“Penu imwepo mumbakhulupira kuti Bibliya ni mafala ya Mulungu yomwe adanembera wanthu, bzimwebzi bzikufuna kulewa kuti Mulungu ambalewalewa nafe. . . . Penu cipembedzo cimbatokonya mbali zentse za moyo wanu, mun’funikambo kukhala na Bibliya mu cirewedwe comwe mumbalewalewa ntsiku zentse.” Mafalaya yadanembedwa na nyakupfunza winango wakucemeredwa Alan S. Duthin m’bukhu lace lakuti Bible Translations and How to Choose Between Them.

Wanthu omwe ambafuna Fala la Mulungu ambabvuma bzimwebzi na mtima wentse. Ndipo iwo ambakhulupira kuti “Bzinembo bzentse bzidafuliziridwa na Mulungu ndipo mpsakuthandiza pa kupfunzisa, pa kutsimula, pa kulungamiza bzinthu na pa kulanga mwakulungama.” (2 Timotio 3: 16) N’cadidi kuti Bibliya lidanembedwa kale-kale, koma iro “ndamoyo na la mphanvu” thangwe iro limbatithandiza kulimbana na mabvuto yathu ya ntsiku na ntsiku. (Ahebereu 4: 12) Kuti bukhu lakupambulikali libvesesedwe na kuphatisidwa basa na anyakuliwerenga, lin’funika kugumanika mu cirewedwe comwe cimbalewedwa na wanthu ntsiku na ntsiku.

Kwa imwepo mwentse omwe mumbafuna Mafala ya Mulungu, tikukudziwisani bza kucosedwa kwa Bibliya Lakusanduliziridwa la Dziko Lipsa Mateu-Apokalipse m’Cinyungwe. Mboni za Yahova zidapereka cidziwisoci pa 27 Junho 2021, mwakuphatisa basa TV, radiyo zakukwana 11 na pa jw stream. M’Bale Adão Costa wa m’komiti ya nthambi ya Moçambique ndiye omwe adapereka cidziwisoci. Wanthu wakupitirira 19.000 adatetekera mtsonkhano wakupambulikayu. Ndipo apalizi wakupitirira 2.500 omwe ambalewalewa Cinyungwe, adakomedwa kwene-kwene na kutambira Bibliya mu cirewedwe comwe cimbalewedwa na wanthu ntsiku na ntsiku. Bibliyali lidasanduliziridwa mwakubveka bwino na mwakulondoza, bzomwe bzikucitisa kuti Fala la Mulungu libveseseke bwino mu cirewedwe ca Cinyungwe. Pinango pentse mukudabwa ndipo mukufuna kudziwa kuti, kodi mbani omwe ambacita basa limweri?

Napo kuti Bibliya Lakusanduliziridwa la Dziko Lipsa la Bzinembo Bzacigerego Bzacikristau ndacirendo kwa wanthu omwe ambalewalewa Cinyungwe, Bibliyali lakhala likusanduliziridwa mu bzirewedwe bzizinji kuyambira mu 1950. Mu gole limweri Bibliyali lidacosedwa mu Cingerezi na Associação Torre de Vigia de Bíblias e Tratados​—pa mtsonkhano wa madziko, ndipo kumweku kukhali kuyamba kucita basa limweri lakusandulizira Bibliya. Ntsanza ya Mulindiri ya 15 Setembro 1950, idalewa kuti: “Wanthu omwe akhatenga mbali mu komiti yakusandulizira Bibliya, adalatiza cakulinga cawo . . . mwakubisa madzina yawo, iwo alibe kufuna kudziwika pa nthawe yomwe akhana moyo napo pomwe afa. Cakulinga cakusandulizira Bibliyali ni kutumbiza dzina la Mulungu wamoyo na wacadidi.”

Bibliya Lakusanduliziridwa la Dziko Lipsa lidacosedwa mu gole la 1961. Napo kuti madzina ya anyakusandulizira Bibliyali yambadziwika lini mpaka ntsiku zino, palibe mathangwe yakufuna kudziwira bzimwebzo ayai kubzipereka komwe iwo adacita. Mafala yakuyambirira ya Bibliya lomwe lidacoka mu 2013 yambati: “Timbadziwa kufunika kwa mafala ya m’Bibliya, takhala tceru ticiwona pomwe mafalaya, ndipo tayasandulizira mu njira yakusaya kunesa kuwerenga na kubvesesa na kulemekezambo nkhani zentse zakugumanika m’mwemo. Tikudziwa kuti udindo bwathu bukulu ni kusandulizira mu njira yakulondoza . . . Ndipo Cakulinga cathu cikulu ni kusandulizira mwakukhulupirika mafala yakucokera ku Cihebereu na Cigerego na kuyasandulizirambo mu njira yakubveseseka na yakusaya kunesa kuwerenga.”

