Ekisodo 34:1-35
34 Patsogolo pace Yahova adauza Mozeji kuti: “Sema pomwe minyala miwiri ninga yakuyamba ire, ndipo inepano nin’dzanemba mafala yomwe yakhali pa minyala yakuyamba, yomwe iwepo waswa ire.
2 Konzeka kuti mangwana macibese-bese iwepo udzakwire m’Phiri la Sinai ucidzawonekera pamaso pangu pa ntsonga ya phiriro.
3 Tsono un’funika lini kudzakwira na munthu ali-wentse ndipo paleke kudzagumanika munthu pa mbuto iri-yentse m’phirimo. Napo mabira ayai ng’ombe bzin’funika lini kudyeseredwa pafupi na phiriro.”
4 Tenepo Mozeji adasema minyala minango miwiri ninga yakuyamba ire, ndipo adamuka macibese-bese acikwira m’Phiri la Sinai ninga momwe Yahova akhadamuuzira, ndipo iye adanyamula minyala miwiriyo m’manja mwace.
5 Tenepo Yahova adabuluka mu mtambo aciima pafupi na Mozeji, acimudziwisa dzina lace lakuti Yahova.
6 Yahova adapita patsogolo pa Mozeji acimbalewa kuti: “Yahova, Yahova, Mulungu wantsisi na wakudeka mtima, omwe ambakalipa lini kamangu, walufoyi likulu na wacadidi,*
7 omwe ambalatiza lufoyi lacadidi kwa mibadwo bzulu na bzulu, acilekerera bzakuphonya na pikado, koma cipo acidzaleka kulanga anyamulandu acibweresa nyathwa kwa wana, azukulu, m’badwo wacitatu na wacinai thangwe ra bzakuphonya bza azibereki wawo.”
8 Pa nthawe imweyoletu Mozeji adagodama acitsulimisa msolo wace mpaka pantsi.
9 Tenepo iye adati: “Imwe Yahova, penu mwandidekeradi mtima, ndaphata minyendo Yahova, fambani nafe ndipo khalani pakati pathu napo kuti ndife wanthu wakusaya kubva. Tilekerereni bzakuphonya bzathu na pikado zathu ndipo tibvumeni ninga wanthu wanu.”
10 Mulungu adamutawira kuti: “Inepano ndikucita namwe mpangano uyu: Nin’dzacita bzinthu bzakudabwisa pamaso pa wanthu wako wentse, bzinthu bzomwe ndikanati kale kucita pa dziko lentse la pantsi ayai pakati pa mitundu yentse, ndipo wanthu wentse wakukuzungulirani an’dzawona mabasa ya Yahova, pakuti nin’dzakucitirani bzinthu bzakupasa mantha kwene-kwene.
11 “Tetekerani bwino-bwino bzomwe ndikukuuzani lero. Nin’dzathamangisa pamaso panu Aamori, Akanani, Ahiti, Aperezi, Ahivi na Ajebusi.
12 Citani mphole kuti muleke kukacita mpangano na wanthu wa m’dziko lomwe mukuyendalo, kugopera kuti angakakusocereseni.
13 Mukapfudze maguwa yawo ya ntsembe, mukaswe mapilare yawo yakupambulika ndipo mukagwate-gwate maposto yawo yakupambulika.
14 Mun’funika lini kugodamira mulungu munango, pakuti Yahova ambadziwika na kufuna kunamatidwa iye yekha basi. Inde, iye ni Mulungu omwe ambafuna kunamatidwa iye yekha basi.
15 Citani mphole kuti muleke kukacita mpangano na wanthu wa m’dzikolo, thangwe akambakacita upombo na mirungu yawo na kupereka ntsembe kwa mirungu yawoyo, winango angadzakucemereni mucikadya ntsembe zawozo.
16 Ndipo imwepo mungadzatenge wana wawo wacikazi kuti akhale akazi wa wana wanu wacimuna, ndipo wana wawowo angambadzacite uputa na mirungu yawo acicitisambo wana wanu kucita upombo na mirungu yawoyo.
17 “Lekani kukonza bzifanikiso bza simbi yakucita kusungunusa.
18 “Mun’funika kumbacita Phwando la Pau Zakusaya Fermento. Mumbadye pau zakusaya fermentozo ninga momwe ndidakuuzirani ndipo mumbacite bzimwebzo kwa ntsiku 7 pa nthawe yomwe ndidaikhazikisa, m’mwezi wa Abibe,* thangwe umweyu ni mwezi omwe mudacoka m’dziko la Edjipito.
