Ezekiyeli 16:1-63
-
Mulungu akufuna Jeruzalemu (1-63)
16 Yahova adalewalewa nande pomwe kuti:
2 “Iwe mwana wa munthu, dziwisa Jeruzalemu bza bzicito bzace bzakunyantsa.
3 Ulewe kuti, ‘Yahova Mbuya Mkululetu akuuza Jeruzalemu kuti: “Iwepo udacokera ku dziko la Akanani ndipo udabadwira kumweko. Pai wako akhali wa dzinza la Amori ndipo mai wako akhali Mhiti.
4 Pa ntsiku yomwe iwepo udabadwa, tcombotcombo lako liribe kugwatidwa, alibe kukusambika na madzi kuti ucene ne alibe kukuikha munyu ndipo ne alibe kukukulungira na nguwo.
5 Palibe munthu omwe adakubvera ntsisi kuti akucitire cibodzi mwa bzinthu bzimwebzi. Palibe omwe adakubvera ntsisi. M’mbuto mwace, pa ntsiku yomwe udabadwa, udathusidwa kuthengo thangwe wanthu adakuwenga.
6 “‘“Pomwe ndidapita na pamwepo, ndidakuwona ukuthusa-thusa minyendo pa mulopa wako ndipo uli gone pa mulopa wakoyo, tenepo, inepano ndidalewa kuti: ‘Pitiriza kukhala na moyo.’ Inde, ndidalewa bzimwebzi pomwe ukhadagona pa mulopa wakoyo kuti: ‘Pitiriza kukhala na moyo.’
7 Ndidakucitisa kukhala thimu likulu la wanthu ninga miti yomwe ikuphukira m’thengo. Iwepo wakula, watalimpha ndipo ukuphatisa basa bzakudekesera bzabwino kwene-kwene. Masuku yako yakula ndipo tsisi lako lakulambo, tsono iwepo ukali pezi.”’
8 “‘Pomwe ndidapita na pamwepo, ndidakuwona kuti ukhana msinkhu wakuthemera kulewa mafala ya lufoyi. Tenepo ndidakufuthulira cakubvala cangu,* ndicikubvazika kuti uleke kukhala pezi. Ndidalumbira ndicicita mpangano na iwepo ndipo iwepo udakhala wangu,’ walewa tenepo Yahova Mbuya Mkululetu.
9 ‘Kuthumizira bzimwebzi, ndidakusambika na madzi, ndidatsuka mulopa wako ndipo ndidakudzola mafuta.
10 Tenepo ndidakubvazika cakubvala cakubordari,* ndipo ndidakupasa ntsapato za khanda labwino. Ndidakukulungira pa nguwo yabwino kwene-kwene ndicikubvazika bzakubvala bzakuumira.
11 Ndidakuikha bzakudekesera, ndidakubvazika mapulsera m’manja mwako ndipo ndidakubvazikambo kolari m’khosi mwako.
12 Ndidakuikha mphete pa mphuno ndipo ndidakubvazika mphete m’makutu, ndicikubvazikambo korowa mu msolo.
13 Iwepo ukhabzidekesa na oro na prata. Ukhabvala bzakubvala bzabwino, nguwo zakuumira na bzakubvala bzakubordari. Ukhadya ufa bwakunyodoka, uci na mafuta ya azeite. Udakhala wakudeka kwene-kwene ndipo ukhathemera kukhala mambo wacikazi.’”
14 “‘Thangwe ra kudeka kwako, dzina lako lidabvekera pakati pa mitundu ya wanthu, pakuti likhali labwino kwene-kwene thangwe ra ulemerero bwangu bomwe ndidakupasa,’ walewa tenepo Yahova Mbuya Mkululetu.”
15 “‘Koma udayamba kuthemba kudeka kwako ndipo udakhala puta thangwe ra kubvekera kwako. Iwepo ukhabzipereka kwa munthu ali-wentse omwe akhakufuna ndipo kudeka kwako kudakhala kwawo.
16 Iwepo udatenga bzakubvala bzako bzinango bza kore zakusiyana-siyana kuti udekesere mbuto zakupambulika zomwe ukhacitira uputa. Bzimwebzi bzikhafunika lini kucitika ndipo bzileke kudzacitika pomwe.