Mpaka lero, makopiya yakupitirira 222 000 000 ya Bibliya Lakusanduliziridwa la Dziko Lipsa yadacosedwa cipande ayai lentse mu bzirewedwe bzakupitirira 190 pa dziko lentse. Kodi anyakuwerenga azinji azindikira ciyani na Bibliya limweri?

Jezu adapfunzisa anyakupfunza wace kupemba kuti: “Baba wathu omwe muli kudzulu, dzina lanu licenesedwe.” (Mateu 6:9) Bibliya limbalewa kuti dzina la Mulungu ni Yahova ndipo limbagumanika maulendo pafupi-fupi 7000. (Kufuluka 3:15; Masalimo 83:18) Pomwe apostolo wa Jezu adamala kufa, Akristau wakuyambirira adatokonyedwambo na makumbukidwe yakuphonyeka yomwe Adjuda azinji akhanawo yakuleka kuphatisa basa Dzina la Mulungu. (Mabasa 20:29, 30; 1 Timotio 4:1) Wanthu omwe akhacita makopiya ya Bzinembo bza Cigerego adayamba kucosa dzina la Mulungu, Yahova, m’mbuto mwace akhaikha “Mulungu” na “Mbuya.”

Komiti ya Bibliya Lakusanduliziridwa la Dziko Lipsa lidabwezeresa dzina la Mulungu lakuti Yahova mu Bzinembo Bzacigerego Bzacikristau, * ndipo dzinali limbagumanika maulendo yakupitirira 237. Anyakusandulizira Bibliyali alibe kundoikha dzinali mwa kufuna kwawo, koma adafufudza kwene-kwene kuti agumane mbuto zomwe dzinali likhagumanika. Mwa ciratizo, pa Luka 4:18 pana mafala yakucokera pa Zaiya 61:1. Mafala yakumbirira mu Cihebereu, dzina lakuti Yahova likhagumanika mu vesi limweri la Zaiya. Tenepo, mpsakuthemera kuti mu Bibliya Lakusanduliziridwa la Dziko Lipsa pa Luka 4:18 palewe kuti: “Mzimu wa Yahova uli pa ine, ndipo iye wandisankhula kuti ndipalizire mafala yabwino kwa anyakusauka.”

Mavesi yamweya yambathandiza anyakuwerenga kusiyanisa pakati pa Yahova Mulungu na Mwana wace wakubadwa yekha, Jezu Kristu. Mwa ciratizo, anyakusandulizira azinji pa Mateu 22:44 ambanemba kuti: “Mbuya adalewa kuna Mbuya wangu.” (Bible Wycliffe) Tsono, pamwepa mbani omwe akulewalewa na mwanzace? Mafala ya vesi limweri yadacokera pa Masalimo 110:1, ndipo mafala yakuyambirira ya Cihebereu, dzina la Mulungu likhagumanika. Ndipopa Bibliya Lakusanduliziridwa la Dziko Lipsa pa Mateu 22:44 limbalewa tenepa: “Yahova adauza Mbuya wangu.” Bzikucita kuwonekeratu padeca kusiyana komwe kulipo pakati pa Yahova Mulungu na Mwana wace. (Marko 13:32; Juwau 8:17, 18; 14:28) Kuzindikira kusiyana kumweku kun’dzatithandiza kuti tidzapulumuke. Pa Mabasa 2:21 pambalewa kuti: “Munthu ali-wentse omwe an’dzacemera dzina la Yahova, an’dzapulumuka.”

