Ekisodo 19:1-25
19 Pa mwezi wacitatu, kucokera pomwe Ajirayeri adacoka ku Edjipito, pa ntsiku imweyo iwo adafika ku dambo la Sinai.
2 Iwo adaguduka ku Refidimu acikafika ku dambo la Sinai ndipo adamanga misasa yawo m’dambomo. Ajirayeri adamanga msasa wawo pamwepo pafupi na phiri.
3 Patsogolo pace Mozeji adakwira pa phiripo kuti akawonane na Mulungu wacadidi, ndipo Yahova adamucemera na pa phiripo acimuuza kuti: “Ukauze nyumba ya Djakobo, wana wa Jirayeri kuti:
4 ‘Imwepo mudawona mwekha bzomwe ndidacitira Aedjipito kuti ndikunyamuleni ninga momwe mphungu imbanyamulira wana wace, ndipo ndakubweresani kwa ine.
5 Imwepo mukabvera na mtima wentse mafala yangu na kuteweza mpangano wangu, kulewa cadidi mun’dzakhala cuma cangu cakupambulika pakati pa wanthu wentse, pakuti dziko lentse ndangu.
6 Imwepo mun’dzakhala mtundu wangu wakucena na antsembe omwe an’dzatonga ninga amambo.’* Yamweya ni mafala yomwe ukauze Ajirayeri.”
7 Tenepo Mozeji adapolika ndipo adacemeresa akulu-akulu wentse wa Ajirayeri aciwauza mafala yentse yomwe Yahova akhadamuuza.
8 Patsogolo pace wanthu wentse adatawirira pabodzi kuti: “Tin’dzacita bzentse bzomwe Yahova walewa.” Pa nthawe imweyoletu Mozeji adabwerera kwa Yahova acikamuuza bzomwe wanthuwo akhadatawira.
9 Ndipo Yahova adauza Mozeji kuti: “Tetekera! Ndikubwera kwa iwepo mu mtambo upswipa kuti wanthu abve pomwe ndikulewalewa nawe, kuti iwo akukhulupire nthawe zentse.” Patsogolo pace Mozeji adauza Yahova bzomwe wanthuwo adalewa.
10 Patsogolo pace Yahova adauza Mozeji kuti: “Ndoko ndipo ukacenese wanthuwo lero na mangwana, ndipo iwo an’funika kufula bzakubvala bzawo.
11 Iwo an’funika kukhala wakukonzeka pa ntsiku yacitatu, thangwe pa ntsiku yacitatuyo Yahova an’dzabwera pa Phiri la Sinai pamaso pa wanthu wentse.
12 Wanthuwo uwaikhire malire kuzungulira phiri lentsenelo ndipo uwauze kuti: ‘Citani mphole kuti muleke kukwira m’phirimu ayai kukhuya m’mphepete mwace. Ali-wentse omwe an’khuya phiriri kulewa cadidi an’dzaphedwa.
13 Munthu ali-wentse aleke kudzakhuya nyakuphonyayo koma adzamubome na minyala ayai kumulasa.* Bziribe basa penu ni cifuwo ayai munthu, an’dzafunika kuphedwa.’ Tsono nyanga ya bira ikadzalira, wanthu wentse adzafendere pa phiripo.”
14 Tenepo Mozeji adabuluka m’phirimo ndipo adayenda komwe kukhana wanthuko aciyamba kuwacenesa, ndipo iwo adafulambo bzakubvala bzawo.
15 Ndipo iye adauza wanthuwo kuti: “Pakufika ntsiku yacitatu mukhale mudakonzeka. Lekani kucita malume ya pamphasa.”*
16 Pa ntsiku yacitatuyo ku macibese, kukhabveka kugunda na bziphaliwali, ndipo phiri lentsenelo likhadampsinkhidwa na mtambo upswipa. Kudabvekambo kulira kwamphanvu kwa nyanga ndipo wanthu wentse mu msasamo adayamba kutetemera na mantha.
17 Mozeji adatenga wanthuwo aciyenda nawo kunja kwa msasa kuti akagumane na Mulungu wacadidi, ndipo iwo adakaima m’mphepete mwa phiriro.
18 Phiri lentse la Sinai likhacoka utsi, thangwe Yahova adabulukira pa phiripo ninga cirambi-rambi ca moto; utsibo bukhakwira kudzulu ninga utsi bwa pa uvuni ndipo phiri lentsenelo likhatekenyeka kwene-kwene.
19 Muwira wa nyangayo udayenda ucithumizirika, Mozeji adalewalewa ndipo Mulungu wacadidi adamutawira.
20 Tenepo Yahova adafika pa ntsonga ya Phiri la Sinai. Patsogolo pace Yahova adacemera Mozeji kuti akwire pa ntsonga ya phiriro, ndipo Mozeji adakwiradi.
21 Yahova adauza Mozeji kuti: “Polika kuti ukacenjeze wanthuwo kuti aleke kupitirira malire kuti awone Yahova, pakuti akacita bzimwebzo an’dzafa.
22 Ndipo antsembe omwe nthawe zentse ambafenderera Yahova, an’funika kubzicenesa kuti Yahova aleke kuwapha.”
23 Patsogolo pace Mozeji adauza Yahova kuti: “Wanthuwa an’kwira lini pa Phiri la Sinai, thangwe imwepo mudaticenjeza kale pomwe mudandiuza kuti: ‘Uikhe malire kuzungulira phiriri ndipo mumbaliwone kuti ndakucena.’”
24 Tsono Yahova adamuuza kuti: “Polika ndipo ukabwere pomwe pabodzi na Aroni, tsono leka kulekerera kuti antsembe pabodzi na wanthu apitirire malire kuyenda kuna Yahova, kuti iye aleke kuwapha.”
25 Tenepo Mozeji adapolika aciyenda kuna wanthuwo ndipo adakawauza bzimwebzi.
Mafala ya m'nyantsi
^ Mafala yace caiyo: “umambo bwa antsembe.”
^ Pinango-pentse kumulasa na dipa.
^ Mafala yace caiyo: “Lekani kufenderera mkazi.”
