Masomphenya ya Juwau 19:1-21
19 Pomwe bzimwebzi bzidamala, ndidabva mafala yakukuwa kudzulu ninga thimu likulu. Mafalayo yakhati: “Tumbizani Yahova!* Cipulumuso, ulemerero na mphanvu mpsa Mulungu wathu,
2 thangwe katongedwe kace n’kacadidi na kakulungama. Pakuti iye wapasa nyathwa puta mkulu omwe akupumpsa dziko la pantsi na uputa* bwace, ndipo iye an’dzabwezera putayo, thangwe ra mulopa wa akapolo wace.
3 Ndipo pa nthawe imweyoletu, iwo adalewa pomwe kaciwiri kuti: “Tumbizani Yahova!* Ndipo utsi bwa kutenthedwa kwa mkaziyo budapitiriza kukwira mpaka kale-kale.”
4 Ndipo akulu-akulu 24 pabodzi na anjo anai wale, adagodama aciyamba kunamata Mulungu, ule omwe adakhala pa mpando wa umambo, acimbalewa kuti: “Ameni! Tumbizani Yahova!”*
5 Ndipo padabvekambo fala kucokera pa mpando wa umambo lomwe lidati: “Tumbizani Mulungu wathu, imwe akapolo wace mwentse omwe mumbamugopa, akulu na ang’ono kubodzi.”
6 Ndipo ndidabva baludya ninga mafala ya thimu likulu ndipo likhabvekambo ninga baludya la madzi mazinji na kugunda kwa mphanvu. Mafalayo yakhati: “Tumbizani Yahova,* thangwe Yahova Mulungu wathu, Wamphanvu-zentse, wayamba kutonga ninga mambo.*
7 Mbatikondweni ticikomedwa kwene-kwene ndipo timupase ulemerero, thangwe malowozi ya Mwana wa Bira yafika, ndipo mkazi wace wakonzeka kale.
8 Inde, iye wabvumizidwa kubvala bzakubvala bzakuumira, bzakuyetima na bzakucena bwino. Pakuti bzakubvala bzakuumirabzo, bzikuimira mabasa yakulungama ya anyakucena.”
9 Ndipo iye adandiuza kuti: “Nemba: An’kondwa mbale omwe adacemeredwa ku phwando la malowozi ya Mwana wa Bira.” Ndipo iye adandiuza pomwe kuti: “Yamweya ni mafala yacadidi ya Mulungu.
10 Na bzimwebzi, ndidagodama patsogolo pa minyendo yace kuti ndimunamate. Tsono iye adandiuza kuti: “Ne! Leka kucita tenepo! Inepano ndine kapolo ninga iwepo na abale wako omwe akucita basa lakupereka umboni bwa Jezu. Namata Mulungu! Pakuti cakulinga ca mapolofesiya, ni kucitira umboni bza Jezu.”
11 Ndidawona kudzulu kudafunguka ndipo kudacoka kavalo mcena. Omwe akhadapakira kavaloyo, ambacemeredwa Wakukhulupirika na Wacadidi. Ndipo iye ambatonga acimenya nkhondo mwacirungamo.
12 Maso yace yali ninga cirambi-rambi ca moto, ndipo mu msolo mwace muna korowa zizinji. Iye ana dzina lakunembedwa lomwe palibe omwe ambalidziwa, koma iye yekha.
13 Iye adabvala cakubvala cakuwaziridwa mulopa, ndipo akhacemeredwa na dzina lakuti Fala la Mulungu.
14 Ndipo acikunda wakudzulu akhamutewera na makavalo macena. Ndipo iwo akhadabvala bzakubvala bzakuumira, bzakuyetima na bzicena.
15 Ndipo mkamwa mwace mudacoka xipada itali yakuthwa kuti aphere nayo wanthu wa mitundu. Ndipo iye an’dzawausa na mpsimbo ya simbi. Kuthumizira bzimwebzi, iye an’dzaponda cakupsinyira vinyu ca ukali bwa Mulungu Wamphanvu-zentse.
16 Pa cakubvala cace cakunja, inde, pa ntcafu yace padanembedwa dzina lakuti, Mambo wa amambo na Mbuya wa ambuya.
17 Ndidawona pomwe anjo adaima pa dzuwa. Iye adacemera mwakukuwa mbalame zentse zakumbuluka m’dzaulu, aciti: “Bwerani kuno, tsonkhanani pabodzi kuti mubwere ku phwando likulu la Mulungu,
18 kuti mudzadye nyama za amambo, za atsogoleri wa acikunda, za amuna wamphanvu, za makavalo na anyakupakira wace, nyama za wentse, wanthu waufulu, akapolo, ang’ono na akulu kubodzi.”
19 Ndipo ndidawona cirombo cire, amambo wa pa dziko la pantsi na acikunda wace, adatsonkhana pabodzi kuti amenyane na ule omwe adapakira pa kavalo pabodzi na acikunda wace.
20 Ndipo ciromboco cidaphatidwa pabodzi na mpolofeta wakunama, omwe akhacita bzakudabwisa, bzomwe bzikhapumpsa wale omwe adatambira cizindikiro ca cirombo na omwe akhanamata cifanikiso cace. Bzentse bziwiri bzikhana moyo pomwe bzidathusidwa mu thawale la moto wakugaka mwamphanvu.
21 Koma winangowo adaphedwa na xipada itali, yomwe ikhacokera pa mulomo pa ule omwe akhadapakira pa kavalo. Ndipo mbalame zidakhuta na nyama za wanthu amwewo.
Mafala ya m'nyantsi
^ Mafala yace caiyo: “aleluya.” Mafalaya yambathandauza kuti “tumbizani Ya.” “Ya” ni cigwatira ca dzina la Yahova.
^ M’Cigerego porneya. Onani Kafotokozedwe ka Mafala Manango.
^ Mafala yace caiyo: “aleluya.” Mafalaya yambathandauza kuti “tumbizani Ya.” “Ya” ni cigwatira ca dzina la Yahova.
^ Mafala yace caiyo: “aleluya.” Mafalaya yambathandauza kuti “tumbizani Ya.” “Ya” ni cigwatira ca dzina la Yahova.
^ Mafala yace caiyo: “aleluya.” Mafalaya yambathandauza kuti “tumbizani Ya.” “Ya” ni cigwatira ca dzina la Yahova.
^ Ayai, “mpfumu.”
