Daniyeli 7:1-28
7 Mu gole lakuyamba la Belisazari mambo wa Babiloniya, Daniyeli adalota ndipo m’malotomo adawona masomphenya pomwe akhadagona pakama pace. Patsogolo pace iye adanemba malotoyo, ndipo adanemba nkhani yentseneyo.
2 Daniyeli adati:
“M’masomphenya yangu usiku, ndidawona mphepo zinai zakudzulu zomwe zikhacitisa mabimbi m’nyanza ikulu.
3 Ndipo m’nyanzamo mukhacoka bzirombo bzinai bzikulu-bzikulu, ndipo ciri-centse cikhali cakusiyana na cinzace.
4 “Cirombo cakuyamba, cikhali cakundendemerana na mphondolo ndipo cikhana maphaphidwe ninga ya mphungu. Ndidapitiriza kunyang’anisisa mpaka pomwe maphaphidwe yace yadakhwadzulidwa. Ico cidalamusidwa pa dziko la pantsi ciciimisidwa na minyendo miwiri ninga munthu ndipo cidatambira mtima wa munthu.
5 “Ndidawona pomwe cirombo cinango caciwiri, comwe cikhali ninga urso.* Ico cidadzusa mwendo ubodzi ndipo mkamwa mwace mukhana mbabvu zitatu pakati pa mano yace, ndipo cidauzidwa kuti: ‘Lamuka, dyaya nyama izinji.’
6 “Pomwe ndikhapitiriza kunyang’anisisa, ndidawona pomwe cirombo cinango comwe cikhali ninga nyalugwe, tsono pamsana pace cikhana maphaphidwe manai ninga ya mbalame. Ciromboco cikhana misolo minai ndipo cidapasidwa mphanvu yakutonga.
7 “Tenepo, ndidapitiriza kuwona masomphenya usiku, ndipo ndidawona cirombo cacinai cakugopswa kwene-kwene, cakupasa mantha na camphanvu kwene-kwene ndipo ico cikhana mano makulu-makulu ya simbi. Ico cikhadya, ciciphwanya-phwanya cinthu ciri-centse, ndipo cikhaponda-ponda na nzayo zace bzinthu bzakusala. Cimweci cikhali cakusiyana na bzirombo bzinango bzomwe ndawona bzire, ndipo cikhana nyanga 10.
8 Pomwe ndikhanyang’anisisa nyangazo, ndidawona nyanga inango ing’ono idamera pakati pa nyangazo, ndipo nyanga zitatu pa nyanga zakuyambirira, zidazulidwa pa mbuto pomwe nyanga ing’onoyo idamera. Nyanga imweyi ikhana maso ninga ya munthu ndipo ikhana mulomo omwe ukhalewa-lewa mafala yakubzikuza.*
9 “Ndidapitiriza kunyang’anisisa mpaka pomwe mipando ya umambo idaikhidwa, ndipo Wantsiku Zizinji adakhala pa mpando wace wa umambo. Bzakubvala bzace bzikhali bzakucena ninga pfulere* ndipo tsisi lace likhali licena ninga ukuse bwa bira. Mpando wace wa umambo ukhali ninga cirambi-rambi ca moto ndipo maroda ya mpandoyo yakhali ninga moto wakugaka.
10 Mkulo wa moto ukhayerera kucokera kuna iye. Anjo wakukwana 1 midyau akhamutumikira, ndipo anjo wakukwana 100 midyau akhadaima patsogolo pace. Nyumba ya Mphala* idayamba kutonga ndipo mabukhu yadafungulidwa.
11 “Ndidapitiriza kunyang’anisa thangwe ra mafala yakubzikuza* yakulewedwa na nyanga ire; ndidapitiriza kunyang’anisa mpaka ciromboco cidaphedwa ndipo thupi lace lidatenthedwa pa moto licipfudzidwa.
12 Tsono bzirombo bzinangobzo adabzitengera mphanvu yakutonga ndipo moyo wace udathumiziridwa kwa kanthawe.
13 “Ndidapitiriza kunyang’anisa masomphenya usiku, ndipo ndidawona munthu munango wakundendemerana na mwana wa munthu omwe akhabwera m’mitambo yakudzulu. Iye adabvumidwa kufika kwa Wantsiku Zizinji ndipo adamubweresa pamaso pace.
14 Ndipo adapasidwa utongi, ulemu na umambo kuti wanthu, mitundu ya wanthu na wanthu wa bzirewedwe bzakusiyana-siyana amutumikire. Utongi bwace ni utongi bwakukhalisa bomwe bun’dzamala lini ndipo umambo bwace bun’dzapfudzidwa lini.
