Daniyeli 1:1-21
1 Mu gole lacitatu la utongi bwa Jewoyakimu mambo wa Djuda, Nabukadinazori mambo wa Babiloniya adabwera ku Jeruzalemu ndipo adazungulira mzindayo.
2 Tenepo Yahova adapereka Jewoyakimu mambo wa Djuda m’manja mwace pabodzi na bzombo bzinango bza m’nyumba* ya Mulungu wacadidi, ndipo iye adabzitenga aciyenda nabzo ku dziko la Sinari* ku nyumba* ya mulungu wace. Iye adakaikha bzombobzo pa mbuto yakukoyera cuma ca mulungu waceyo.
3 Na tenepo, mambo adauza Axipenaji omwe akhali mkulu wa nduna za pa nyumba ya mambo kuti abwerese Ajirayeri* winango pabodzi na wana wa mambo, kuphatanidzambo wana wa wanthu wakulemekezeka.
4 Iwo akhafunika kukhala maswaka* yakusaya ulema, yakuwoneka bwino, yanzeru, yakudziwa bzinthu, yakuzindikira na yakuthemera kutumikira pa nyumba ya mambo. Iye akhafunika kuwapfunzisa kulewalewa na kunemba cirewedwe ca Akalideya.
5 Kuthumizira bzimwebzi, mambo adatonga kuti iwo ambapasidwe ntsiku zentse cakudya cabwino ca mambo na vinyu yomwe iye akhamwa. Iwo akhafunika kupfunzisidwa kwa magole matatu ndipo pakumalizira pace akhafunika kutumikira mamboyo.
6 Pakati pa maswakayo pakhana winango wakucokera m’dzinza la* Djuda, omwe ni Daniyeli,* Hananiya,* Misayeli* na Azariya.*
7 Ndipo mkulu wa nduna za pa nyumba ya mamboyo adawapasa madzina manango.* Daniyeli adamupasa dzina lakuti Beltisazari, Hananiya dzina lakuti Sadraki, Misayeli dzina lakuti Mesaki ndipo Azariya adamupasa dzina lakuti Abedinego.
8 Tsono Daniyeli adatsimikiza mu mtima mwace kuti angadabzipswipiza lini na cakudya cabwino ca mambo ne na vinyu ya mambo. Na tenepo, iye adakumbira mkulu wa ndunazo kuti aleke kumbadya bzakudya bzomwe bzingadamucitisa kukhala wakupswipabzo.
9 Ndipo Mulungu wacadidi adacitisa kuti mkulu wa nduna za pa nyumba ya mamboyo adekere mtima Daniyeli na kumubvera ntsisi.
10 Tsono mkulu wa ndunayo adauza Daniyeli kuti: “Inepano ndikugopa mbuya wangu mambo, omwe walewa bzinthu bzomwe mun’funika kudya na kumwa. Tsono bzin’khala tani iye akakuwonani kuti ndimwe wakunyentcera kusiyana na maswaka* manango ya msinkhu wanu? Imwepo mun’dzandicitisa kukhala na mulandu* kwa mambo.”
11 Tenepo, mkulu wa nduna za pa nyumba ya mambo adaikha munthu kuti ambanyang’anire Daniyeli, Hananiya, Misayeli na Azariya, tsono Daniyeli adauza munthu umweyo kuti:
12 “Taphata minyendo, yezani atumiki wanufe kwa ntsiku 10. Mbatipasani bzinthu bza m’munda na madzi kuti timbamwe;
13 mukamala, mudzandendemeze mawonekedwe yathu na mawonekedwe ya maswaka* yomwe yakudya cakudya cabwino ca mambo ndipo mudzacitire bzinthu atumiki wanufe mwakubverana na bzomwe mun’dzawonabzo.”
14 Tenepo iye adabvuma mkumbiroyo ndipo adawayeza kwa ntsiku 10.
15 Pomwe ntsiku 10 zire zidamala, iwo akhana mawonekedwe yabwino ndipo mathupi yawo yakhana thanzi labwino* kwene-kwene kuposa maswaka* yentse yomwe yakhadya cakudya cabwino ca mambo.
16 Tenepo, nyakuwanyang’anirayo akhapitiriza kuwapasa bzakudya bza m’munda m’mbuto mwakuwapasa cakudya cabwino ca mambo na vinyu yace.
17 Ndipo Mulungu wacadidi adapasa maswaka* manaiya nzeru na kubvesesa* bzinthu bzentse bzakunembedwa, ndipo adawacitisambo kukhala adziwi. Ndipo Daniyeli adapasidwa luso lakubvesesa mtundu uli-wentse wa masomphenya na maloto.
18 Ntsiku zomwe mambo akhadaziikha kuti maswaka yale yakawonekere kwa iye zidakwana, na tenepo, mkulu wa nduna za pa nyumba ya mambo adawatenga, aciyenda nawo kwa Nabukadinazori.
19 Pomwe mambo adalewalewa nawo, pa thimu lawolo pakhalibe munthu wakundendemerana na Daniyeli, Hananiya, Misayeli na Azariya ndipo iwo adapitiriza kutumikira mamboyo.
20 Nthawe zentse zomwe mambo akhawabvunza nzeru pa nkhani inango kuti aibvesese nkhaniyo, mamboyo akhawona kuti iwo akhana nzeru maulendo 10 kuposa antsembe wentse omwe akhambacita bzamatsenga na anyakulewalewa na mizimu omwe akhalipo mu umambo bwace.
21 Tenepo, Daniyeli adapitiriza kukhala kumweko mpaka gole lakutoma la utongi bwa Mambo Siro.
Mafala ya m'nyantsi
^ Ayai, “templo.”
^ Komwe ni ku Babiloniya.
^ Ayai, “templo.”
^ Mafala yace caiyo: “wana wa Jirayeri.”
^ Mafala yace caiyo: “wana.”
^ Ayai pinango, “Mbani Angandendemerane na Mulungu?”
^ Kuthandauza “Yahova Wandithandiza.”
^ Kuthandauza “Yahova Wandidekera Mtima.”
^ Kuthandauza “Mulungu Ndiye Mtongi Wangu.”
^ Mafala yace caiyo: “wana wa.”
^ Yamweya ni madzina ya ku Babiloniya.
^ Mafala yace caiyo: “wana.”
^ Mafala yace caiyo: “msolo wangu un’dzakhala na mulandu.”
^ Mafala yace caiyo: “wana.”
^ Mafala yace caiyo: “akhadanenepa.”
^ Mafala yace caiyo: “wana.”
^ Mafala yace caiyo: “wana.”
^ Ayai, “kuzindikira.”
