Ifepano tidazindikira kuti wanthu azinji omwe ambapemphera kale ambakomedwa kuceza nafe nkhani za m’Bibliya. Timbalemekeza ufulu bwa munthu ali-wense kukhulupira bzinthu bzomwe bzimbasiyana na bzomwe ifepano timbakhulupira, ndipo timbakakamiza lini wanthu kubvuma bzomwe timbalewa.

Tikambaceza na wanthu bza nkhani za cipembedzo, timbateweza malango ya m’Bibliya yomwe yambalewa kuti timbacite bzimwebzo ‘mwa ulemu’ kwene-kwene. (1 Pedru 3:15) Timbadziwa kuti winango an’dzalamba kutibvesera. (Mateu 10:14) Tsono, ifepano timbadziwa lini momwe wanthu angatitawirire mpaka titayamba kulewalewa nawo. Ndipo timbadziwambo kuti munthu ambacinja.

Mwa ciratizo, munthu angakhale wakutanganidwa kwene-kwene lero, koma acifuna kudzaceza nafe nsiku inango. Ndipo wanthu angawonekeredwe na mabvuto yakusiyana-siyana yomwe yangacitise kuti afune kubva bzomwe Bibliya limbalewa. Ndipopa, ifepano timbalimbikira kulewalewa na wanthu mwakubwereza-bwereza.