Nsiku inango, Artur, omwe ni nyakunyang’anira dera wa ku Armênia, adazungira gwere libodzi la Mboni za Yahova. Kumweko iye adawona kuti abale omwe akhazungirawo akhanati kuyamba kumbapalizira na tungolo. Pakufuna kulimbisa abalewo kuti ambacitembo upalizi bwa mtundu umweyo, nyakunyang’anira derayo na mkazace Anna pabodzi na m’bale munango dzina lace ni Jarayr adaimisa kangolo pa mseu wa mu mzinda unango ung’ono. Iwo adasankhula kuimisa kangoloko pa mbuto yomwe ikhapitidwa na wanthu azinji.

Pa nthawe ibodzi-bodziyo wanthu omwe agwata na pamwepo akhaima, acimbatenga mabukhu na marevista. Tsono, anyakutsutsa adawona abale wathuwo akupalizira ndipo alibe kudekedwa nabzo. Tenepo, wansembe awiri adafika pomwe pakhana kangoloko, ndipo mwadzidzidzi m’bodzi adabutsula kangoloko, acimenyambo mbama m’bale Artur na kumugwesera pantsi magirazi yace ya maso. Artur, Anna na Jirayr adayezera kulewalewa na wansembewo mwakusaya kukalipa, koma bziribe kukwanisika. Wansembewo adakaponda-poda kangoloko, ndipo mabukhu yentse adamwazika. Patsogolo pace, iwo adapsula na kuwagopswa abalewo, acidzamalizira kuyenda.

Artur, Anna na Jirayr adayenda kwa wamphanvu zaumangi, acikawauza bza nkhaniyo mwakuwadandaulira. Iwo adafotokoza bzomwe bzidacitikabzo, na kuuzambo wamphanvu zaumangiwo bzomwe Bibliya limbapfunzisa. Patsogolo pace, Atatuwo adauzidwa kuti akalewelewe na mkulu wamphanvu zaumangi. Pakuyamba mkulu wamphanvu zaumangiyo akhandofuna kubva madandaulo yawo. Tsono, pomwe adawona kuti napo Artur ni munthu wamphanvu, iye alibe kuwabwezera wansembe atatu wale, mkuluyo adasiya kubvunza bzinthu bzakubverana na nkhaniyo, aciyamba kubvunza bzomwe Mboni za Yahova zimbakhulupira. Bzimwebzo bzidacitisa kuti wanthuwo aceze kwa maora manai. Wamphanvu zaumangiwo adakomedwa na bzomwe adauzidwabzo mwakuti adalewa mwakukuwa kuti: “Cipembedzo ndico cipembedzo! Ndin’funambo kucipita!”

Mwangwana yace, Artur adayenda pomwe kukapalizira na kangolo pa mbuto ibodzi-bodziyire, ndipo iye adafendereredwa na munthu omwe akhadawona bzomwe bzikhadacitika dzulo lace. Munthuyo adatenda m’bale Artur thangwe ra kukwanisa kuuphata mtima wace na kusaya kubwezera. Ndipo adalewambo kuti bzomwe adawonabzo bzidacitsa kuti asiye kumbawalemekeza wansembe wale.

Maulo yace, mkulu wamphanvu zaumangi ule adauza Artur kuti abwere adzaceze naye pomwe. Tsono mbuto mwakuti acezerane bza nkhani ikhadacitikayo, iye akhandofuna kubvunza bzinthu bzizinji bzakubvera na nkhani za m’Bibliya. Wamphanvu zaumangi winango awiri adabwera, acibveserambo maceza yawoyo.

Mangwana yace pomwe, Artur adayenda kwa mkulu wamphanvu zaumangi ule kuti akamulatize mavidiyo ya nkhani za m’Bibliya. Mkulu wamphanvu zaumangiyo adacemera anzace kuti adzawonembo mavidiyoyo.

Makhalidwe yakuipa ya wansembe wale yadacitisa kuti wamphanvu zaumangi azinji ayambembo kubva nkhani za m’Bibliya. Wamphanvu zaumangiwo adacita kuwona wokha kuti Mboni za Yahova ni wanthu wa makhalidwe yabwino.