Ezekiyeli 24:1-27
24 Pa ntsiku yaci 10, mwezi waci 10, m’gole laci 9, Yahova adalewalewa nande pomwe kuti:
2 “Iwe mwana wa munthu, nemba ntsikuyi, ntsiku ya lero. Mambo wa ku Babiloniya ayamba kucita nkhondo na Jeruzalemu pa ntsiku imweyinoletu.
3 Ndipo lewa mwani wakulewa bza nyumba yakupanduka. Pakulewa bza iwo, lewa kuti:
“‘Yahova Mbuya Mkululetu walewa kuti:
“Tereka poto, tereka poto pamoto ndipo uikhe madzi mkatimo.
4 Ikha m’potomo nthindi za nyama, nthindi zabwino zokha-zokha,Mwendo wa m’mbuyo na wakutsogolo ndipo dzaza m’mwemo mafupa yabwino.
5 Tenga bira wabwino pakati pa mabira ndipo ikha nkhuni pantsi pa poto.
Phika nthindi pabodzi na mafupa yace m’potomo.”’
6 “Yahova Mbuya Mkululetu walewa kuti:
‘Tsoka mzinda omwe umbapha wanthu, omwe uli ninga poto ya fuluju ndipo fulujoyo iribe kucosedwa,
Cosa nthindi zentse m’potomo, ibodzi na ibodzi ndipo leka kucita kusankhula.*
7 Thangwe mulopa omwe mzindayo udacosa uli m’potomo.
Mzindayo udathululira mulopayo pa mwala wakunyalala; ulibe kuuthululira pantsi kuti ufuciridwe na mataka.
8 Ndasiya mulopayo pa mwala wakunyalalaNe kuufucira,Kuti ndiwalange na kuwalatiza ukali bwangu.’
9 “Tenepo Yahova Mbuya Mkululetu walewa kuti:
‘Tsoka kwa mzinda omwe umbapha wanthu!
Ine nin’dzagwezeka nkhuni zizinji.
10 Gwezekani nkhuni zizinji ndipo gasani moto,Phikani bwino nyama, ikhani ngwedegero ndipo siyani mafupa yapserere.
11 Ikhani poto yakusaya cinthu pamoto kuti ipse,Mpaka kobre yace ifuire.*
Bzinthu bzace bzakupswipa bzin’dzasungunuka mkati mwace ndipo fuluju yace in’dzamala kupsa.
12 Tsono bzimwebzi mpsakumalisa mphanvu na bzakunetesa,Thangwe fulujuyo njizinji ndipo in’coka lini.
Thusani poto pabodzi na fuluju yaceyo pamoto.’
13 “‘Iwepo wapswipa thangwe ra khalidwe lako lakuipa. Ine ndayezera kukucenesa tsono ulibe kucena. Iwepo un’dzacena lini mpaka ciya cangu kudzamala.
14 Ine Yahova ndalewa, ndipo bzin’dzacitika. Mwakusaya kupenukira, ine nin’dzacita bzimwebzi. Nin’dzakubvera lini ntsisi ne kubwerera m’mbuyo. Iwo an’dzakutonga mwakubverana na makhalidwe yako na bzicito bzako,’ walewa tenepo Yahova Mbuya Mkululetu.”
15 Yahova adalewalewa nande pomwe kuti:
16 “Iwe mwana wa munthu, nin’funa kukucosera kabodzi na kabodzi munthu omwe umbamufuna. Un’funika lini kudandaula,* kulira ne kucosa misozi.
17 Buula mwakazizi ndipo leka kusunama ninga momwe ambacitira munthu akafedwa. Bvala duku ndipo bvalambo xango. Leka kumpsinkha mulomo ne kudya cakudya comwe wanthu an’dzakubweresera.”
18 Tenepo macibese ndidalewalewa na wanthu, ndipo usiku mkazangu adafa. Mangwana yace ndidacita ndendende ninga momwe ndidauzidwira.
19 Wanthu akhandibvunza kuti: “Kodi un’tiuza lini kuti bzomwe ukucitabzi bzikubverana tani na ifepano?”
20 Ine ndidawatawira kuti: “Yahova wandiuza kuti:
21 ‘Uza nyumba ya Jirayeri kuti: “Yahova Mbuya Mkululetu walewa kuti: ‘Nin’funa kupswipiza mbuto yangu yakucena yomwe imbakucitisani kusamwa, mumbaifuna na kuikumbukira mu mtima mwanu. Wana wanu wacimuna na wacikazi omwe mudawasiya an’dzaphedwa na xipada.
22 Tsono imwepo mun’funika kudzacita bzomwe ine ndacitabzi. Mun’dzampsinkha lini mulomo ne kudya cakudya comwe wanthu an’dzakubwereserani.
23 Mun’dzabvala duku ndipo mun’dzabvalambo xango ku nzayo zanu. Mun’dzadandaula lini ne kulira, m’mbuto mwace mun’dzabonera thangwe ra bzakuphonya bzanu ndipo ali-wentse an’dzabuulira mwanzace.
24 Ezekiyeli wakhala cizindikiro kwa imwepo. Mudzacite ndendende ninga momwe iye adacitira. Bzimwebzi bzikadzacitika, imwepo mun’dzadziwa kuti ine ndine Yahova Mbuya Mkululetu.’”’”
25 “Tsono iwe mwana wa munthu, pa ntsiku yomwe nin’dzawacosera muro wawo wakulimba, bzinthu bzakudeka bzomwe bzimbawakondwesa, bzinthu bzomwe iwo ambabzifuna, bzinthu bzomwe iwo ambabzikumbukira mu mtima mwawo pabodzi na wana wawo wacimuna na wacikazi,
26 iwepo un’dzadziwisidwa bzimwebzo na munthu omwe an’dzapulumuka.
27 Pa ntsiku imweyo un’dzafungula mulomo, un’dzalewalewa na munthu omwe an’dzapulumukayo ndipo un’dzakhala lini pomwe bewewe. Iwepo un’dzakhala cizindikiro kwa iwo, ndipo iwo an’dzadziwa kuti ine ndine Yahova.”
Mafala ya m'nyantsi
^ Ayai, “leka kucita vima-vima kuti usankhule nthindizo.”
^ Ayai, “mkuwa wace ufuire.”
^ Ayai, “kumenya pa nkhombe.”
