Daniyeli 5:1-31
5 Mambo Belisazari adakonzera phwando likulu wanthu wace wakulemekezeka wakukwana 1000, ndipo iye akhamwa vinyu pomwe akhadakhala patsogolo pawo.
2 Pomwe Belisazari adaledzera na vinyu, iye adacemeresa makopo ya oro na ya prata yomwe pai wace Nabukadinazori adayatenga mu templo ku Jeruzalemu kuti mambo amwere pabodzi na wanthu wace wakulemekezeka, azimakhadzi wace na azikazi wace winango.
3 Tenepo adabweresa makopo ya oro yomwe yadatengedwa mu templo, m’nyumba ya Mulungu ku Jeruzalemu kuti mambo amwere pabodzi na wanthu wace wakulemekezeka, azimakhadzi wace na azikazi wace winango.
4 Iwo adamwa vinyuyo ndipo adatumbiza mirungu yawo yakukonzedwa na oro, prata, mkuwa,* simbi, miti na minyala.
5 Pa nthawe ibodzi-bodziyo, m’nyumba ya mambo mudawoneka bzala bza boko la munthu pafupi na cakuikhira kandiyero ndipo bzidayamba kunemba pa parede, ndipo mambo adawona, pomwe bokolo likhanemba.
6 Tenepo, nkhope ya mambo idacinja ndipo adakhala na mantha, minyendo yace idatepa ndipo mabondo yace yadayamba kutetemera.
7 Na tenepo, mamboyo adakuwa acicemeresa anyakulewalewa na mizimu, Akalideya* na anyakuvima mwakuphatisa basa nyenyezi. Mambo adauza adziwi wa m’Babiloniya kuti: “Munthu ali-wentse omwe an’kwanisa kuwerenga mafalaya acindithumbudzulira*, an’dzabvazikidwa cakubvala cifuira na kolar ya oro m’khosi mwace ndipo an’dzakhala mtongi wacitatu mu umambo.”
8 Adziwi wentse wa mambo adabwera, tsono iwo alibe kukwanisa kuwerenga mafalayo ne kuthumbudzulira mamboyo.
9 Tenepo mambo Belisazari adabva mantha kwene-kwene mwakuti nkhope yace idacinja; ndipo wanthu wace wakulemekezeka adasaya bzakucita.
10 Thangwe ra mafala ya mambo na ya wanthu wace wakulemekezeka, mambo wacikazi* adabwera mu cipinda cakudyera phwando. Ndipo mambo wacikaziyo adalewa kuti: “Imwe mambo, mukhale na moyo mpaka kale-kale. Lekani kucita mantha ndipo nkhope yanu ireke kucinja.
11 Mu umambo bwanu muna munthu m’bodzi, omwe ana mzimu wa mirungu yakucena. Mu ntsiku za pai wanu, wanthu adazindikira kuti munthu umweyu ngwakudziwa bzinthu, ngwakuzindikira ndipo ana nzeru ninga za mirungu. Pai wanu, mambo Nabukadinazori, adamuikha kukhala mtsogoleri wa antsembe wakucita bzamatsenga, anyakulewalewa na mizimu, Akalideya* na anyakuvima mwakuphatisa basa nyenyezi; pai wanu adacita bzimwebzi mambo.
12 Pakuti Daniyeli, omwe mambo adamupasa dzina lakuti Beltisazari, akhana luso lakudabwisa, cidziwiso na luso lakudziwa kuthumbudzula maloto, lakudziwa bzithumbudzulo na kukonza bzinthu pakawoneka mabvuto.* Tenepo mucemereni Daniyeli ndipo iye an’dzakuthumbudzulirani.”
13 Tenepo Daniyeli adayendesedwa kwa mambo. Ndipo mamboyo adabvunza Daniyeli kuti: “Kodi iwepo ndiwe Daniyeli, m’bodzi mwa wanthu omwe adatengedwa ku ukapolo ku Djuda na pai wangu omwe akhali mambo?
14 Ndabva kuti iwepo una mzimu wa mirungu, ndipo wanthu adazindikira kuti iwepo umbadziwa bzinthu, umbabvesesa bzinthu ndipo una nzeru zakudabwisa.
15 Adziwi na anyakulewalewa na mizimu abwera kwa ine kuti adzawerenge mafalaya na kundithumbudzulira, tsono iwo akukwanisa lini kundithumbudzulirako.
