Ezekiyeli 12:1-28
12 Yahova adalewalewa nande pomwe kuti:
2 “Iwe mwana wa munthu, ukukhala na wanthu wakupanduka. Iwo ana maso koma ambawona lini, ndipo ana makutu koma ambabva lini, pakuti ni wanthu wakupanduka.
3 Tsono iwe mwana wa munthu, konzekera mitolo yako kuti uyende ku ukapolo. Tenepo uyende ku ukapolo masikati pomwe iwo akuwona. Ndoko ku ukapolo, kucokera pamui pako kuyenda ku mbuto inango pomwe iwo akuwona. Pinango iwo an’dzakubvera pakuti ni wanthu wakupanduka.
4 Masikati pomwe iwo akuwona, bula na mitolo yako kunja kuti uyende ku ukapolo, ndipo kukadoka pomwe iwo akuwona, iwepo ubule ninga munthu omwe akuyendesedwa ku ukapolo.
5 “Ubowole parede pomwe iwo akuwona ndipo ubulise mitolo yako na pamwepo.
6 Pomwe iwo akuwona, nyamula mitolo yako paphewa ndipo ubule nayo kunja ku mdima. Mpsinkha nkhope yako kuti uleke kuwona pantsi, pakuti nin’dzacitisa iwepo kukhala cizindikiro kwa nyumba ya Jirayeri.”
7 Ndidacita ninga momwe adandiuzira. Masikati ndidacosa mitolo yangu ninga mitolo ya munthu omwe akuyendesedwa ku ukapolo. Pomwe kukhadoka, ndidaboola parede na manja. Usiku ndidanyamula bzinthu bzangu ndicibula nabzo kunja ndipo ndidabzinyamula paphewa pomwe iwo akuwona na maso yawo.
8 Macibese Yahova adalewalewa nande pomwe kuti:
9 “Iwe mwana wa munthu, kodi wanthu wakupanduka wa nyumba ya Jirayeri alibe kukubvunza kuti: ‘N’ciyani comwe ukucitaci?’
10 Uwauze kuti: ‘Yahova Mbuya Mkululetu walewa kuti: “Mafalaya yakulewa bza akulu-akulu wa mu Jirayeri na nyumba yentse ya Jirayeri yomwe iri mu mzindayu.”’
11 “Uwauze kuti iwepo ndiwe cizindikiro. Ninga momwe bzacitikira na iwepo, bzin’dzacitikirambo iwo. Iwo an’dzayenda ku ukapolo ku dziko linango.
12 Ndipo mtsogoleri omwe ali pakati pawo an’dzanyamula mitolo yace paphewa mu mdima acibula. An’dzaboola muro ndipo an’dzatenga mitolo yace acibula nayo pamwepo, ndipo iye an’dzampsinkha nkhope yace kuti aleke kuwona pantsi.
13 Nin’dzamuthusira ukonde bwangu ndipo iye an’dzaphatidwa na ukonde bwangu bwa msodzi. Tenepo nin’dzamuyendesa ku Babiloniya, m’dziko la Akalideya, tsono iye an’dzaliwona lini ndipo an’dzafera kumweko.
14 Ndipo wentse omwe an’dzakhala ali m’mbali mwace, anyakuthandiza na acikunda wace, nin’dzawabalalisira m’mbali zentse ndipo nin’dzasolola xipada ndiciwatewera.
15 Ndipo iwo an’dzadziwa kuti ine ndine Yahova ndikadzawathothera ku mitundu inango na kuwabalalisira m’madziko yakusiyana-siyana.
16 Tsono nin’dzapulumusa winango wa iwo ku xipada, njala na cisi* kuti adzalewe ku mitundu ya wanthu yomwe iwo an’dzayendako bza bzicito bzawo bzentse bzakunyantsa, ndipo an’dzadziwa kuti ine ndine Yahova.”
17 Tenepo Yahova adalewalewa nande pomwe kuti:
18 “Iwe mwana wa munthu, iwepo un’funika kudya cakudya cako ukutetemera na kumwa madzi yako una mantha na thupo.
19 Kauze wanthu wa m’dzikolo kuti: ‘Yahova Mbuya Mkululetu walewa kwa wanthu omwe akukhala mu Jeruzalemu m’dziko la Jirayeri kuti: “Iwo an’dzadya cakudya cawo na thupo, ndipo an’dzamwa madzi yawo ana mantha pakuti dziko lawo lin’dzakhaliratu matere thangwe ra ciwembo comwe wanthu wentse omwe akukhala m’mwemo akucita.
20 Mizinda yakukhalidwa in’dzapfudzidwa ndipo dzikolo lin’dzakhalidwa lini na wanthu, ndipo imwepo mun’dzadziwa kuti ine ndine Yahova.”’”
21 Tenepo Yahova adalewalewa nande pomwe kuti:
22 “Iwe mwana wa munthu, kodi ni mwani uponi umweyu omwe ukulewedwa mu Jirayeriyu wakuti: ‘Ntsiku zikupita, tsono palibe masomphenya yomwe yakukwanisika’?
23 Tenepo uwauze kuti: ‘Yahova Mbuya Mkululetu walewa kuti: “Nin’malisa mwaniyu ndipo un’dzalewedwa lini pomwe mu Jirayeri.”’ Ndipo uwauze kuti: ‘Ntsiku zikufika ndipo masomphenya yentse yan’dzakwanisika.’
24 Pakuti pa nyumba ya Jirayeri pan’dzawoneka lini pomwe masomphenya yakunama ne kuvima kwacinyengo.
25 ‘“Pakuti ine Yahova nin’dzalewa. Mafala yentse yomwe nin’dzalewa yan’dzakwanisika mwakusaya kucedwa. Imwe wanthu wakupanduka, nin’dzalewa mafala ndipo nin’dzacitisa kuti yakwanisike mu ntsiku zanu,” walewa tenepo Yahova Mbuya Mkululetu.’”
26 Yahova adalewalewa nande pomwe kuti:
27 “Iwe mwana wa munthu, wanthu wa mu Jirayeri* akulewa kuti: ‘Masomphenya yomwe iye akuwona yan’dzacitika kale-kale. Iye akulewa profesiya yomwe in’dzacitika kutsogolo caiko.’
28 Tenepo uwauze kuti: ‘Yahova Mbuya Mkululetu walewa kuti: “‘Palibe fala langu ne na libodziro lomwe lin’dzacedwa kukwanisika. Bzentse bzomwe nin’dzalewa bzin’dzakwanisika,’ walewa tenepo Yahova Mbuya Mkululetu.”’”