17 Kuthumizira bzimwebzi, iwepo udatenga bzinthu bzakufunika kwene-kwene bzakukonzedwa na oro na bzakukonzedwa* na prata bzomwe inepano ndikhadakupasa ndipo udakonzera bzifanikiso bza wanthu ucicita nabzo uputa.
18 Udatenga bzakubvala bzako bzakubordari ucifunikiza bzifanikisobzo.* Udabzipasa mafuta yangu na bzakununtcirisa bzangu.
19 Ndipo pau yomwe ndidakupasa kuti udye yakukonzedwa na ufa bwakunyodoka, mafuta na uci, iwepo udabziperekambo kwa bzifanikisobzo ninga bzakununtcirisa.* Bzimwebzi ndibzoletu bzomwe bzidacitika,’ walewa tenepo Yahova Mbuya Mkululetu.”
20 “‘Watenga wana wacimuna na wacikazi omwe ukhadandiberekera, uciwapereka ntsembe ku bzifanikiso. Kodi uputabo bukhali lini bwakukwana?
21 Iwepo wapha wana wangu uciwapereka ninga ntsembe mwakuwatentha pa moto.
22 Pomwe ukhacita bzinthu bzentse bzakunyantsabzi pabodzi na uputa, ukhakumbukira lini ntsiku zomwe ukhali tswaka, pomwe ukhali pezi ndipo ukhathusa-thusa minyendo yako pomwe ukhadagona pa mulopa wako.
23 Pomwe wamala kucita bzinthu bzakuipa bzentsenebzi, tsoka, tsoka kwa iwepo,’ walewa tenepo Yahova Mbuya Mkululetu.
24 ‘Wakonza mitunthu na mbuto zakupambulika mu mzinda uli-wentse.
25 Wamanga mbuto zako zakupambulika pa mbuto zakubvekera kwene-kwene mu mseu uli-wentse ndipo wacitisa kudeka kwako kukhala cinthu cakunyantsa, mwa kubzipereka* kwa ali-wentse omwe akhapita na pamwepo, ndipo wathumizira bzicito bzako bza uputa.
26 Iwepo wacita uputa na azivizinyu wako Aedjipito, omwe ana kalanga kakusaya kuphatika ndipo wandikalipisa na bzicito bzako bzizinji bza uputa.
27 Ndipopa nin’dzakufuthulira boko langu na kucepesa cakudya cako. Nin’dzakupereka kwa wana wacikazi wa Afilisteu, akazi omwe ambakuwenga, omwe akuipidwa na bzicito bzako bzakunyantsa kuti acite nawe bzinthu bzomwe iwo an’funa.
28 “‘Pakuti bzomwe ukhacitabzo bzikhakukwanira lini, udakacita uputa na Asiriya. Tsono napo pomwe udamala kucita nawo uputabo, bziribe kukwana basi.
29 Tenepo, iwepo udathumizira uputa bwako mpaka kufika dziko la anyamalonda* na Akalideya,* tsono bziribe kukwana basi.
30 Mtima wako ukhaduwala* pomwe ukhacita bzinthu bzentsenebzi ninga puta wakusaya manyazi,’ walewa tenepo Yahova Mbuya Mkululetu.
31 ‘Tsono pomwe udamanga mtunthu wako pa mbuto yakuwonekera mu mseu uli-wentse na kukonza mbuto zakupambulika zapadzulu m’misika iri-yentse, ukhacita lini bzinthu ninga puta thangwe ukhafuna lini kupagalidwi.
32 Iwepo ndiwe puta omwe umbafambizana na amuna winango m’mbuto mwa mwamuna wako!
33 Wanthu ambapasa maputa mphaso, tsono iwepo ndiwe omwe umbapereka mphaso kwa wentse omwe ambakukhumba, ndipo iwepo umbapereka bobobo kwa wanthu wakucokera m’mbuto zentse kuti abwere kwa iwepo kuti udzacite nawo uputa.
34 Iwepo ndiwe wakusiyana na akazi winango omwe ambacita uputa. Palibe winango omwe ambacita uputa ninga iwepo. Iwepo ndiwe omwe umbapagali amuna pomwe iwo ndiwo omwe akhafunika kukupagali. Bzomwe iwepo umbacita mpsakusiyaniratu na winango.’
35 “Tenepo iwe putawe, bvaya bzomwe Yahova an’funa kukuuza.
