Ekisodo 18:1-27
18 Jetro, amibzala wace wa Mozeji omwe akhali wantsembe wa ku Midiyani, adabva bzentse bzomwe Mulungu adacitira Mozeji na wanthu wace Ajirayeri na momwe Yahova adacosera Ajirayeriwo ku Edjipito.
2 Mozeji adatumiza mkazi wace Zipora kwa amibzala wace Jetro ndipo Jetro adatenga mkazi wa Mozejiyo acikhala naye,
3 pabodzi na wana wace awiri. M’bodzi mwa wana wace akhacemeredwa Gerisomu,* pakuti Mozeji adati: “Ndakhala mulendo mu dziko lacirendo.”
4 Ndipo munangoyo adamupasa dzina lakuti Eliyezeri,* pakuti iye adati: “Mulungu wa pai wangu ndiye mthandizi wangu omwe adandipulumusa kwa Farawo omwe akhafuna kundipha.”
5 Tenepo Jetro, amibzala wace wa Mozeji, mkazi wace wa Mozeji pabodzi na wana wace, adayenda kukagumana na Mozejiyo m’dambo. Iye akhadamanga msasa wace pafupi na phiri la Mulungu wacadidi.
6 Tenepo iye adatumiza mafala kwa Mozeji yakuti: “Ine mibzala wako Jetro ndikubwera kudzagumana nawe, ndiri pabodzi na mkazi wako na wana wako awiri.”
7 Pa nthawe imweyoletu, Mozeji adayenda kukagumana na amibzala wace ndipo adagodama aciwampsompsona. Iwo adamusana ndipo patsogolo pace adapita mu tendi.
8 Mozeji adauza amibzala wace bzentse bzomwe Yahova adacitira Farawo na Aedjipito thangwe ra Ajirayeri na mabvuto yentse yomwe adagumana nayo mu njira na momwe Yahova adawapulumusira.
9 Jetro adakomedwa kwene-kwene na bzinthu bzentse bzabwino bzomwe Yahova adacitira Ajirayeri pakuwapulumusa ku Edjipito.*
10 Patsogolo pace Jetro adati: “Atumbizidwe Yahova omwe adakupulumusani kwa Aedjipito na m’manja mwa Farawo, omwe adapulumusambo wanthuwa kwa Aedjipito omwe akhawaboneresa.
11 Tsapano ndadziwa kuti Yahova ni mkulu kuposa mirungu inango yentse, thangwe ra bzomwe iye adacitira wale omwe adacita bzinthu mwakubzikuza kwa wanthu wace.”
12 Patsogolo pace Jetro, amibzala wa Mozeji, adabweresa ntsembe zakucita kutentha na ntsembe zinango kwa Mulungu, ndipo Aroni na akulu-akulu wa Ajirayeri adayenda kukadya pabodzi na amibzala wa Mozeji pamaso pa Mulungu wacadidi.
13 Mangwana yace, Mozeji adakhala pantsi ninga mwa cizolowezi kuti atumikire wanthu ninga nyakutonga mirandu, ndipo wanthuwo akhapitiriza kubwera acimbaima patsogolo pa Mozeji, kuyambira kumacibese mpaka kumaulo.
14 Pomwe amibzala wa Mozeji adawona bzentse bzomwe akhacitira wanthuwo adamubvunza kuti: “Thangwe ranyi ukucita bzimwebzi? Thangwe ranyi ukukhala ucimbatonga wanthu wentsenewa wekha-wekha pomwe iwo adaima kuyambira macibese mpaka kumaulo?”
15 Mozeji adatawira amibzala wacewo kuti: “Ni thangwe rakuti wanthuwa ambabwera kwa inepano kuti adzabve malango ya Mulungu.
16 Wanthu awiri akanesana iwo ambabwera kwa ine acindiuza nkhaniyo. Tenepo inepano nimbatonga nkhaniyo, ndiciwadziwisambo bzomwe Mulungu wacadidi watonga na malamulo yace.”
17 Amibzala wacewo adamuuza kuti: “Bzomwe ukucitabzi bziri lini bwino.
18 Kulewa cadidi, bzimwebzi bzin’netesa iwepo pabodzi na wanthu omwe unawowa, thangwe umweyu ni mtolo ukulu kwene-kwene omwe un’kwanisa lini kuunyamula wekha.
19 Tsapano tetekera bzomwe ndikuuze. Nin’kupasa malango ndipo Mulungu an’dzakhala nawe. Iwepo umbalewelewe na Mulungu wacadidi m’mbuto mwa wanthuwa na kumbayendesa mirandu yawo kwa Mulungu wacadidi.
20 Iwepo un’funika kumbawapfunzisa bzakutonga bza Mulungu na malamulo yace. Ndipo un’funikambo kuwadziwisa njira yomwe an’funika kufamba na basa lomwe an’funika kuphata.
21 Koma pakati pa mbumbayi, usankhule amuna wakuthemera omwe ambagopa Mulungu, wakuthembeka na omwe ambafuna lini kugumana phindu mwakusaya cirungamo, ndipo uwaikhe kuti akhale atsogoleri wa wanthu 1000, atsogoleri wa wanthu 100, atsogoleri wa wanthu 50 na atsogoleri wa wanthu 10.
22 Ndipo amuna amwewa, an’funika kutonga wanthuwa pakawoneka mirandu.* Tsono nkhani iri-yentse yomwe njakunesa kwene-kwene ambaibwerese kwa iwepo, koma nkhani yomwe njakunesa lini ambaitonge ndiwo. Cepesa mtolo wako mwakubvuma kuti iwo akuthandize.
23 Ukacita bzimwebzi ndipo penu mpsakubverana na kufuna kwa Mulungu, basali lin’dzakhala lini cimtolo kwa iwepo ndipo wanthuwa an’dzabwerera m’mii mwawo wakukondwa.”
24 Pa nthawe imweyoletu Mozeji adabvera bzomwe amibzala wace adamuuza ndipo adacita bzentse bzomwe adamuuzabzo.
25 Mozeji adasankhula amuna wakuthemera pakati pa Ajirayeri wentse ndipo adawaikha kuti akhale atsogoleri wa wanthu 1000, atsogoleri wa wanthu 100, atsogoleri wa wanthu 50 na atsogoleri wa wanthu 10.
26 Tenepo iwo akhambatonga wanthu pakagumanika mulandu. Nkhani iri-yentse yakunesa akhambaiyendesa kwa Mozeji, koma nkhani yakusaya kunesa akhambaitonga ndiwo.
27 Patsogolo pace Mozeji adagonekana na amibzala wace ndipo iwo adabwerera ku dziko lawo.
Mafala ya m'nyantsi
^ Kuthandauza “Akhali Mulendo Kumwekule.”
^ Kuthandauza “Mulungu Ndiye Mthandizi Wangu.”
^ Mafala yace caiyo: “m’manja mwa Edjipito.”
^ Mafala yace caiyo: “nthawe zentse.”
