Ekisodo 8:1-32
8 Patsogolo pace Yahova adauza Mozeji kuti: “Ndoko kwa Farawo ndipo ukamuuze kuti: ‘Yahova walewa kuti: “Bvumiza wanthu wangu kuti ayende kukanditumikira.
2 Tsono ukapitiriza kulamba kuti iwo ayende, nin’dzabweresa muliri wa acule m’dziko lako lentse.
3 Mkulo wa Nilo un’dzadzala na acule ndipo iwo an’dzapita m’nyumba mwako, m’cipinda cako, pa kama pako, m’nyumba za atumiki wako, za wanthu wako, m’maforno mwako na m’bzombo bzako bzakumunyira* tirigu.
4 Aculewo an’dzabwera kwa iwepo, kwa wanthu wako na atumiki wako wentse.”’”
5 Patsogolo pace Yahova adauza Mozeji kuti: “Uza Aroni kuti: ‘Tenga mpsimbo yako ndipo ulate mikulo, tumikulo twa mkulo wa Nilo na mathawale, kuti acule wentse omwe ali m’mwemo ayende m’dziko la Edjipito.’”
6 Tenepo Aroni adafuthula boko lace acilata madzi ya mu Edjipito, ndipo acule adacoka m’mwemo acimpsinkha dziko lentse la Edjipito.
7 Antsembe wakucita bzamatsenga adacitambo matsenga yawo acibweresa acule mu dziko la Edjipito.
8 Tenepo Farawo adacemera Mozeji na Aroni aciwauza kuti: “Kumbirani Yahova kuti acose aculewa kwa inepano na kwa wanthu wangu; pakuti inepano ndikufuna kubvumiza wanthu wanu akapereke ntsembe kwa Yahova.”
9 Tenepo Mozeji adauza Farawo kuti: “Lewani ndimwepo ntsiku yomwe mukufuna kuti ndikakukumbirireni kwa Mulungu kuti acose acule kwa imwepo, atumiki wanu, wanthu wanu na m’nyumba zanu. Tsono aculewo an’dzandosala mu mkulo wa Nilo basi.”
10 Tenepo Farawo adatawira kuti: “Mangwana.” Ndipo Mozeji adati: “Bzikhale ninga momwe mwaleweramu kuti mudziwe kuti palibe wakundendemerana na Yahova Mulungu wathu.
11 Aculewo an’dzacoka kwa imwepo, m’nyumba zanu, kwa atumiki wanu na kwa wanthu wanu. Iwo an’dzandosala mu mkulo wa Nilo basi.”
12 Tenepo Mozeji na Aroni adacoka pamaso pa Farawo, ndipo Mozeji adakakumbira Yahova kuti acose acule omwe akhadabweresera Farawo.
13 Tenepo, Yahova adacitadi ninga momwe Mozeji adakumbirira; ndipo acule omwe akhali m’nyumba, m’makintale na m’minda adayamba kufa.
14 Aedjipitowo adayamba kugwezeka midu mikulu-mikulu ya aculewo ndipo dziko lentsenelo lidayamba kununkha.
15 Pomwe Farawo adawona kuti muliri wa aculewo wamala, iye adaumisa mtima wace ndipo adalamba kubvera Mozeji na Aroni ninga momwe Yahova akhadalewera.
16 Yahova adauza Mozeji kuti: “Uza Aroni kuti: ‘Tenga mpsimbo yako ucimenya pfumbi la pantsi ndipo pfumbiro lin’dzasanduka mbudu m’dziko lentse la Edjipito.’”
17 Iwo adacitadi bzimwebzo. Tenepo Aroni adafuthula boko lace acimenya pfumbi la pantsi na mpsimbo yace, ndipo pfumbiro lidasanduka mbudu ziciyamba kuluma wanthu na bzifuwo. Pfumbi lentse la m’dziko la Edjipito lidasanduka mbudu.
18 Antsembe wakucita bzamatsenga adayezera kucitambo bzibodzi-bodzibzo, tsono adatazira ndipo mbuduzo zidayamba kuluma wanthu na bzifuwo.
