Amose 6:1-14
6 “Tsoka kwa wanthu wakubzithemba* wa mu Ziyoni,Kwa wale omwe akubzibva kuti mbakukhotcerereka m’phiri la Samariya,Wanthu wakubvekera wa mu mtundu omwe ngwakufunika pakati pa mitundu inango,Wale omwe nyumba ya Jirayeri imbawathemba!
2 Ndokoni ku Kaline mukawone,
Mukacoka kumweko, muyende ku Hamate mzinda ukulu,Ndipo mukamala mupolikire ku Gati wa Afilisteu.
Kodi mizindayi njakufunika kuposa maumambo mawiriya?*Ayai kodi mphimpha zawo n’zikulu kuposa zanu?
3 Kodi imwepo mwasiya kukumbukira ntsiku ya tsokaMucibweresa umambo* bwaciwembo?
4 Iwo ambagona pa kama ya nyanga za nzou ndipo ambakhala m’mipando yakudeka,Iwo ambadya wana wa mabira na mphulu zakunenepa;*
5 Iwo akukonza nyimbo zakuimbidwa na bzakuimbira bza bzingwe,Ndipo ninga Davide, iwo ambakonza bzakuimbira nyimbo;
6 Iwo ambamwera vinyu m’makopo makulu-makuluNdipo ambadzola mafuta yabwino kwene-kwene.
Tsono iwo alibe kukumbukira kupfudzidwa kwa wanthu wa m’nyumba ya Zuze.
7 Tenepo, iwo an’dzakhala wakuyambirira kuyendesedwa ku ukapolo,Ndipo maphwando ya baludya ya wale omwe ambakhala m’mipando yakudeka yan’dzafika kuphampha.
8 ‘Yahova Mbuya Mkululetu walumbirira dzina lace,’ walewa tenepo Yahova Mulungu wa anyankhondo,‘“Nimbawenga kubzikuza kwa Djakobo,Nimbawenga nyumba zace za ntsanza zakulimba,Ndipo nin’dzapereka mzindayo pabodzi na bzentse bzomwe bziri m’mwemo kwa anyamadulanthaka wace.
9 “‘“Penu m’nyumba ibodzi mun’dzasala wanthu 10, iwo an’dzafambo.
10 M’bale wawo* an’dzabwera ndipo an’dzawacosa panja, aciwatentha m’bodzi na m’bodzi. Iye an’dzacosera kunja kwa nyumba mafupa yawo. Tenepo, iye an’dzabvunza omwe an’dzakhala akalipo m’cipinda ca mkati ca nyumbayo kuti: ‘Kodi mwasala munthu ali-wentse m’mwemo?’ Ndipo omwe ali m’cipindayo an’dzatawira kuti: ‘Ne, mulibe!’ Patsogolo pace iye an’dzamuuza kuti: ‘Nyamala! Pakuti ino ni nthawe lini yakuguma dzina la Yahova.’”
11 Pakuti Yahova wapereka lamulo,Ndipo iye an’dzapfudza nyumba ikulu icikhala bzimabuma,Ndipo nyumba ing’ono icikhala bzimataka.
12 Kodi makavalo yangathamange pa tsendwa,Ayai kodi munthu angalime pa mwala na ng’ombe?
Pakuti imwepo mwasandusa cirungamo kukhala muti wa veneno,*Ndipo cisapo ca cirungamo mwacisandusa kukhala msapani.*
13 Imwepo mumbakondwa na cinthu cakusaya basa,Ndipo mumbati: “Kodi ifepano tiribe kukunda* na mphanvu zathu?”
14 Na tenepo, imwe wanthu wa m’nyumba ya Jirayeri, nin’dzabweresa mtundu wa wanthu winango kuti udzakubonereseni,’ walewa tenepo Yahova Mulungu wa anyankhondo,‘Ndipo iwo an’dzakupondererani kucokera ku Lebo-Hamate* mpaka ku cigwa* ca Araba.’”
Mafala ya m'nyantsi
^ Ayai, “omwe akubzibva kuti mbakukhotcerereka.”
^ Pinango akulewa bza umambo bwa Djuda na bwa Jirayeri.
^ Mafala yace caiyo: “mpando.”
^ Ayai, “tumikono twa ng’ombe twakunenepa.”
^ Mafala yace caiyo: “M’bale wa pai wace.”
^ Ayai, “ululu.”
^ Umweyu ni muliwo omwe umbawawa ninga luni.
^ Mafala yace caiyo: “kubzitengera nyanga.”
^ Ayai, “pakupitira mu Hamate.”
^ Ayai, “wadi.” Onani Kafotokozedwe ka Mafala Manango.
