Lacitatu Lakuyenda kwa Juwau 1:1-14
1 Ine munthu wacikulire,* ndikunembera iwepo Gayo, m’bale wangu wakufunidwa, nimbakufuna na mtima wangu wentse.
2 M’bale wangu wakufunidwa, inepano ndikupemba kuti bzinthu bzentse bzipitirize kukufambira bwino nakuti ukhale na thanzi labwino ninga lomwe unalo tsapano.
3 Pakuti ndidakondwa kwene-kwene pomwe abale adabwera, acindiuza kuti iwepo ukuphatisisa cadidi ndipo ukupitiriza kufamba m’cadidico.
4 Ndiribe cikondweso* cikulu kuposa ici: kubva kuti wana wangu akupitiriza kufamba m’cadidi.
5 M’bale wangu wakufunidwa, iwepo ukulatiza kuti ndiwe wakukhulupirika pa bzomwe umbacitira abale wako, napo ukuwadziwa lini.
6 Ndipo abalewo alewa bza lufoyi lako pamaso pa gwere. Tsono iwo akafuna kuyenda, cita bzentse bzomwe ungakwanise kuti uwathandize mu njira yomwe ingakondwese Mulungu.
7 Pakuti iwo ayenda kukapalizira m’dzina la Mulungu ndipo alamba kutambira cinthu ciri-centse kwa mitundu inango.
8 Ifepano tin’funika kutambira bwino wanthu amwewa, kuti tiphate nawo basa pabodzi pakudziwisa cadidi.
9 Ndanembera tsamba gwere, tsono Diyotrefe omwe ambafuna kukhala pa mbuto yakuyamba pakati pawo, akulemekeza lini cinthu ciri-centse comwe ifepano tingalewe.
10 Ndipopa inepano ndikabwera kumweko, nin’dzazimbula mabasa yentse yomwe iye akucita pakumwaza nkhani zakuipa pakulewa bza ife.* Kuthumizira bzimwebzi, iye ambalamba kutambira abale mwa ulemu ndipo wale omwe ambafuna kutambira bwino abalewo, iye ambayeza kuwaletsa ndipo ambawathamangisa m’gwere.
11 M’bale wangu wakufunidwa, leka kutewezera bzinthu bzakuipa, koma tewezera bzinthu bzabwino. Ule omwe ambacita bzinthu bzabwino ambacokera kwa Mulungu, tsono ule omwe ambacita bzinthu bzakuipa akanati kuwona Mulungu.
12 Wanthu wentse akulewa bwino bza Demetriyo ndipo cadidi cikucitirambo umboni. Ifepanombo tikumucitira umboni, ndipo iwepo ukudziwa kuti umboni bomwe tikubupereka n’bwacadidi.
13 Ndikhana bzinthu bzizinji kuti ndikunembere, tsono ndikufuna lini kucita kubzinemba patsamba.
14 Na tenepo, ndikudikhirira kudzakuwona tsapanopapa kuti ndidzalewelewe nawe maso na maso.
Mtendere ukhale nawe.
Azixamwali kuno akupereka kulimba kwa iwepo. Ndipo undiperekerembo kulimba kuna azixamwali wathu kumweko kwa m’bodzi na m’bodzi payekha.
Mafala ya m'nyantsi
^ Ayai, “mwamuna wa magole mazinji.”
^ Ayai pinango, “thangwe lomwe limbandicitisa kutenda kuposa iri.”
^ Mafala yace caiyo: “ambalewa magunkha mwakuphatisa basa mafala yakuipa.”