36 Yahova Mbuya Mkululetu walewa kuti: ‘Pakuti walatiza cikhumbo cako cakunyantsa mwakupitirira malire ndipo wanthu akuwona uli pezi pomwe ukhacita uputa na akwende wako pabodzi na bzifanikiso bzako bzentse bzakuipa na bzakunyantsa,* ucipereka mulopa wa wana wako ninga ntsembe ku bzifanikisobzo,
37 nin’dzatsonkhanisa akwende wako wentse omwe ukhawakondwesa, wentse omwe ukhawafuna na wentse omwe ukhawawenga. Nin’dzatsonkhanisa wanthu wakucokera ku mbali zentse kuti awengane nawe. Nin’dzakukhundula pamaso pawo ndipo iwo an’dzakuwona uli pezi-pezi.
38 “‘Ndipo nin’dzakupasa cirango comwe cimbaperekedwa kwa akazi wakulowodwa omwe acita uputa na kwa akazi omwe apha munthu, ndipo mulopa wako un’dzacosedwa* mwaukali na mwa ntcanje.
39 Nin’dzakupereka m’manja mwawo ndipo iwo an’dzapfudza mitunthu yako na mbuto zako zakupambulika. Iwo an’dzakukhundula bzakubvala, an’dzakutengera bzinthu bzako bzakufunika kwene-kwene,* ndipo an’dzakusiya uli pezi, ulibe kubvala.
40 Iwo an’dzakubweresera thimu la wanthu lomwe lin’dzakuboma na minyala ndipo lin’dzakupha na maxipada yawo.
41 Iwo an’dzacontha nyumba zako na moto ndipo an’dzakulanga akazi azinji akuwona. Inepano nin’dzamalisa uputa bwako ndipo iwepo un’dzasiya kuwapagali.
42 Ciya cangu cin’dzamalira iwepo, ndipo ukali bwangu bomwe ndikhanabo bun’dzamala. Mtima wangu un’dzaderekha ndipo nin’dzakhala lini pomwe na ukali.’
43 “‘Pakuti ulibe kukumbukira ntsiku zomwe ukhali tswaka ndipo wandikalipisa na bzinthu bzentse bzomwe udacita, inepano nin’dzacitisa kuti iwepo ubonere na bzomwe udacita. Iwepo un’dzapitiriza lini pomwe na khalidwe lako lakuipa ndipo un’dzacita lini pomwe bzinthu bzakunyantsa,’ walewa tenepo Yahova Mbuya Mkululetu.
44 “‘Wentse omwe ambaphatisa basa mimwani an’dzalewambo mwani wakuti: “Bzomwe mwana na mai ambacita, ndendende.”
45 Iwepo watengera mai wako omwe akhanyoza mwamuna wawo na wana wawo wacimuna, ndipo ndiwe m’bale wa mpfumakazi zako zomwe zikhanyoza azimuna wawo na wana wawo wacimuna. Mai wako akhali Mhiti ndipo pai wako akhali wa dzinza la Amori.’”
46 “‘M’bale wako wakuyamba* ni Samariya, omwe ambakhala kumbali yako ya ku norte pabodzi na wana wace wacikazi, ndipo m’bale wako mng’ono ni Sodoma, omwe ambakhala kumbali yako ya ku suli pabodzi na wana wace wacikazi.
47 Ulibe kundofamba kokha m’njira zawo na kutewezera bzicito bzawo bzakunyantsa, koma mu kanthawe kakucepa udayamba kucitambo bzinthu bzakuipa kwene-kwene kuposa iwo.’
48 Yahova Mbuya Mkululetu walewa kuti: ‘Pana ine Mulungu wamoyo, ndikulumbira kuti m’bale wako Sodoma na wana wace wacikazi alibe kucita bzinthu bzomwe iwepo na wana wako wacikazi mwacita.
49 Bvaya, m’bale wako Sodoma adaphonya ibzi: Iye pabodzi na wana wace wacikazi akhabzikuza, akhana phoso lizinji ndipo akhakhala alibe thupo, tsono iye alibe kuthandiza anyakusaya na wakusauka.
50 Iwo adapitiriza kubzikuza na kucita bzinthu bzakunyantsa pamaso pangu, ndipopa ndidawona kuti bzikhali bwino kuwapfudza.
51 “‘Napo Samariya caiye alibe kucita kati na kati ya pikado zako. Wacita bzinthu bzizinji kwene-kwene bzakunyantsa kuposa azibale wako, mpaka udacitisa kuti iwo awoneke ninga wakulungama thangwe ra bzinthu bzako bzentse bzakunyantsa bzomwe ukhacita.