19 Tenepo antsembe wakucita bzamatsengawo adauza Farawo kuti: “Cimweci ni cala ca Mulungu!” Tsono Farawo adapitiriza kuumisa mtima wace ndipo alibe kubvera Mozeji na Aroni ninga momwe Yahova akhadalewera.
20 Patsogolo pace Yahova adauza Mozeji kuti: “Udzalamuke mangwana macibese-bese ndipo udzayende kukagumana na Farawo! Iye an’dzakhala akuyenda ku mkulo! Ndipo ukamuuze kuti: ‘Yahova walewa kuti: “Bvumiza wanthu wangu kuti ayende kukanditumikira.
21 Tsono ukasaya kubvumiza kuti wanthu wangu ayende, Inepano nin’dzatumiza abulula* kwa iwepo, kwa atumiki wako, kwa wanthu wako na m’nyumba zanu; ndipo m’nyumba za Aedjipito mun’dzadzala na abululawo ndipo an’dzagumanika pa mbuto iri-yentse yomwe ina wanthu.*
22 Pa ntsiku imweyo nin’dzapambula mphimpha ya Goseni komwe kumbakhala wanthu wangu. Kumweko kun’dzakhala kulibe bulula ne na m’bodziyo; ndikadzacita bzimwebzi, un’dzadziwa kuti ine Yahova ndiri mu dziko lino.
23 Nin’dzacitisa kuti pawoneke kusiyana pakati pa wanthu wangu na wanthu wako. Bzimwebzi bziti bzidzacitike mangwana.”’”
24 Tenepo Yahova adacitadi bzimwebzi, abulula azinji adayamba kupita m’nyumba mwa Farawo, m’nyumba za atumiki wace na m’dziko lentse la Edjipito. Dziko lentsenero lidasakazidwa na abululawo.
25 Pakumalizira pace, Farawo adacemera Mozeji na Aroni aciwauza kuti: “Ndokoni, kaperekeni ntsembe kwa Mulungu wanu, koma mucite bzimwebzo m’dziko lino.”
26 Tsono Mozeji adalewa kuti: “Mpsakuthemera lini kwa ifepano kucita bzimwebzo m’dziko lino; pakuti ntsembe zomwe tikufuna kupereka kwa Yahova Mulungu wathu n’zakunyantsa kwa Aedjipito. Tikapereka ntsembe zomwe Aedjipito ambaziwona kuti n’zakunyantsa, kodi iwo an’dzatithusira lini minyala?
27 Ifepano tin’dzacita ulendo bwa ntsiku zitatu kuyenda ku dambo ndipo kumweko tin’kapereka ntsembe kwa Yahova Mulungu wathu ninga momwe iye adatiuzira.”
28 Tsono Farawo adati: “Inepano nin’kubvumizani kuti muyende ku dambo kuti mukapereke ntsembe kwa Yahova Mulungu wanuyo, koma lekani kuyenda kutali kwene-kwene. Tsono ndikumbirire kwa Mulungu wanu kuti acose abululawa.”
29 Tenepo Mozeji adalewa kuti: “Inepano ndikucoka pano, ndikuyenda kukakukumbirirani kwa Yahova ndipo mangwana, abululawa an’dzacoka kwa imwepo a Farawo, atumiki wanu na wanthu wanu. Tsono imwepo a Farawo lekani kutinyengeza pomwe mwakusaya kubvumiza wanthu kuti ayende kukapereka ntsembe kwa Yahova.”
30 Mozeji adacoka pamaso pa Farawo ndipo adayenda kukadandaulira Yahova.
31 Yahova adacitadi bzomwe Mozeji adakumbira ndipo abululawo adacoka kwa Farawo, kwa atumiki wace na kwa wanthu wace. Ndipo palibe kusala bulula ne na m’bodziyo.
32 Tsono Farawo adaumisa pomwe mtima wace, ndipo alibe kubvumiza wanthuwo kucoka.
Mafala ya m'nyantsi
^ Ayai, “na matijela yako yakumunyira.”
^ Bulula ni mtundu munango wa ntcentce zomwe zimbaluma.
^ Omwe ni Aedjipito.
