemberambo matsamba yakulewa bza nfundo za m’Bibliya.”

Irma ambakomedwa kwene-kwene na upalizi bwace. Iye adati: “Nimbadandaulira Yahova kuti apitirize kumbandipasa mphanvu zakumutumikira. Napo ndingayende lini pomwe kukapalizira nyumba na nyumba, inepano nimbacita bzomwe bzire ndingakwanise.”