16 Tsono ndabva kuti iwepo umbakwanisa kuthumbudzula na kukonza bzinthu pakawoneka mabvuto.* Tenepo iwepo ukakwanisa kuwerenga mafalaya na kundithumbudzulira, un’dzabvazikidwa cakubvala cifuira na kolari ya oro m’khosi mwako ndipo un’dzakhala mtongi wacitatu mu umambo.”
17 Daniyeli adatawira mamboyo kuti: “Mungakhale nazo mphaso zanuzo ndipo mungapase winango mabaibai yanuyo. Tsono nin’kuwerengerani mafalaya mambo ndipo nin’kuthumbudzulirani.
18 Imwe mambo, Mulungu Mkululetu adapasa pai wanu Nabukadinazori umambo, ukulu, ulemu na ulemerero.
19 Thangwe ra ukulu bomwe Mulungu adapasa pai wanu, wanthu wa mitundu yentse na wa bzirewedwe bzentse akhatetemera na mantha pa maso pawo. Iwo akafuna kupha munthu ayai kumusiya na moyo, akhacita bzimwebzo, ndipo iwo akafuna kutumbiza ayai kucitisa manyazi munthu,* akhacita bzimwebzo.
20 Tsono pomwe iwo adasamwa aciumisa mtima wawo na kucita bzinthu mwakubzikuza, adacosedwa pa mpando wawo wa umambo ndipo ulemerero bwawo budacosedwambo.
21 Iwo adathothedwa pakati pa wanthu, mtima wawo udacinja ucikhala ninga mtima wa cirombo ndipo iwo akhakhala na mabulu ya m’thengo. Iwo adayamba kudya mauswa ninga ng’ombe, thupi lawo likhatota na mame ya kudzulu, mpaka pomwe iwo adafika pakudziwa kuti Mulungu Mkululetu ndiye Mtongi wa maumambo ya wanthu ndipo ambapereka umambobo kwa omwe iye akufuna.
22 “Tsono imwepo a Belisazari, omwe ndimwe mwana wa Nabukadinazori, mulibe kubzicepesa napo mukhadziwa bzinthu bzentsenebzi.
23 M’mbuto mwace, imwepo mwayamba kubziwona mkulu kwene-kwene kuposa Mbuya wakudzulu, ndipo imwepo mwatenga makopo ya m’nyumba mwace. Tenepo, imwepo, akulu-akulu wanu, azimakhadzi wanu na azikazi wanu winango mwamwera vinyu makopoyo ndipo mwatumbiza mirungu yakukonzedwa na prata, oro, mkuwa,* simbi, miti na minyala, mirungu yomwe imbawona lini, imbabva lini ndipo imbadziwa lini cinthu. Tsono imwepo mulibe kupasa ulemerero Mulungu omwe moyo wanu wentse uli m’manja mwace na bzentse bzomwe mumbacita.
24 Na tenepo, Mulungu watumiza boko ndipo wacitisa kuti mafala yanembedwe.
25 Ndipo mafala yomwe yanembedwaya yakulewa kuti: MENE, MENE, TEKELI na PARISINI.
26 “Kuthumbudzula kwa mafalaya n’kuku: MENE, Mulungu walewenga ntsiku za umambo bwanu ndipo bwafika kuphampha.
27 “TEKELI, imwepo mwapimidwa pa balantsa ndipo mwawonedwa kuti mukuperewera.
28 “PERESI, umambo bwanu bwagawidwa ndipo bwaperekedwa kwa Amediya na Apersiya.”
29 Tenepo, Belisazari adapereka lamulo lakuti Daniyeli abvazikidwe cakubvala cifuira na kolari ya oro m’khosi mwace, ndipo iwo adadziwisa wanthu kuti iye angadakhala mtongi wacitatu mu umambo.
30 Usiku bubodzi-bodzibo Belisazari mambo wa Akalideya adaphedwa.
31 Ndipo Dariyo m’Mediya adatambira umambobo. Iye akhana magole 62 yakubadwa.
Mafala ya m'nyantsi
^ Ayai, “kobre.”
^ Limweri ni thimu la wanthu omwe akhabzibva kuti akhadziwa kuvima na kudziwa bzinthu bzakutsogolo.
^ Ayai, “kutsumbudzula.”
^ Ayai, “mai wace wa mambo.”
^ Limweri ni thimu la wanthu omwe akhabzibva kuti akhadziwa kuvima na kudziwa bzinthu bzakutsogolo.
^ Ayai, “kubvekesa bzinthu bzakunesa kubzibvesesa.”
^ Ayai, “kubvekesa bzinthu bzakunesa kubzibvesesa.”
^ Ayai, “kukwiza ayai kucepesa munthu.”
^ Ayai, “kobre.”
