Ekisodo 40:1-38
40 Patsogolo pace Yahova adauza Mozeji kuti:
2 “Pa ntsiku yakuyamba, ya mwezi wakuyamba, un’funika kudzamanga tabernakulo, yomwe ni tendi la mtsonkhano.
3 Udzaikhe m’mwemo thungwa la Umboni, ucidzampsinkha mbali yomwe ina Thungwalo na kortina.
4 Udzaikhe meza na bzinthu bzomwe bzin’dzaphatisidwa basa pa mezayo ndipo udzaikhembo cakuikhira kandiyero ucidzagasa makandiyeroyo.
5 Patsogolo pace udzaikhe guwa la ntsembe la oro la bzakununtcirisa patsogolo pa thungwa la Umboni ndipo udzaikhembo kortina pa msuwo pa tabernakulo.
6 “Udzaikhe guwa la ntsembe zakucita kutentha patsogolo pa msuwo wa tabernakulo, yomwe ni tendi la mtsonkhano,
7 ndipo udzaikhe basiya pakati pa tendi la mtsonkhano na guwa la ntsembe, ucidzaikha madzi m’mwemo.
8 Patsogolo pace udzakonze litsito la tabernakulo, ndipo udzaikhe kortina pa msuwo wa litsitolo.
9 Patsogolo pace, udzatenge mafuta yakudzozera ndipo udzadzoze tabernakulo na bzinthu bzentse bzomwe bziri m’mwemo, ndipo udzalicenesembo pabodzi na bzombo bzace bzentse kuti lidzakhale cinthu cakupambulika.
10 Udzadzozembo guwa la ntsembe zakucita kutentha na bzombo bzace bzentse ndipo udzacenese guwalo kuti likhale lakucena kwene-kwene.
11 Ndipo udzadzozembo basiya na cakukhazikira cace, ndipo udzalicenese.
12 “Patsogolo pace udzabwerese Aroni na wana wace pafupi na pa msuwo wa tendi la mtsonkhanolo ndipo udzawasambise na madzi.*
13 Ndipo udzabvazike Aroni bzakubvala bzakupambulika ucidzamudzoza na kumucenesa, ndipo iye an’dzanditumikira ninga wantsembe.
14 Patsogolo pace udzabwerese wana wace pafupi ucidzawabvazika bzakubvala bzitali-bzitali.
15 Udzawadzoze ninga momwe un’dzadzozera pai wawo kuti iwo adzanditumikire ninga antsembe, ndipo kudzozedwa kwawoko kun’dzawacitisa kuti iwo anditumikire ninga antsembe nthawe zentse ku mibadwo yawo yentse.”
16 Mozeji adacitadi bzentse ndendende ninga momwe Yahova akhadamuuzira. Iye adacitadi bzimwebzo.
17 M’mwezi wakuyamba, mu gole laciwiri, pa ntsiku yakuyamba ya mweziyo, tabernakulo idamala kukonzedwa.
18 Pomwe Mozeji adamaliza kukonza tabernakulo, iye adaikha matsinde yomwe yana mibowo yakulumikidzira pantsi, ndipo adaikha aro zace, mbaliro na mapilare.
19 Mozeji adafuthula nguwo acipswimphira tabernakulo ninga momwe Yahova akhadamuuzira.
20 Patsogolo pace, iye adatenga minyala ya Umboni acikaiikha mu Thungwa, ndipo adaikhambo bzakunyamulira Thungwalo m’mphepete mwace, aciligwanankhira na cakugwanankhirira cace.
21 Mozeji adapitisa Thungwa mu tabernakulo ndipo adaikha kortina pakati, acifunga mbali yomwe ikhana thungwa la Umboni ninga momwe Yahova akhadamuuzira.
22 Patsogolo pace iye adaikha meza mu tendi la mtsonkhano ku mbali ya ku norte ya tabernakuloyo, kunja kwa kortina.
23 Ndipo Mozeji adaikha pau padzulu pa meza pamaso pa Yahova ninga momwe Yahova akhadamuuzira.
24 Iye adaikha cakuikhira kandiyero mu tendi la mtsonkhano patsogolo pa meza, ku suli kwa tabernakulo.
25 Mozeji adagasa makandiyero pamaso pa Yahova ninga momwe Yahova akhadamuuzira.
26 Patsogolo pace iye adaikha guwa la ntsembe la oro mu tendi la mtsonkhano patsogolo pa kortina,
27 kuti ambatenthere bzakununtcirisa ninga momwe Yahova akhadauzira Mozeji.
28 Patsogolo pace iye adaikha kortina pa msuwo wa tabernakulo.
29 Iye adaikha guwa la ntsembe zakucita kutentha pa msuwo wa tabernakulo, yomwe ni tendi la mtsonkhano kuti ambaperekere ntsembe zakucita kutentha na ntsembe za bzinthu bza m’munda ninga momwe Yahova akhadauzira Mozeji.
30 Patsogolo pace, iye adaikha basiya pakati pa tendi la mtsonkhano na guwa la ntsembe, ndipo adaikha madzi m’mwemo kuti ambasambire m’manja na m’minyendo.
31 Mozeji, Aroni na wana wace akhasamba m’manja na m’minyendo na madzi ya m’basiyalo.
32 Iwo akhasamba nthawe zentse pakupita m’tendi la mtsonkhano ayai pomwe akhafendera pafupi na guwa la ntsembe, ninga momwe Yahova akhadauzira Mozeji.
33 Pakumalizira pace iye adamanga litsito m’mphepete mwa tabernakulo na guwa la ntsembe, ndipo adaikha kortina pa msuwo wa litsitolo.
Tenepo Mozeji adamala kucita basa lentse.
34 Mtambo udayamba kumpsinkha tendi la mtsonkhano ndipo ulemerero bwa Yahova budadzala mu tabernakulomo.
35 Mozeji akhakwanisa lini kupita mu tendi la mtsonkhanolo, thangwe mtambo ukhapitiriza kuima padzulu pa tendiro ndipo ulemerero bwa Yahova bukhadadzala mu tabernakulomo.
36 Mtamboyo ukadzusika padzulu pa tabernakuloyo, Ajirayeri akhanyamula misasa yawo acipitiriza na ulendo bwawo, ndipo iwo akhacita bzimwebzi pa ulendo bwawo bwentse.
37 Tsono mtamboyo ukasaya kudzusika, Ajirayeri akhacoka lini pa msasa wawo mpaka pa ntsiku yomwe mtamboyo ukhadzusika.
38 Ntsiku zentse za ulendo bwawo, wana wa Jirayeri akhambawona mtambo wa Yahova padzulu pa tabernakulo masikati, ndipo usiku akhambawona moto padzulu pa tabernakuloyo.
Mafala ya m'nyantsi
^ Pinango-pentse Mozeji adauza Aroni na wana wace kuti asambe.
