Ezekiyeli 27:1-36
-
Nyimbo yakulira thangwe ra kulubzika kwa naviyo ya Tiro (1-36)
27 Yahova adalewalewa nande pomwe kuti:
2 “Iwe mwana wa munthu, imba nyimbo yakulira pakulewa bza Tiro,
3 ndipo uza Tiro kuti:‘Iwe omwe umbakhala m’mphepete mwa nyanza,Nyakucita malonda na wanthu omwe ambakhala mu ntsuwa zizinji,Yahova Mbuya Mkululetu walewa kuti:
“Iwe Tiro, iwe omwe umbabzilewa kuti: ‘Ine ndidadeka kwene-kwene.’
4 Malire yako yali pakati pa nyanza,Ndipo amisiri omwe adakumanga, adakudekesa kwene-kwene.
5 Iwo adakonza matabwa yako yentse na miti ya junípero* ya ku Seniri,Ndipo iwo adaphatisa basa muti wa Mkungudza* wa ku Lebanoni kuti aukonzere mtanda wa naviyo.
6 Iwo adakonza ng’ombo zako na miti ya ku Basani,Ndipo kutsogolo kwa naviyoyo adakukonza na matabwa ya pinyu, ndipo adakudekesa na manyanga ya nzou za ku ntsuwa ya Kitimu.
7 Nguwo zakudeka na za kore zakusiyana-siyana za ku Edjipito zikhaphatisidwa basa ninga cinguwo ca naviyo,Padzaulu pako pakhadampsinkhidwa na nguwo yabwino kwene-kwene ya azuli na ya roxo za ku ntsuwa ya Elixa.
8 Wanthu wa ku Sidoni na wa ku Arvadi ndiwo omwe akhali anyakucapa wako.
Iwe Tiro, wanthu wako waluso ndiwo omwe akhakufambisira naviyo.
9 Adziwi na wanthu waluso wa ku Jebali ndiwo omwe akhamata matabwa ya naviyo zako kuti zileke kupita madzi.
Naviyo zentse za m’nyanza na anyakufambisa wace akhabwera kwa iwepo kuti adzacite nawe malonda.
10 Amuna wa ku Persiya, wa ku Ludi na wa ku Puti akhali m’thimu lako la anyankhondo, iwo akhali acikunda wako.
Iwo akhamanika bzakukhotcera na makapaseti yawo pa iwepo, ndipo akhacitisa kuti ukhale na ulemerero.
11 Ukhadaikha m’mbali zentse za mimuro yako amuna wa ku Arvadi omwe akhali pakati pa acikunda wako,Ndipo amuna wamphanvu akhalindira nyumba zako za ntsanza.
Iwo akhamanika bzakukhotcera bzabololindo pa mimuro yako.Ndipo iwo akhathumizira kukudekesa.
12 “‘“Tarisi akhacita nawe malonda thangwe ra kuwanda kwa cuma cako. Iye akhagula bzinthu bzako bzabwino mwa kucinjanisa na prata,* simbi,* mtobve na xumbu.
13 Javani, Tubali na Meseki akhagula bzinthu bzako mwakucinjanisa na akapolo wawo na bzinthu bzawo bza kobre.*
14 Wanthu wa m’nyumba ya Togarima akhagula bzinthu bzako mwa kucinjanisa na makavalo yakunyamulira mitolo, makavalo yakumenyera nkhondo na nyulusi.*
15 Ukhacita malonda na wanthu waku Dedani. Iwepo ukhana wanthu omwe akhakucitira malonda mu ntsuwa zizinji, ndipo iwo akhambakupasa nyanga za nzou na mkhomodwa* ninga mtsonkho.
16 Edomu akhacita nawe malonda thangwe ra kuwanda kwa bzinthu bzako. Iwo akhagula bzinthu bzako mwa kucinjanisa na minyala ya turkeza, nguwo za roxo, bzakubvala bzakubordari bza kore zakusiyana-siyana, nguwo zabwino kwene-kwene, minyala yakufunika kwene-kwene ya korali* na ya rubi.
17 “‘“Djuda na dziko la Jirayeri akhacita nawe malonda. Iwo akhambacinjanisa bzinthu bzako mwa kukupasa tirigu ya miniti, bzakudya bzakusankhulidwa bwino, uci, mafuta ya azeite na balsamo.
18 “‘“Damasko akhacita nawe malonda thangwe ra kuwanda kwa bzinthu bzako na cuma cako centse. Iye akhacinjanisa bzimwebzi mwa kukupasa vinyu ya ku Heliboni na usalu bufuirira na bwakupfumbuka bwa ku Zahari.
