Ezekiyeli 28:1-26
28 Yahova adalewalewa nande pomwe kuti:
2 “Iwe mwana wa munthu, uza mtsogoleri wa Tiro kuti: ‘Yahova Mbuya Mkululetu walewa kuti:
“Pakuti wabzikuza mu mtima mwako ucilewa kuti: ‘Ndine mulungu,
Ndidakhala pa mpando wa umambo wa mulungu pakati pa nyanza.’
Tsono iwepo ndiwe munthu basi, ndiwe lini mulungu,Napo kuti mu mtima mwako ukukumbuka kuti ndiwe mulungu.
3 Ukukumbuka kuti ndiwe wanzeru kwene-kwene kuposa Daniyeli.
Ndipo umbakumbukambo kuti palibe cintsintsi comwe cingabisike kwa iwepo.
4 Wadala thangwe ra nzeru zako na kubvesesa kwako bzinthu,Ndipo ukupitiriza kubzigwezekera oro na prata mu mbuto zako zakukoyera cuma.
5 Luso lako lakucita malonda lakudaza kwene-kwene,Ndipo mtima wako wabzikuza thangwe ra cuma cako.”’
6 “‘Na thangwe limweri, Yahova Mbuya Mkululetu walewa kuti:
“Pakuti mu mtima mwako ukukumbuka kuti ndiwe mulungu,
7 Nin’dzakubweresera wanthu wa mitundu inango omwe ni wakuipa mtima kwene-kwene,Iwo an’dzasolola xipada zawo acidzapfudza bzinthu bzakudeka bzomwe udabzigumana thangwe ra nzeru zako.Ndipo iwo an’dzapswipiza ulemerero bwako bukulu.
8 Iwo an’dzakungwinyira m’dindi,*Ndipo infa yako in’dzakhala yakuwawa kwene-kwene pakati pa nyanza.
9 Kodi iwepo un’dzapitiriza kulewa kwa ule omwe an’kupha kuti: ‘Ndine mulungu?’
M’manja mwa wale omwe an’dzakupswipiza un’dzakhala munthu basi, sikuti mulungu.”’
10 ‘Un’dzaphedwa na wanthu wa mitundu inango, ndipo infa yako in’dzakhala ninga ya wanthu omwe alibe kucitidwa mgwatidwe,*Pakuti ine ndalewa,’ walewa tenepo Yahova Mbuya Mkululetu.”
11 Yahova adalewalewa nande pomwe kuti:
12 “Iwe mwana wa munthu, imba nyimbo yakulira pakulewa bza mambo wa Tiro, lewa kuti: ‘Yahova Mbuya Mkululetu walewa kuti:
“Iwepo ukhali wakulungama,Ukhana nzeru ndipo ukhadadeka kwene-kwene.
13 Iwepo ukhali mu Edeni munda wa Mulungu.
Iwepo ukhadadekesedwa na minyala yakufunika ya mtundu uli-wentse, yomwe ni:Rubi, topaziyo, jaspe;Krizolito, onekisi, jade, safira, turkeza na esmeralda;
Pakuikhira minyala imweyi pakhali pa oro.
Bzentsenebzi bzidakonzedwa pa ntsiku yomwe udalengedwa.
14 Ine ndakusankhula na kukudzoza kuti ukhale kerubi wakukhotcerera.
Iwepo ukhali pa phiri lakucena la Mulungu, ndipo ukhafamba pa minyala ya moto.
15 Iwepo ukhali wakukhulupirika kucokera pa ntsiku yomwe udalengedwaMpaka pomwe udayamba kucita bzinthu bzakusaya kulungama.
16 Thangwe ra kuwanda kwa malonda yako,Iwepo udakhala waciwembo ndipo udayamba kucita pikado.
Ndipopa iwe kerubi wakukhotcerera omwe ukufamba pa minyala ya moto,Inepano nin’dzakuthamangisa pa phiri la Mulungu ninga munthu wakupswipa ndipo nin’dzakupfudza.
17 Udabzikuza thangwe ra kudeka kwako.
Wadzonga nzeru zako thangwe ra ulemerero bwako bukulu.
Nin’dzakuthusa pantsi.
Nin’dzacitisa kuti amambo akunyang’anise.
18 Thangwe ra kuphonya kwako kukulu na malonda yako yakusaya kukhulupirika, iwepo wapswipiza mbuto zako zakucena.
Nin’dzaphatiza moto pakati pako ndipo motoyo un’dzakutentha.
Nin’dzakucitisa kukhala dotha pa dziko la pantsi pamaso pa wentse omwe akukuwona.
19 Wanthu wentse omwe ambakudziwa pakati pa mitundu an’dzakunyang’anisa mwakudabwa.
Kumala kwako kun’dzakhala kwakudzidzimusa na kwakupasa mantha,Ndipo iwepo un’dzawoneka lini pomwe mpaka kale-kale.”’”
20 Yahova adalewalewa nande pomwe kuti:
21 “Iwe mwana wa munthu, nyang’anisa ku Sidoni ndipo ulewe profesiya ya bzinthu bzomwe bzin’dzamucitikira.
22 Lewa kuti: ‘Yahova Mbuya Mkululetu walewa kuti:
“Iwe Sidoni, inepano ndakhala nyamadulanthaka wako ndipo nin‘dzatumbizidwa pakati pako;Wanthu an’dzadziwa kuti ine ndine Yahova, ndikadzakulanga na kubzicenesa pakati pako.
23 Nin’dzakutumizira cisi* ndipo mulopa un’dzayerera m’miseu yako.
Maxipada yakadzabwera kucokera m’mbali zentse, wanthu wakufa an’dzagwa pakati pako;Ndipo iwo an’dzadziwa kuti ine ndine Yahova.
24 “‘“Nyumba ya Jirayeri in’dzazunguliridwa lini pomwe na nceso ayai minga zakuwawa, omwe ni wanthu omwe ambawacitira bzinthu mwakunyoza; ndipo wanthu an’dzadziwa kuti ine ndine Yahova Mbuya Mkululetu.”’
25 “‘Yahova Mbuya Mkululetu walewa kuti: “Ndikadzatsonkhanisa Ajirayeri pakati pa mitundu ya wanthu yomwe ndidawabalalisira, inepano nin’dzacenesedwa pakati pawo, pamaso pa wanthu wa mitundu inango. Ndipo iwo an’dzakhala mu dziko lawo cairo lomwe ndidapasa mtumiki wangu Djakobo.
26 Iwo an’dzakhala m’mwemo mwakukhotcerereka, an’dzamanga nyumba na kubzala uva. Iwo an’dzakhaladi mwakukhotcerereka ndikadzalanga wanthu wakuwazungulira, omwe ambawacitira bzinthu mwa kuwanyoza; ndipo an’dzadziwa kuti ine ndine Yahova Mulungu wawo.”’”
