Ifepano timbatcenkha lini wanthu wale omwe adabatizidwa ninga Mboni za Yahova, koma adasiya kupalizira, ayai kusiyiratu kutsonkhana nafe. Kulewa cadidi, ifepano timbacita nyongo yakuwafenderera kuti tiwathandize kuyamba pomwe kumbacita bzinthu bzauzimu.

Ndipo ifepano timbandocoseratu lini m’gwere munthu omwe acita pikado ikulu. Tsono, penu munthu omwe ni Mboni yakubatizidwa akupitiriza kuphonya mitemo ya m’Bibliya, ndipo akukungula lini, iye ambacosedwa m’gwere, ndipo timbasiya kulewalewa naye. Bibliya limbaleweratu padeca kuti: ‘Mucoseni nyakuipayo pakati panu.’—1 Wakolinto 5:13.

Tsono, tani penu munthu wakucosedwayo ana mkazi na wana omwe akadapitiriza ninga Mboni za Yahova? Mbverano wawo wauzimu umbamala, koma mbverano wawo wakuthupi umbapitiriza. Iwo ambapitiriza kucita bzinthu ninga banja na kumbalatizana lufoyi.

Wanthu wakucosedwa angabwere pa mitsonkhano yathu. Ndipo akafuna, angazungiridwe na akulu wa m’gwere kuti akawapase malango ya m’Bibliya. Cakulinga cawo cimbakhala kuwathandiza kuti athemere pomwe kukhala Mboni za Yahova. Wanthu wakucosedwa m’gwere omwe adasiya bzicito bzakuipa, acilatiza kuti akufunisisadi kubvera mitemo ya m’Bibliya pa moyo wawo, ambatambiridwa na manja mawiri acikhala pomwe Mboni ya Yahova.