52 Tsapano un’nyala, thangwe wathandizira* bzicito bza azibale wako wacikazi. Iwo mbakulungama kuposa iwepo thangwe pikado zomwe iwepo udacita, n’zakunyantsa kwene-kwene kuposa zomwe iwo adacita. Tsapano cita manyazi ndipo khala wakunyozeka, pakuti iwepo wacitisa azibale wako wacikazi kuwoneka ninga wakulungama.’
53 “‘Nin’dzatsonkhanisa wanthu wawo omwe adawaphata kuti ayende nawo ku ukapolo, omwe ni anyakuphatidwa wa ku Sodoma pabodzi na wana wawo wacikazi, anyakuphatidwa ku Samariya pabodzi na wana wacikazi. Nin’dzatsonkhanisambo pabodzi na iwo wanthu wako omwe adaphatidwa aciyendesedwa ku ukapolo
54 kuti iwepo udzanyale. Iwepo un’dzacita manyazi thangwe udawacitisa kubzibva bwino.
55 Azibale wako caiwo wacikazi, Sodoma na Samariya pabodzi na wana wawo wacikazi, an’dzakhala pomwe ninga momwe akhaliri pakuyamba ndipo iwepo pabodzi na wana wako caiwo wacikazi mun’dzakhala pomwe ninga momwe mukhaliri pakuyamba.
56 M’bale wako wacikazi Sodoma ukhamuwona ninga kuti akhathemera lini kugumidwa na iwepo pa nthawe yomwe iwepo ukhabzikuza,
57 pomwe bzicito bzako bzakuipa bzikhanati kuwonekera. Tsapano wana wacikazi wa Siriya na azivizinyu wace akukutukwana ndipo wana wacikazi wa Afilisteu na wentse omwe ambakhala nawe pafupi akukunyoza.
58 Iwepo un’dzabonera na khalidwe lako lakupasa manyazi na bzicito bzako bzakunyantsa,’ walewa tenepo Yahova.”
59 “Yahova Mbuya Mkululetu walewa kuti: ‘Tsapano nin’cita nawe ndendende bzomwe udacita, thangwe udanyoza lumbiro na kuphonyera mpangano wangu.
60 Tsono ine nin’dzakumbukira mpangano omwe ndidacita na iwepo pomwe ukhali tswaka, ndipo nin’dzakhazikisa mpangano wakusaya kumala na iwepo.
61 Un’dzakumbukira bza khalidwe lako lakuipa ndipo un’dzacita manyazi pomwe un’dzatambira azibale wako wacikazi akulu na ang’ono, ndipo ine nin’dzakupasa kuti akhale wana wako wacikazi, koma sikuti thangwe ra mpangano omwe ndidacita na iwepo.’
62 “‘Ine nin’dzakhazikisa mpangano wangu na iwepo ndipo un’dzadziwa kuti ine ndine Yahova.
63 Tenepo, iwepo un’dzakumbukira ndipo un’dzacita manyazi kwene-kwene, mwakuti un’dzakwanisa lini kufungula mulomo thangwe ra manyazi yako ndikadzakulekerera napo kuti udacita bzinthu bzentsenebzi,’ walewa tenepo Yahova Mbuya Mkululetu.”
Mafala ya m'nyantsi
^ Ayai, “saya yangu.”
^ Cimweci ni cakubvala comwe cimbaikhidwa bzakudekesera.
^ Ayai, “bzakudekesedwa.”
^ Bzomwe ni, bzifanikiso bza wanthu wacimuna.
^ Ayai, “bzakuderekhesa mtima.”
^ Mafala yace caiyo: “mwa kufungula minyendo yako.”
^ Mafala yace caiyo: “dziko la Akanani.”
^ Limweri ni thimu la wanthu omwe akhabzibva kuti akhadziwa kuvima na kudziwa bzinthu bzakutsogolo.
^ Ayai, “ukhadatepa.”
^ Mu Cihebereu falali pinango lingakhale likulewa bza “ndowe” ndipo limbaphatisidwa basa ninga fala lakunyoza.
^ Ayai, “ndipo iwepo un’dzaphedwa.”
^ Ayai, “bzinthu bzako bzakubzidekesera.”
^ Ayai, “mpfumakazi yako yakuyamba.”
^ Ayai, “watawirira.”
