Ekisodo 14:1-31
14 Yahova adauza Mozeji kuti:
2 “Uza Ajirayeri kuti abwerere, amange msasa wawo patsogolo pa Pihayiroti pakati pa Migidoli na nyanza. Mun’funika kumanga msasa wanu pafupi na nyanza, kutsogolo kwa Baala-zefoni.
3 Ndipo Farawo an’dzalewa kuti: ‘Ajirayeri adzungaira ndipo akundofamba-famba m’dziko lathu, iwo asocera m’dambo.’
4 Nin’dzalekerera kuti Farawo aumise mtima wace, iye an’dzakutewerani, ndipo inepano nin’dzapasa ulemerero dzina langu thangwe ra Farawo na acikunda wace wentse; ndipo Aedjipito an’dzadziwa kuti ine ndine Yahova.” Tenepo Ajirayeri adacitadi bzimwebzo.
5 Patsogolo pace, mambo wa ku Edjipito adauzidwa kuti Ajirayeri athawa. Pa nthawe imweyoletu, Farawo na atumiki wace adacinja nzeru pakulewa bza Ajirayeriwo ndipo adati: “Thangwe ranyi tabvumiza Ajirayeri omwe akhali akapolo wathu kucoka?”
6 Tenepo iye adakonzekeresa ngolo zace za nkhondo acitengambo acikunda wace.
7 Iye adasankhula ngolo zakupambulika zakukwana 600 na ngolo zinango za mu Edjipito, ndipo ngolo iri-yentse ikhana acikunda.
8 Tenepo Yahova adalekerera Farawo mambo wa ku Edjipito kuumisa mtima wace, ndipo iye adatewera Ajirayeri pomwe iwo akhacoka m’dzikomo mwakusaya mantha.
9 Aedjipitowo adatewera Ajirayeri ndipo ngolo zentse za Farawo zakupfuwidwa na makavalo, anyakupakira pa makavaloyo na acikunda wace, adagumana Ajirayeriwo pomwe akhadamanga misasa yawo pafupi na nyanza ku Pihayiroti patsogolo pa Baala-zefoni.
10 Pomwe Farawo adafendera pafupi, Ajirayeri adawona kuti Aedjipito akhawatewera. Tenepo Ajirayeriwo adabva mantha kwene-kwene ndipo adayamba kulirira Yahova kuti awathandize.
11 Iwo adabvunza Mozeji kuti: “Kodi ku Edjipito kulibe thenje kuti iwepo utibwerese kuti tidzafere ku dambo kuno? Thangwe ranyi waticitira bzimwebzi? Thangwe ranyi waticosa ku Edjipito?
12 Kodi tiribe kukuuza ife pomwe tikhali ku Edjipito kuti: ‘Tisiye titumikire Aedjipito’? Pakuti bziri bwino kutumikira Aedjipitowo kusiyana na kufera ku dambo kuno.”
13 Tenepo Mozeji adauza wanthuwo kuti: “Lekani kucita mantha. Khwimikani ndipo onani momwe Yahova an’kupulumusirani lero. Thangwe Aedjipito omwe mukuwawona lerowa mun’dzawawona lini pomwe mpaka kale-kale.
14 Yahova an’dzakumenyerani nkhondo ndipo imwepo mun’dzacita lini cinthu ciri-centse, mun’dzandokhala phee.”
15 Tsono Yahova adauza Mozeji kuti: “Thangwe ranyi iwepo ukupitiriza kudandaulira inepano? Uza Ajirayeri kuti apitirize na ulendo bwawo.
16 Ndipo iwepo tenga mpsimbo yako ulate nyanza ndipo nyanzayo in’gawanika kuti Ajirayeri apite na pakati pa nyanzayo pa mataka yakuuma.
17 Tsono inepano, nin’lekerera kuti Aedjipito aumise mitima yawo mwakuti an’dzatewera Ajirayeri pa nyanzapo; nin’dzacita bzimwebzi kuti ndidzapase ulemerero dzina langu pakukunda Farawo, thimu lace lentse la anyankhondo, ngolo zace za nkhondo na acikunda wace wakupakira pa makavalo.
