Ekisodo 13:1-22
13 Yahova adauza pomwe Mozeji kuti:
2 “Ndipambulire* mwana ali-wentse wakuyamba kubadwa wacimuna pakati pa Ajirayeri. Wana wentse wakuyamba kubadwa wacimuna* wa wanthu na bzifuwo, mbangu.”
3 Patsogolo pace Mozeji adauza wanthuwo kuti: “Mbakumbukirani ntsiku ya lero ino yomwe mudacoka mu Edjipito, dziko lomwe mukhali akapolo, thangwe Yahova adakucosani m’mwemo na boko lace lamphanvu. Tenepo, lekani kumbadya cinthu ciri-centse cakuikhidwa fermento.
4 Imwepo mukucoka lero, m’mwezi wa Abibe.*
5 Yahova akadzakupitisani mu dziko la Akanani, Ahiti, Aamori, Ahivi na Ajebusi, dziko lakuyerera mkaka na uci, dziko lomwe iye adalumbirira makolo yanu ya kale kuti angadadzakupasani, mudzakumbukire ntsiku ya lero m’mwezi ninga uno.
6 Mu ntsiku 7 mun’funika kudzadya pau zakusaya fermento ndipo pa ntsiku yaci 7 mun’funika kudzacitira phwando Yahova.
7 Mun’funika kudzadya pau zakusaya fermento kwa ntsiku 7; pakati panu paleke kudzagumanika cinthu ciri-centse cakuikhidwa fermento ndipo m’dziko lanu lentse* mulekembo kudzagumanika fermento.
8 Ndipo pa ntsiku imweyo mudzauze wana wanu kuti: ‘Tikucita bzimwebzi thangwe ra bzomwe Yahova adaticitira pakucoka mu dziko la Edjipito.’
9 Bzimwebzi bzin’dzakhala ninga cizindikiro cakunembedwa pa boko lanu na mkumbuso pa mkuma panu, kuti mumbalewe bza lamulo la Yahova, thangwe Yahova adakucosani mu dziko la Edjipito na boko lace lamphanvu.
10 Gole liri-lentse, mun’funika kucita bzomwe lamuloli limbalewa pa nthawe yace yakuikhidwiratu.
11 “Yahova akadzakupitisani m’dziko la Kanani, dziko lomwe iye adalumbirira makolo yanu ya kale kuti angadakupasani,
12 mun’funika kupereka kwa Yahova wana wentse wakuyamba kubadwa wacimuna* kuphatanidzambo cifuwo ciri-centse cacimuna cakuyamba kubadwa comwe munaco. Bzentse mpsa Yahova.
13 Mwana ali-wentse wakuyamba kubadwa wa bulu mumulombole na bira, tsono mukasaya kumulombola, mumuphe mwakucita kumutcola khosi. Ndipo mun’funika kulombola wana wanu wentse wakuyamba kubadwa wacimuna.
14 “Tsono kutsogoloku wana wanu akadzakubvunzani kuti: ‘Thangwe ranyi ifepano tikucita bzimwebzi?’ Mudzawatawire kuti: ‘Yahova adaticosa mu dziko la Edjipito na boko lace lamphanvu, mu dziko lomwe tikhali akapolo.
15 Pomwe Farawo adaumisa mtima wace acilamba kutibvumiza kucoka, Yahova adapha wana wentse wacimuna* wakuyamba kubadwa m’dziko la Edjipito, kuyambira wana wacimuna wakuyamba kubadwa wa wanthu mpaka wa bzifuwo. Ndipopa bzifuwo bzentse bzakuyamba kubadwa timbabzipereka ninga ntsembe kwa Yahova, ndipo wana wathu wentse wacimuna wakuyamba kubadwa timbawalombola.’
16 Msinda umweyu un’dzakhala ninga cizindikiro cakunembedwa pa boko lanu na pa mkuma panu, pakuti Yahova adaticosa mu dziko la Edjipito na boko lace lamphanvu.”
17 Pomwe Farawo adabvumiza Ajirayeri kucoka, Mulungu alibe kuwayendesa na njira ya m’dziko la Afilisteu napo kuti ikhali yacigwatira. Pakuti Mulunguyo adati: “Wanthuwa angacinje nzeru zawo akagumana na nkhondo ndipo angabwerere ku Edjipito.”
18 Tenepo Mulungu adacitisa kuti Ajirayeri apite na njira itali yomwe ikhagwata na m’dambo pafupi na Nyanza Ifuira. Ndipo iwo adacoka m’dziko la Edjipito mwakulinganizika ninga acikunda wa nkhondo.
19 Mozeji adanyamulambo mafupa ya Zuze, thangwe Zuzeyo akhadalumbirisa wana wa Jirayeri kuti: “Kulewa cadidi, Mulungu an’dzakuthandizani, tenepo dzanyamuleni mafupa yangu pakucoka kuno.”
20 Iwo adacoka ku Sukoti acikamanga msasa ku Etamo, m’malire mwa dambo.
21 Yahova akhayenda patsogolo pawo; masikati iye akhaphatisa basa mtambo kuti awatsogolere mu njira, ndipo usiku akhaphatisa basa mtambo wa moto kuti awabvunikire. Tenepo iwo akhakwanisa kucita ulendo masikati na usiku.
22 Mtamboyo ukhacoka lini kutsogolo kwa wanthuwo ku masikati, ndipo usiku mtambo wa motoyo ukhacokambo lini patsogolo pawo.
Mafala ya m'nyantsi
^ Ayai, “Ndicenesere.”
^ Mafala yace caiyo: “mwana ali-wentse wakuyamba kubadwa omwe wafungula nthumbo.”
^ Onani Mafala Yakuphampha B15.
^ Mafala yace caiyo: “m’malire mwanu mwentse.”
^ Mafala yace caiyo: “mwana ali-wentse wakuyamba kubadwa omwe wafungula nthumbo.”
^ Mafala yace caiyo: “mwana ali-wentse wakuyamba kubadwa omwe wafungula nthumbo.”
