Ezekiyeli 29:1-21
29 Mu gole laci 10, mwezi waci 10, pa ntsiku yaci 12 ya mweziyo, Yahova adalewalewa nande pomwe kuti:
2 “Iwe mwana wa munthu, nyang’anisa Farawo, mambo wa Edjipito ndipo lewa profesiya ya bzinthu bzomwe bzin’citikira iye na Edjipito wentse.
3 Lewa mafala aya: ‘Yahova Mbuya Mkululetu walewa kuti:
“Iwe Farawo mambo wa Edjipito, inepano ndakhala nyamadulanthaka wako,Iwepo ndiwe cirombo cikulu ca m’nyanza,Comwe cidagona pakati pa madzi ya mu mkulo wako wa Nilo,
Iwepo umbalewa kuti: ‘Mkulo wa Nilo ni wangu.
Ndidabzikonzera kuti ukhale wangu.’
4 Tsono nin’dzakoloweka na medzo ntsagwada zako ndipo nin’dzacitisa kuti ntsomba za mu mkulo wako wa Nilo ziphatirire mabade yako.
Nin’dzakucosa mu mkulo wako wa Nilo pabodzi na ntsomba zentse za mu Nilo zomwe zidaphatirira ku mabade yako.
5 Nin’dzakusiya m’dambo pabodzi na ntsomba zentse za mu mkulo wako wa Nilo.
Iwepo un’dzangwa pakati pa thengo ndipo palibe munthu omwe an’dzakutenga acikuikha m’thenje.
Nin’dzakupasa bzirombo bza m’thengo na mbalame zakudzulu kuti bzikhale cakudya cako.
6 Tenepo wanthu wentse wakukhala ku Edjipito an’dzadziwa kuti ine ndiye Yahova,Thangwe iwo akhathandiza lini pomwe nyumba ya Jirayeri ninga mitete yakuuma.
7 Pomwe adakuphata, iwepo udasweka,Ndipo phewa lawo lidang’ambika.
Pomwe iwo adakuphata kuti akhotcerereke, iwepo udagwatika-gwatika,Ndipo udacitisa kuti minyendo yawo igoboke.”
8 “‘Tenepo Yahova Mbuya Mkululetu walewa kuti: “Nin’kubweresera xipada ndipo nin’dzapfudza wanthu na bzirombo pakati pako.
9 Dziko la Edjipito lin’dzapfudzidwa licikhala matere ndipo iwo an’dzadziwa kuti ine ndine Yahova, pakuti iwepo walewa kuti: ‘Mkulo wa Nilo ni wangu ndine omwe ndidaukonza.’
10 Tenepo ndakhala nyamadulanthaka wako na nyamadulanthaka wa mkulo wako Nilo. Ndipo nin’dzacitisa dziko la Edjipito kupfudzidwa licikhala lakuuma, licikhala dambo lakusaya kukhalidwa na wanthu kucokera ku Migidoli mpaka ku Siyene mpaka kukafika ku malire na Etiyopiya.
11 Palibe omwe an’dzapita na kumweko ne bzirombo ne wanthu ndipo kun’dzakhalidwa lini kwa magole 40.
12 Nin’dzacitisa dziko la Edjipito kukhala matere kuposa madziko manango, ndipo mizinda yace in’dzakhala matere kuposa mizinda inango kwa magole 40. Nin’dzabalalisa Aedjipito pakati pa mitundu ya wanthu ndipo nin’dzawawabalisira m’madziko manango.”
13 “‘Tenepo Yahova Mbuya Mkululetu walewa kuti: “Yakadzamala magole 40, nin’dzatsonkhanisa Edjipito kucokera m’mitundu ya wanthu yomwe adabalalisidwira.
14 Aedjipito omwe adayendesedwa ku ukapolo, nin’dzawabwezeresa ku Patrosi dziko lawo lakubadwira, ndipo kumweko an’dzakhala umambo bwakusaya mphanvu.
15 Dziko la Edjipito lin’dzakhala lakusaya mphanvu pakundendemezera na maumambo yanango, ndipo lin’dzakunda lini pomwe mitundu inango ya wanthu. Ine nin’dzawapunguza mwakuti an’dzakwanisa lini pomwe kukunda wanthu wa mitundu inango.
16 Dziko la Edjipito lin’dzathembedwa lini pomwe na nyumba ya Jirayeri, koma lin’dzandowakumbusa kuphonya kwawo, thangwe ra kukumbira thandizo kwa iwo. Ndipo iwo an’dzadziwa kuti ine ndine Yahova Mbuya Mkululetu.”’”
17 Mu gole laci 27, mwezi wakuyamba, pa ntsiku yakuyamba ya mweziyo, Yahova adalewalewa nande pomwe kuti:
18 “Iwe mwana wa munthu, Nabukadinazori* mambo wa ku Babiloniya, waphatisa basa mwamphanvu acikunda wace kuti amenyane na Tiro. Tsisi la acikunda wentse lidamala kukudzuka ndipo mapewa yawo yentse yadaswukuka. Tsono iye pabodzi na acikunda wace alibe kupasidwa cinthu ciri-centse thangwe ra basa lomwe adacita pakumenyana na Tiro.
19 “Tenepo, Yahova Mbuya Mkululetu walewa kuti: ‘Nin’dzapasa Nabukadinazori* mambo wa ku Babiloniya dziko la Edjipito, ndipo iye an’dzatenga cuma cace na kupamba bzinthu bzizinji m’mwemo. Ndipo bzimwebzi an’dzabziphatisa basa kuti apagaliri acikunda wace.’
20 “‘Pakuti adandiphatira basa, nin’dzamupasa dziko la Edjipito ninga pagamento thangwe ra basa lomwe adacita pakumenyana na Tiro,’ walewa tenepo Yahova Mbuya Mkululetu.
21 “Pa ntsiku imweyi nin’dzacitisa kuti pawoneke munthu wamphanvu pakati pa nyumba ya Jirayeri ndipo nin’dzakupasa mwayi wakuti ulewelewe pakati pawo, tenepo iwo an’dzadziwa kuti ine ndine Yahova.”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “Nabukadirazori.” Kamweka ni kanembedwe kanango ka dzinali.
