Mu gole la 2007, munthu munango wa ku Eritrea adathawa kwawo, aciyenda ku Noruega. Kumweko iye adagumana na Mboni za Yahova zomwe zidamupalizira, ndipo iye adalewa kuti akhadagumana kale na Mboni za Yahova ku dziko lace. Iye adafotokoza kuti pomwe akhali m’cikunda ku Eritrea akhawona kuti Mboni za Yahova zomwe zikhali m’kawoko zikhalamba kukakamizidwa kucita basa la ucikunda napo kuti zikhacitiridwa ciwembo cadzawoneni.

Tsono mwadzidzidzi, cidacitika cinthu cinango comwe cidacitisa kuti munthuyo amangidwe, acifungiridwambo m’kawoko. Ndipo ali m’kawokomo, iye adagumana na Paulos Eyasu, Negede Teklemariam na Isaac Mogos omwe akhali Mboni za Yahova. Iwo akhadafungiridwa m’kawoko kuyambira mu gole la 1994 thangwe ra cikhulupiro cawo.

M’kawokomo, munthuyo akhacita kuwona yekha kuti Mboni za Yahova zimbacita bzomwe zimbapfunzisa anzawo. Akhawonambo kuti Mboni za Yahova zikhacita bzinthu mwakukhulupirika, ndipo zikhapasa anyam’kawoko anzawo cakudya cawo. Ndipo akhawona pomwe kuti anyam’kawoko omwe akhali Mboni za Yahova akhapfunza Bibliya pabodzi ntsiku-zentse, ndipo akhacemera anzawo kuti adzapfunze nawo. Nthawe zinango Mbonizo zikhapasidwa mpata wakucosedwa m’kawokomo malinge asinali dzina lawo pa tsamba lakulewa kuti akhasiya kukhala Mboni za Yahova, tsono zikhalamba.

Bzomwe munthuyo adawona bzidacitisa kuti iye afune kudziwa bzizinji, ndipo pomwe adadzakakhala ku Noruega, iye adafuna kudziwa thangwe lomwe limbacitisa kuti Mboni za Yahova zikhale na cikhulupiro cakulimba. Tenepo, pomwe Mbonizo zidadzagumana naye, iye adayambiratu kupfunza Bibliya na kumbayenda ku mitsonkhano.

Mu mwezi wa Setembro 2018, iye adabatizidwa, acikhala Mboni ya Yahova. Tsapano iye akucita nyongo yakumbapalizira wanthu wa ku Eritrea na Sudão na kumbawalimbisa kuti ambapfunze Bibliya kuti nawombo akhale na cikhulupiro cakulimba.