15 “Tsono ine Daniyeli, ndidaneseka kwene-kwene mu mtima mwangu,* thangwe masomphenya yomwe ndidawona yale yadandipasa mantha.
16 Inepano ndidafenderera m’bodzi wa omwe akhadaima pamwepo kuti ndimubvunze thandauzo la bzimwebzi. Tenepo, iye adanditawira ndipo adandizimbulira na kundithumbudzulira bzinthu bzimwebzi kuti:
17 “‘Bzirombo bzentse bzinai bzikulu-bzikulubzi ni amambo anai omwe an’dzawoneka pa dziko la pantsi.
18 Tsono, anyakucena wa Mulungu Mkululetu an’dzatambira umambo ndipo umambobo bun’dzakhala bwawo mpaka kale-kale, inde mpaka kale-kale.’
19 “Tenepo, ine ndidafunisisa kudziwa bzizinji pakulewa bza cirombo cacinai, comwe cikhali cakusiyana na bzirombo bzinangobzi. Ico cikhali cakupasa mantha kwene-kwene, cikhana mano ya simbi na ntcala za mkuwa,* ndipo ico cikhadya, ciciphwanya-phwanya cinthu ciri-centse, ndipo bzinthu bzakusala cikhaponda-ponda na nzayo zace.
20 Ndidafunambo kudziwa bzizinji pakulewa bza nyanga khumi zomwe zikhali mu msolo mwace na bza nyanga ire yomwe idamera icicitisa kuti nyanga zitatu zigwe. Nyanga imweyi ikhana maso na mulomo omwe ukhalewa mafala yakubzikuza,* ndipo ikhawoneka ninga ikulu kuposa zinango.
21 “Ndidapitiriza kunyang’anisisa pomwe nyangayi ikhacita nkhondo na anyakucena ndipo ikhawakunda,
22 mpaka pomwe adabwera Wantsiku Zizinji, acitonga mwakudekera anyakucena wa Mulungu Mkululetu, ndipo idafika nthawe yakuikhidwiratu yakuti anyakucenawo atambire umambo.
23 “Iye adalewa kuti: ‘Cirombo cacinai cikuimira umambo bwacinai bomwe bun’dzabwera pa dziko la pantsi. Umambobo bun’dzakhala bwakusiyana na maumambo yanango yentse; ibo bun’dzadya dziko la pantsi, bun’dzaliponda-ponda na kuliphwanya-phwanya.
24 Pakulewa bza nyanga khumi, pan’dzawoneka amambo khumi pa umambobo. Pambuyo pa amambo amwewa, pan’dzawoneka pomwe mambo munango omwe an’dzakhala wakusiyana na amambo wakuyambawa ndipo iye an’dzakunda maumambo matatu.
25 Iye an’dzanyoza Mkululetu ndipo an’dzapitiriza kuboneresa anyakucena wa Mulungu Mkululetu. Iye an’dzafuna kucinja nthawe na lamulo, ndipo anyakucenawo an’dzaperekedwa m’manja mwace kwa nthawe ibodzi, nthawe ziwiri na metade ya nthawe.*
26 Na tenepo, Nyumba ya Mphala idayamba kutonga ndipo idamutengera utongi kuti amudzonge na kumupfudziratu.
27 “‘Ndipo umambo, utongi na ukulu bwa maumambo ya pa dziko lentse la pantsi, yadaperekedwa kwa wanthu omwe ni anyakucena wa Mulungu Mkululetu. Umambo bwawo ni umambo bwakusaya kumala ndipo mautongi yentse yan’dzawatumikira na kuwabvera.’
28 “Nkhaniyi yamalira pano. Tsono ine Daniyeli ndidaneseka kwene-kwene na bzomwe bzikhabwera m’makumbukidwe mwangu mwakuti mawonekedwe yangu yadacinja, ndipo ndidapitiriza kukumbukira bzimwebzi mu mtima mwangu.”
Mafala ya m'nyantsi
^ Cimweci n’cirombo caukali kwene-kwene.
^ Ayai, “yakusamwa.”
^ Ayai, “nkhungu.”
^ Imweyi ni Nyumba ya Mphala ya kudzulu.
^ Ayai, “yakusamwa.”
^ Mafala yace caiyo: “mzimu wangu udaneseka.”
^ Ayai, “kobre.”
^ Ayai, “yakusamwa.”
^ Mafala yace caiyo: “nthawe ibodzi, nthawe na metade ya nthawe,” zomwe ni nthawe zitatu na meya.
