Agai 1:1-15
1 M’gole laciwiri la utongi bwa mambo Dariyo, pa mwezi wacitanthatu, pa ntsiku yakuyamba ya mweziyo, Zerubabele mwana wa Selatiyeli omwe akhali governadori wa Djuda na Djoswa omwe akhali mkulu wa antsembe, mwana wa Jehozadaki, adatambira mafala ya Yahova kucokera kwa mpolofeta Agai* yakuti:
2 “Yahova wa anyankhondo walewa kuti: ‘Wanthuwa ambalewa kuti: “Nthawe yakumanga* nyumba* ya Yahova ikanati kufika.”’”
3 Yahova adauza pomwe mpolofeta Agai mafala yakuti:
4 “Kodi ino ni nthawe yakuti imwepo mukhale m’nyumba zanu zakukonzedwa bwino na matabwa, pomwe nyumba iyi ni matere?
5 Tsono Yahova Mulungu wa anyankhondo walewa kuti: ‘Kumbukirani bwino-bwino bzomwe mukucita.
6 Mukubzala mbeu zizinji, tsono mukubvuna bzing’ono-ng’ono. Mukudya koma mukukhuta lini. Mukumwa, koma mukukwana lini. Mukubvala, koma mukuthuma lini. Omwe akucita ganya akukoya kobiri zawo m’mabolosa yakubowoka.’”
7 “Yahova Mulungu wa anyankhondo walewa kuti: ‘Kumbukirani bwino-bwino bzomwe mukucita.’
8 “‘Ndokoni ku phiri ndipo mubwerese miti yakumangira nyumba. Mangani nyumbayi kuti ndikomedwe nayo nakuti nditumbizidwe,’ walewa tenepo Yahova.”
9 “‘Mukhadikhira bzinthu bzizinji, koma mwatambira bzing’ono-ng’ono, ndipo pomwe mudabzibweresa bzinthubzo m’nyumba mwanu, ndidabzimwaza na mphuwe. Thangwe ranyi? Thangwe nyumba yangu ikadapitiriza kukhala matere, pomwe ali-wentse wa imwepo akudjidjirika kukonza nyumba yace,’ walewa tenepo Yahova wa anyankhondo.
10 ‘Ndipopa kudzulu kukugwa lini mame ndipo dziko la pantsi likumeresa lini bzinthu.
11 Ndacitisa kuti pakhale cirala pa dziko la pantsi, m’mapiri, m’bzinthu bza m’munda, pa vinyu mupsa, mafuta, pa bzinthu bzentse bzakucokera pa mataka, pa wanthu, pa bzifuwo na pa mabasa yentse ya manja yanu.’”
12 Zerubabele mwana wa Selatiyeli, Djoswa omwe akhali mkulu wa antsembe, mwana wa Jehozadaki na wanthu winango adayamba kutetekera mafala ya Yahova Mulungu wawo na ya mpolofeta Agai, thangwe Yahova Mulungu wawo ndiye omwe akhadamutuma, ndipo wanthu adayamba kubva mantha thangwe ra Yahova.
13 Patsogolo pace, Agai nyakutumidwa wa Yahova adauza wanthuwo mafala mwakubverana na basa lomwe adapasidwa na Yahova. Iye adati: “‘Inepano ndinamwe,’ walewa tenepo Yahova.”
14 Tenepo, Yahova adalimbikisa* Zerubabele mwana wa Selatiyeli, omwe akhali governadori wa Djuda, Djoswa mkulu wa antsembe, mwana wa Jehozadaki na wanthu winango ndipo iwo adabwera, acidzaphata basa pa nyumba ya Yahova wa anyankhondo, Mulungu wawo.
15 Bzimwebzi bzidacitika pa ntsiku 24, ya mwezi wacitanthatu m’gole laciwiri la utongi bwa mambo Dariyo.
Mafala ya m'nyantsi
^ Kuthandauza kuti “Wakubadwa pa Phwando.”
^ Ayai, “yakukonza pomwe.”
^ Ayai, “templo.”
^ Mafala yace caiyo: “adacitisa mzimu wa.”