18 Ndipo Aedjipito an’dzadziwadi kuti ine ndine Yahova ndikadzabzilemekezesa pakukunda Farawo, ngolo zace za nkhondo na acikunda wace wakupakira pa makavalo.”
19 Pamwepo, anjo wa Mulungu wacadidi omwe akhali kutsogolo kwa Ajirayeri adacoka aciyenda m’mambuyo mwawo, ndipo mtambo omwe ukhali kutsogolo kwawo udacokambo ucikakhala m’mambuyo mwawo.
20 Mtamboyo udaima pakati pa Aedjipito na Ajirayeri. Mbali ibodzi ukhacitisa mdima ndipo mbali inangoyi ukhacitisa ceza, mwakuti usiku bwentsenebo Aedjipito alibe kukwanisa kufenderera Ajirayeri.
21 Mozeji adafuthula boko lace acilata nyanzayo ndipo Yahova adacitisa kuti mphepo ya kumabvadzuwa igawe nyanzayo usiku bwentse na kuumisa pantsi pace, ndipo madziyo yadagawanika.
22 Tenepo Ajirayeriwo adapita na pakati pa nyanzayo pa mataka yakuuma pomwe madziyo yakhadacita nkhomole kumadidi na kumadzere kwawo.
23 Aedjipito adayamba kuwatewera ndipo makavalo yentse ya Farawo, ngolo zace za nkhondo na anyakupakira pa makavaloyo adayamba kutewera Ajirayeri pakati pa nyanzapo.
24 Kumadandakweca,* Yahova adanyang’anisa anyankhondo wa Aedjipito kucokera mu mtambo na mu mtambo wa moto ule, ndipo iye adacitisa kuti anyankhondo wa Edjipito acite phiringu.
25 Iye adacitisa kuti maroda ya ngolo zawo yatsudzuke mwakuti zikhaneseka kufamba. Tenepo Aedjipitowo adayamba kulewa kuti: “Mbatiwathaweni Ajirayeriwa, thangwe Yahova akuwamenyera nkhondo pakumenyana na Aedjipito.”
26 Patsogolo pace, Yahova adauza Mozeji kuti: “Futhula boko lako ucilata nyanzayi kuti madzi yaphatane, yacimiza Aedjipito, ngolo zawo za nkhondo na anyakupakira pa makavalo.”
27 Pa nthawe imweyoletu Mozeji adalata nyanzayo, ndipo pomwe kukhacena, nyanzayo idayamba kubwerera m’mbuto mwace. Aedjipito adayezera kuthawa madziyo, tsono Yahova adawamiza pakati pa nyanzayo.
28 Madziyo yadabwerera m’mbuto mwace ndipo yadamiza ngolo za nkhondo, anyakupakira pa makavalo na acikunda wentse wa Farawo omwe adapita na pakati pa nyanza kutewera Ajirayeri. Palibe kupulumuka ne na m’bodziyo.
29 Tsono Ajirayeri adafamba pa mataka yakuuma pakati pa nyanzayo ndipo madzi yakhadacita nkhomole kumadidi na kumadzere kwawo.
30 Tenepo pa ntsiku imweyi Yahova adapulumusa Ajirayeri m’manja mwa Aedjipito, ndipo Ajirayeriwo adawona Aedjipito wakufawo m’mphepete mwa nyanzayo.
31 Ajirayeri adawonambo mphanvu* zikulu zomwe Yahova adaziphatisa basa kuti akunde Aedjipito. Ndipo wanthuwo adayamba kugopa Yahova na kukhulupira Yahova pabodzi na mtumiki wace Mozeji.
Mafala ya m'nyantsi
^ Zomwe zikhali nthawe ziwiri za usiku mpaka nthawe zitanthatu za kumacibese.
^ Mafala yace caiyo: “boko.”