19 Vedani na Javani wa ku Uzali akhakupasa simbi, kasiya* na kalamo,* pakucinjanisa na bzinthu bzako.
20 Dedani akhakugulisira bzakukhalira pa misana ya makavalo.
21 Wanthu wa ku Arabya na akulu-akulu wentse wa ku Kedari omwe akhacita malonda yakugulisa wana wa mabira, mabvululume* na mbuzi akhakuphatira basa.
22 Anyakucita malonda wa ku Xeba na ku Raama, akhacita nawe malonda. Iwo akhakupasa perfume zentse zabwino, minyala yakufunika na oro mwakucinjanisa na bzinthu bzako.
23 Harani, Kane, Edeni, anyamalonda wa ku Xeba, Hasuri na Kilimadi, akhacita nawe malonda.
24 Pa msika wako, iwo akhagulisa bzakubvala bzabwino, bzakubvala bza kore ya azuli, bzakubvala bza kore zakusiyana-siyana bzakubordari, na tapeti za kore zakusiyana-siyana. Bzentsenebzi bzikhamangidwa bwino-bwino na bzingwe.
25 Naviyo za ku Tarisi ndizo zikhanyamula malonda yako.Tenepo udakhala na bzinthu bzizinji, ndipo udalemedwa kwene-kwene pakati pa nyanza.
26 Anyakucapa wako adakutenga acikuyendesa pomwe pana madzi mazinji m’nyanza.Mphepo ya kumabvadzuwa idakupfudza pakati pa nyanza.
27 Cuma cako, bzinthu bzako, malonda yako, anyakuphata basa mu naviyo na amarinyero wako,Wanthu omwe akhamata matabwa ya naviyo zako, anyamalonda wako, pabodzi na anyankhondo wako wentse,Thimu lentse lomwe liri pabodzi na iwepo,Wentse an’dzalubzika pakati pa nyanza pa ntsiku yomwe iwepo un’dzapfudzidwa.
28 Amarinyero wako akadzakuwa, dziko lentse lin’dzatekenyeka.
29 Anyakucapa wentse, anyakuphata basa mu naviyo na amarinyero,An’dzabuluka m’manaviyo acikaima kunja.
30 Iwo an’dzakuwa acidandaula mwakuwawidwa thangwe ra iwepo.An’dzabziikha mataka mu msolo acidzabvunvulika pa dotha.
31 An’dzameta mpala acibvala magundiri.An’dzalira mwakuwawidwa thangwe ra iwepo na mwakudandaula kwene-kwene.
32 Pa kudandaulapo, an’dzaimba nyimbo ya nkhawa pakulewa bza iwepo kuti:
‘Mbani omwe angandendemerane na Tiro omwe tsapano wapfudzidwa pakati pa nyanza?
33 Pomwe bzinthu bzako bzikhabwera kucokera pakati pa nyanza, iwepo ukhakhutisa wanthu azinji.
Cuma cako cizinji na malonda yako bzidadaza amambo wa pa dziko la pantsi.
34 Tsapano wapfudzidwa pakati pa madzi mazinji m’nyanza.Malonda yako yentse na wanthu wako wentse, amira nawe pabodzi.
35 Wanthu wentse wakukhala pa ntsuwa, an’dzakunyang’anisisa mwakudabwa.Amambo wawo an’dzatetemera na mantha ndipo nkhope zawo zin’dzalatiza kuti ana thupo.
36 Anyakucita malonda wa mitundu inango an’dzaimba muluzi thangwe ra bzomwe bzakucitikira.
Kumala kwako kun’dzakhala kwakudzidzimusa na kwakupasa mantha,Ndipo iwepo un’dzawoneka lini pomwe mpaka kale-kale.’”’”
Mafala ya m'nyantsi
^ Umweyu ni muti omwe udatengana na muti wa mkungudza.
^ Ayai, “Sedro.”
^ Ayai, “siriva.”
^ Ayai, “fero.”
^ Ayai, “mkuwa.”
^ Cimweci ni cirombo comwe cina mawonekedwe ninga ya kavalo.
^ Muti omwe mkati mwace ngupswipa kwene-kwene, m’Cipwitikizi: ébano.
^ Ni minyala yakufunika yomwe imbakhala m’nyanza.
^ Umweyu ni muti wakundendemerana na muti wa kanela.
^ Umweyu ni muti wakununtcira.
^ Ayai, “mabira yacimuma.”