19 “Mwana ali-wentse wacimuna wakuyamba kubadwa* ni wangu, kuphatanidzambo mwana wakuyamba kubadwa wa bzifuwo bzanu bzentse, napo mwana wakuyamba kubadwa wa ng’ombe ayai bira.
20 Mwana ali-wentse wakuyamba kubadwa wa bulu mumbamulombole na bira. Tsono mukasaya kumulombola, mumbamuphe mwakucita kumutcola khosi ndipo mun’funika kumbalombola wana wanu wentse wakuyamba kubadwa wacimuna. Palibe munthu omwe an’funika kubwera kudzawonekera kwa ine cimanja-manja.
21 “Mumbaphate basa kwa ntsiku 6, tsono pa ntsiku yaci 7 mun’funika kupuma. Napo icikhala nthawe yakulima ayai yakubvuna, mun’funika basi kumbapuma.
22 “Mumbacite Phwando la Masumana, ndipo pakucita phwando limweri, mumbapereke tirigu yakuyamba kukhuma yomwe mwabvuna, ndipo kuphampha kwa gole mumbacitembo Phwando Lakumaliza Kubvuna* bzinthu bza m’munda.
23 “Amuna wentse pakati panu an’funika kumbawonekera pamaso pa Mbuya wacadidi, Yahova, Mulungu wa Jirayeri katatu pa gole.
24 Pakuti nin’dzathamangisira mitundu ya wanthu kutali na imwepo ndipo nin’dzakuza dziko lanu, ndipo palibe omwe an’dzasirira dziko lanu mukayenda kukawonekera kwa Yahova Mulungu wanu katatu pa gole.
25 “Ukapereka mulopa wa ntsembe yangu, leka kupereka pabodzi na bzinthu bzomwe bzina fermento. Ntsembe ya phwando la Paskwa in’funika lini kukoyedwa mpaka mangwana yace.
26 “Mun’funika kumbayendesa ku nyumba ya Yahova Mulungu wanu bzinthu bzabwino kwene-kwene bzakuyambirira kukhuma bza m’munda mwanu.
“Lekani kuphika ntcere mu mkaka wa mai wace.”
27 Yahova adapitiriza kuuza Mozeji kuti: “Unembe mafalaya pakuti inepano ndikucita mpangano na imwepo pabodzi na Jirayeri mwakubverana na mafala yamweya.”
28 Mozeji adapitiriza kukhala m’phirimo kwa ntsiku 40, usiku na masikati. Iye alibe kudya cinthu ne kumwa madzi. Ndipo Mulungu adanemba mafala ya mpanganoyo pa minyalayo, yomwe ni Malamulo Khumi.*
29 Patsogolo pace Mozeji adabuluka m’Phiri la Sinai na minyala miwiri ya Umboni m‘manja mwace. Pomwe Mozeji adabuluka m’phirimo, iye akhadziwa lini kuti nkhope yace ikhayetima pakuti akhadalewalewa na Mulungu.
30 Pomwe Aroni na Ajirayeri wentse adanyang’anisa Mozeji, adawona kuti nkhope yace ikhayetima ndipo adabva mantha kumufenderera.
31 Tsono Mozeji adawacemera, ndipo Aroni na atsogoleri wentse wa mbumba ya Jirayeri adayenda komwe kukhana iyeko, ndipo iye adayamba kulewalewa nawo.
32 Patsogolo pace Ajirayeri wentse adamufenderera ndipo iye adawauza malamulo yentse yomwe Yahova akhadamuuza m’Phiri la Sinai.
33 Mozeji akamala kulewalewa na wanthuwo akhambampsinkha nkhope yace na nguwo.
34 Tsono Mozeji akapita mu tendi la mtsonkhano kukawonekera pamaso pa Yahova kuti akalewelewe naye, iye akhacosa nguwoyo mpaka kucoka m’mwemo. Patsogolo pace iye akhabula aciyenda kuna Ajirayeri acikawauza malamulo yomwe wapasidwa.
35 Ndipo Ajirayeri adawona kuti nkhope ya Mozeji ikhayetima, tenepo Mozeji adampsinkha pomwe nkhope yace mpaka kubwerera kukalewalewa na Mulungu.
Mafala ya m'nyantsi
^ Ayai, “wakukhulupirika.”
^ Onani Mafala Yakuphampha B15.
^ Mafala yace caiyo: “Ciri-centse cakuyamba kubadwa comwe cafungula nthumbo.”
^ Limbadziwikambo kuti Phwando la Misasa
^ Mafala yace caiyo: “Mafala Khumi.” Yambadziwikambo na bzinthu khumi bzomwe bzin’funika kucitidwa.