Anyakusandulizira adacita nyongo yakusandulizira mafala yakuyambirira ya Cigerego mu njira yakukhulupirika na yakusaya kunesa kubvesesa mu bzirewedwe bzakulewedwa ntsiku na ntsiku na wanthu. Mwa ciratizo, mu Bibliya Lakudanduliziridwa la Dziko Lipsa, mafala ya Cigerego yabvekesedwa bwino. Mu bzirewedwe bzizinji ntsiku zino, mafala manango yambabveka ninga kuti akulewa bzinthu bzomwe bzidacitika​—m’mbuyo ayai akulewa bza kutsogolo. Tsono mu Cigerego fala libodzi lingalewe bzinthu bzomwe bzidacitika m’mbuyo ayai bzomwe bzikucitika. Bwerani tiwone bzimwebzo na mafala ya Jezu pa Mateu 6:33. Fala la Cigerego lomwe lasanduliziridwa kuti “kuikha” limbathandauza cinthu comwe cikupitiriza kucitidwa. Kuti mafala yakuphata mtima yomwe Jezu adalewa yabveke bwino, anyakusandulizira adanemba tenepa: “Pitirizani kuikha Umambo bwa Mulungu na cirungamo cace pa mbuto yakuyamba, ndipo bzinthu bzinango bzentse bzin’dzathumiziridwa kwa imwepo.” Mpsibodzi-bodzimbo na Mateu 7:7 adasanduliziridwa tenepa: “Pitirizani kukumbira ndipo mun’dzapasidwa; pitirizani kunyang’ana, ndipo mun’dzagumana; pitirizani kugogodza, ndipo mun’dzafunguliridwa.”​—Aroma 1:32; 6:2; Agalatiya 5:15.

Kucosedwa kwa Bibliya la Bzinembo Bzacigerego Bzacikristau m’Cinyungwe ni ciyambi basi. Pakukhazikisidwa makonzedwe yakusandulizira Bibliya lentse pa nthawe yace yakuthemera. Kodi omwe aniwerenga Bibliyali mu Cinyungwe angakhulupiredi kuti Bibliyali ndakulondoza na lakubveka bwino ninga momwe liriri Bibliya la Cingerezi?

Inde, an’funika kukhulupira. Thangwe ndakuti basa lakusandulizira limbakhala likunyang’aniridwa na Bungwe Lakutonga la Mboni za Yahova. Mwa nzeru, iwo adasankhula kuti basa limweri limbacitidwe na wanthu azinji, m’mbuto mwa munthu m’bodzi. (Mimwani 11:14) Tenepo, padakhazikisidwa mathimu ya anyakusandulizira pa dziko lentse la pantsi. Ku Likulu la pa Dziko Lentse la Mboni za Yahova kudakhazikisidwa dipatimenti Yakunyang’anira Basa Lakusandulizira kuti imbathandize anyakusandulizira pa bzomwe iwo akufunikira, kutawira mibvunzo ya anyakusandulizirawo na kunyang’anira basa lakusandulizira Bibliya m’bzirewedwe bzakusiyana-siyana. Kuthumizira bzimwebzi, programa ya pa komputadori yakucemeredwa Watchtower Translation System idakonzedwa mu njira yakuti ithandize anyakusandulizira Bibliya. Bzinthu bzinango bzomwe programayi imbathandiza mpsakuti imbalatiza fala liri-lentse la Cihebereu na Cigerego, momwe lidasanduliziridwira mu Cingerezi, bzimwebzi bzimbathandiza kusankhula fala lakuthemera mu cirewedwe comwe akusandulizira. Napo bziri tenepo, nyongo ya anyakusandulizira njakufunika kuti basali lifambe bwino. Tsono mwakuphatisa basa programa imweyi ya pa komputadori, bzathandiza mathimu yakusandulizira Bibliya kucita basali mwakamfulumize koma licikhala lakulondoza na lakubveka bwino ninga momwe liriri Bibliya la Cingerezi.

Tikukulimbikisani kuphatisa basa Bibliya Lakusanduliziridwa la Dziko Lipsa Mateu–Apokalipse m’cinyungwe. Mungaliwerenge mwa kupita pa internet, mu JW Library ayai mungakumbire kopiya yakudindidwa ya Bibliyali ku gwere la Mboni za Yahova ku mbuto yomwe mumbakhala. Munikomedwambo kudziwa kuti Bibliyali lina bzinthu bzomwe bzingakuthandizeni kuliphatisa basa bwino ninga: Nkhani Zomwe Ziri m’Bukhuli na Kafotokozedwe ka mafala manango. Pa mbali ya nkhani zomwe ziri m’bukhuli, inkuthandizani kudziwiratu nkhani zomwe ziri m’bukhu liri-lense na kuti mufulumize kuphata mavesi ya nkhani yomwe mukufuna. Koma cinthu cakufunika n’cakuti, imwepo mungawerenge Bibliyali na citsimikizo centse kuti linkuthandizani kubvesesa Fala la Mulungu mu cirewedwe comwe wanthu ambalewalewa ntsiku zentse.